掃呢頁CODE去手機

2015年11月18日 星期三

弊傢伙!玩新郎玩大咗! [FACE - 443] :),MF,

全知言 弊傢伙!玩新郎玩大咗! 娛圈喜事一籮籮,明星排住隊告別單身,今月底仲輪到王菀之同 Figure王男友蘇卓航拉埋天窗,榮升幸福人妻!之不過想娶得美人歸,除咗開門利是唔少得外,姊妹玩新郎嗰關絕對唔易過㗎!好似食 Wasabi食蟲扮女人乜乜乜,新郎真係少啲勇氣都唔掂!云云玩新郎遊戲,唔知班明星又覺得邊個 game最討 ...


全知言

弊傢伙!玩新郎玩大咗!

娛圈喜事一籮籮,明星排住隊告別單身,今月底仲輪到王菀之同 Figure王男友蘇卓航拉埋天窗,榮升幸福人妻!

之不過想娶得美人歸,除咗開門利是唔少得外,姊妹玩新郎嗰關絕對唔易過㗎!好似食 Wasabi食蟲扮女人乜乜乜,新郎真係少啲勇氣都唔掂!云云玩新郎遊戲,唔知班明星又覺得邊個 game最討厭,最反感呢?

關心妍 溝乜溝乜

最討厭玩新郎遊戲係成日迫你食嗰啲嘢,食嘢係冇問題,但 combine埋啲嘢食就恐怖 Wasabi溝苦茶溝辣椒醬,你諗下呢幾樣嘢夾埋一齊會係咩色,有幾咁恐怖!我見到都驚,好彩嗰時都冇咁玩我老公!自己結婚嗰陣都係問嗰啲問題,好似記唔記得第一次約會着咩色衫?咁你要小心因為通常都唔記得!好多嘢都係佢啲兄弟幫佢頂晒。做兄弟真係好偉大,仲記得有個兄弟着住黑白 Lolita裝帶埋個假髮,佢個樣仲要係好老正,笑到你死!

王喜 數番前度

我覺得最乞人憎要佢數番以前啲女朋友!好似好得意,但其實好乞人憎!最慘嚟飲嘅座上客有可能係以前啲女朋友,圍圍枱表面嘻嘻哈哈,但暗地裡感情線錯綜複雜,然後你要新郎公開交代以前有幾多女朋友,真係會反面㗎!同埋會勾出好多真相,你話即時反枱都叫好,但如果嗰下撻番着,點收科?仲要唔係撻着新郎,而係撻着下面啲前度,呢個真係要檢點下!

關楚耀 朱古力溝香蕉

接新娘收開門利是,或者同啲兄弟玩下,做掌下壓什麼難度嘢,我 ok,接受到嘅!但如果要食一啲好似朱古力溝香蕉,整咗 pat嘢出嚟,好似食屎咁,就覺得有少少肉酸嘅!即係你喜慶日子,冇理由食屎咁樣㗎嘛!

雨僑 新郎扮女人

我最討厭玩新郎環節係迫新郎扮女人,好多時迫佢着 bikini,着 nude bra着裙!喂!我係嫁老公,做乜將我老公同兄弟變做女人啫!我唔想睇喎!所以我結婚應該唔會有呢啲玩新郎環節。好多時愛老婆,對老婆好嘅表現,未必俾你玩得犀利就代表愛!真愛唔使咁考驗佢!開門利是大封啲得㗎

羅孝勇 扭 pat跳韓舞

幾個禮拜前哥哥結婚,我哋俾啲伴娘玩到癲!所有遊戲之中,最討厭係佢哋揀咗兩個韓國女子組合 MV,全部着晒西裝,仲要帶埋小精靈嘅翼同公主后冠,成班人喺度跳,扭 pat pat扭到癲,冇一個男仔做到!雖然討厭,但到大個睇番時應該會好搞笑!

街坊最怕要舔嘢

街坊遇上玩新郎嘅遊戲都唔惹少,誇張到出埋尿片加朱古力,聽到眼凸之餘,新郎分分鐘反枱都似!

Kay

聽到有人將朱古力唧落尿片度,跟住要個新郎食,有黑面但都係要硬食,形式上都要舔下。

Kary

最討厭玩新郎遊戲就係擺啲朱古力入去尿片,整到好似屎咁叫新郎食。

Polly

最討厭玩新郎遊戲就係隔住張保鮮紙,兩個兄弟企對面,保鮮紙兩邊都有朱古力醬同蜜糖之類,而佢兩個要舔乾淨!自己見過一次,啲兄弟玩到好黑面!但係佢哋要堅持繼續玩,而舔嘅時候,嗰張只係張保鮮紙,我覺得好核突!

Hazel

最核突係倒啫喱落絲襪俾新郎食,雖然佢冇反面,但就要食晒啲啫喱。

即時報料 facepop

熱線: 9222 0828

電郵:facenews@nextmedia.com

facebook: Face Magazine inbox

line、 we chat id: facemagazine

鍾意就快D Share啦!