掃呢頁CODE去手機

2015年12月10日 星期四

一人夾$10萬 師奶阿婆籌旗上市 [壹週刊 - 1344] __,M1,

俊文世家十分有「規模」,並在早前郵輪碼頭的晚宴上「晒冷」,單是市場部高層都有十多人,聲稱「業務」遍布中、港、澳。壹號頭條一人夾$10萬 師奶阿婆籌旗上市臨近年尾,裁員、蝕讓、退租聲不絕,預期香港經濟由盛轉衰。而港股亦處低壓槽,但偏偏「殼股」(即有機會賣走控股權的上市公司),卻能「脫離市況」、大炒特炒!殼股有價,就算政府表明關注「啤殼」情況,仍遏而不止,且手法更大膽!本刊追查,揭出一個「啤殼集團」竟 ...


俊文世家十分有「規模」,並在早前郵輪碼頭的晚宴上「晒冷」,單是市場部高層都有十多人,聲稱「業務」遍布中、港、澳。

壹號頭條

一人夾$10萬 師奶阿婆籌旗上市

臨近年尾,裁員、蝕讓、退租聲不絕,預期香港經濟由盛轉衰。而港股亦處低壓槽,但偏偏「殼股」(即有機會賣走控股權的上市公司),卻能「脫離市況」、大炒特炒!殼股有價,就算政府表明關注「啤殼」情況,仍遏而不止,且手法更大膽!

本刊追查,揭出一個「啤殼集團」竟出新招,以傳銷方式,透過人傳人、以及 WhatsApp、 WeChat等渠道,找來師奶、阿婆及內地人「集資」,夾錢夾股搞上市。該集團每星期搞兩場講座,又在大酒樓擺數十圍,吹噓已有往績;每人只要夾十萬元,集資五億,就可搞大旗下項目上市。屆時股價炒上,股東最少賺兩、三個開!不少師奶抄低筆記、聽得如痴如醉。

這個大舞台,搭得疑幻疑真,背後有上市公司董事參與。不過,現階段可以肯定,此已涉及非法集資,股東隨時見財化水。可惜不少人想搵快錢依然落疊,本刊直擊這個荒謬的瘋狂現象。

每逢星期一及四的晚上七時,俊文世家都會在尖沙咀好時中心的辦公室舉行簡介會,右邊的職員 Alan向記者推銷期間,展示他們老細搞的公司上市掛牌儀式。

記者這次透過朋友,獲得一名下線職員 Tommy的電話。他透過 WeChat,先一輪嘴探聽記者身份,其後才放下戒心,並興奮透露,的確有一個回報極高的投資計劃。他並不斷傳來一間叫「俊文世家」的公司資料,但究竟點投資?要幾錢?通通見面先講。

起錨「揚帆出財富大海」

簡介會人數比較多,會後再分組討論,記者這組較多師奶,她們認為籌旗搞上市比抽 IPO更保本。

上月,他帶記者出席位於啟德郵輪碼頭的跑車 Apollo S車展, Tommy指 Apollo S正是由俊文世家代理。當日黃夏蕙及老公潘炳烈都有前來,引來圍觀拍照。晚上,在同場的聯邦酒樓筵開五、六十圍,有不少三、四線藝人到來、就連近日捲入假學歷風波的港姐蔡思貝父母亦有出席。除香港人,亦有不少來自珠江三角洲、操唔鹹唔淡廣東話的內地人拖喼趕到。一名叫 Kenny Lee的市場部高層,在台上大搞氣氛:「歡迎海外嘅朋友,我哋將揚帆出財富嘅大海。呢條船,絕對唔係一條細船﹗多謝中國、澳門嘅同事,將來去埋美國歐洲,好唔好?」

大家齊聲叫好,這時另一高層 Kenny Lau接着說:「畢菲特教 The power of combining,三十年就唔使做,五十年就發達,但你有無咁多時間?想快,一定要搵好項目!」再大聲說:「我哋所有嘢都『落地』,係咪真呀?係咪見得到呀?搵到好項目,你仲可以成為天使,幫你身邊人搵錢。」全場氣氛更高漲。當晚既落足本請歌手關楚耀表演,高層又合唱《難為正邪定分界》,更送出鑽石優惠券,得獎者要說祝賀語句,大家都醒目說:「要做十幾倍嘅超額王﹗」

啟航「投資十萬變千萬」

當晚人太多,眾人無提及投資計劃細節,及有何見得到的「落地」項目, Tommy向記者推介「小組討論」。他指逢星期一及四晚,在尖沙咀好時中心、俊文世家的辦公室,都會有簡介會。記者出席了其中一場,當晚早已坐定了十多個師奶,大家分成小組聊天。踏正七時,眾人走入房間,由一名叫水哥的主持簡介。他一開聲,就如 sales般問:「大家喜歡投資定投機呀?如果喜歡投機就唔好來喇﹗」

他口中的「投機」,是指買賣二手市場股票,他認為庄家會舞高弄低,散戶買唔過;而「投資」,是指買原始股(即未上市前的公司股份),就賺梗。這批原始股,就是指俊文世家的股票。他又誇誇其談,俊文世家已有多個可擴大發展再上市的項目。「我哋手頭有七個項目,其實三個已經開始咗。第一個 Fovea Jewellery,我哋喺 The One二樓有鋪。第二係夜場 Fovea Club,喺中環 California Tower。第三個項目是代理 Apollo S跑車。有咩咁犀利?由起動至一百公里,只需三秒,是世界上最快,售價是一千六百萬元人民幣。」

水哥見部分正抄 notes的師奶、眼神充滿疑惑,又再說:「係﹗過去有好多做得好大嘅公司,都上唔到市,但我哋對幕後庄家兆華集團有信心,佢十三年來,上咗三十幾隻股票未輸過。」他爆出集團牽涉的股份:「 8269(富譽集團)一○年上市,隻股做乜?公仔麵廠。成間廠由經理到掃地得九十人,市值唔夠五百萬。當日我哋拎住十萬元投資 8269,一上市升二點四倍,執到二十四萬。唔好隨便掉咗佢喎,一路買落去。第二隻 8218(毅高國際),一三年上市,六毫子上到二個八,四點六倍。呢兩隻好陌生? 8363(爵士芭蕾舞學校),一四年上市,好多人都識。喂,跳吓舞又話上市。但好嘢,個六幾升到十一個三,八倍。」

黃夏蕙與其丈夫潘炳烈(右二)獲邀出席,事後黃夏蕙向記者表示完全不知當晚是介紹投資產品,「有人叫我睇車同食飯,我真係唔知個晚宴搞乜㗎,投資?邊有錢咁易賺㗎?我覺得搵錢要用實力!」

俊文世家是這架 Apollo S跑車的「非獨家副分銷商」,早前在啟德郵輪碼頭大搞車展,職員指這部車售價一千六百萬元人民幣,公司要上市的話:「賣十架條數都喺度。」

驅進「衰咗原銀奉還」

水哥應是俊文世家的市場部高層,他主持的簡介會只有二十分鐘。會後,再有職員把參與者分成幾個小組,進入不同會議室,這時才交代投資股份的細節,並由叫 Alan的下屬接力,「兆華(背後庄家)對港交所批核好熟。將鑽石業務上市,港交所會問你貨源穩唔穩,公司考慮到呢點,已經買咗間廠。唔止,港交所又會問埋廠嘅貨源,我哋喺南非又買咗個礦。」講到「無雷公」咁遠,無從稽考。為證明有幾真,他又說:「上市要有個做過呢行嘅 CEO,我哋請埋前謝瑞麟 CEO過來,兆華集團為保證項目可以上市,做咗很多前期功夫﹗」翻查謝瑞麟年報,謝瑞麟 CEO謝邱安儀並沒有離任,而 CFO黎子武剛於八月以私人理由辭任,他向本刊否認有加入此集團。

Alan又說,他們今次要上主板,集資共十五億元,其中十億由大行及老細負責,他們只賣五億出街,「一手係十萬元,每手有一萬股公司股份(俊文世家)。」記者說十分有興趣,但擔心安全性,他說:「我哋會打釐印,合約寫明,如果一七年十二月三十一日都上唔到市,我哋原價收購。如果做唔到,可以告我哋。」其後他們給記者看其他人已簽的合約,可見合約中寫明分期付款數額,以及相關條款。

車展後,在啟德郵輪碼頭內的酒樓筵開五、六十圍,更有不少內地人乘搭直通車前來出席。

根據一份由俊文世家職員提供的合約,列明如一七年十二月未能上市,公司將原價回購所有股份。

除了珠寶及跑車,俊文世家指項目包括夜場 Fovea Club,職員指裝修都花掉幾百萬。翻查租約,由兆華集團老闆張兆沖擔任董事的公司負責簽約,月租一百萬,簽了三年。

拋錨「碌卡可以造數」

當日職員未有「強迫入股」,眾人各自離去。一開始負責帶記者的 Tommy,見記者猶豫,翌日再私下聯絡。不過 Tommy本身只是在朋友公司賣寵物用品,坦言加入買俊文世家股份,希望刀仔鋸大樹,介紹客人又有佣收。他對計劃一知半解,故帶來其上司周姐到酒樓詳談。周姐竟大爆「造數」秘密,「 Fovea淨係香港,一年賣得幾多鑽石?我哋喺澳門開咗分店,嗰邊最主要做乜?賣珠寶?最主要係碌卡。

「有好多內地人賭錢輸咗,之後想翻本,係咪要攞張信用卡去碌呀,想套現呀!例如我呢個茶壺,你想碌幾多?唔會碌一、兩萬,碌親都碌一百幾十萬。買完個茶壺,你可唔可以唔要,再賣番俾我呀?我就俾番錢你買番個茶壺囉。咁做唔係為點數,係要做大條數。港交所唔會真係睇你做唔做到生意,係睇賬面數!」

Fovea Club經常出租場地搞 show,早前有「綠魔」稱號的形象顧問 Karl Hui(中)與 model一同出席活動。

俊文世家旗下的 Fovea Jewellery在 The One有門市,但較似 showroom,記者觀察多次都不見有人幫襯。

涉非法集資 遲早「擱淺」

本刊追查俊文世家背景,並無在香港公司註冊處登記。不過今年四月,疑有關連的富譽控股( 8269),曾發出通告,指已找來 Zega Larry公司(俊文世家英文名),作為旗下跑車 Apollo S的副分銷商,並給予服務費。通告指俊文世家在塞舌爾共和國註冊,真正無雷公咁遠。而在中環的 Fovea Club,前董事登記正是富譽控股主席黃家華,可見兩者關係密切。職員口中經常提到的庄家「兆華集團」,應是指黃家華及另一人張兆沖。張今年四十歲,他除了是 Fovea Club董事,亦是樓東俊安( 988)及永興國際( 621,現名為壇金礦業)前股東。黃、張兩人分別報住跑馬地比華利山及半山雲地利道。

記者亦到過職員聲稱的項目視察虛實,在 The One的 Fovea Jewellery,只得一個職員,並無招呼進內的顧客,似 showroon多過做生意。號稱全球最快的 Apollo S,有否生意無從稽考。而俊文世家與另一家上市公司俊文寶石( 8351)名字相似,今年二月,俊文寶石曾發通告指,「該公司並無授權俊文世家讓公眾人士投資或認購股份」,撇清兩者關係。至於兆華集團曾牽涉的上市公司,部分已經「冧棚」,包括富譽控股,上市至今已跌了八成。記者曾到該集團查詢,但未獲回覆。

一名手持幾隻殼股的庄家說:「佢哋太大膽喇﹗我哋要將隻殼搞上市,一定係搵包銷商幫手搵人頭,出事風險細好多。除非佢嘅 project太爛,爛到無包銷騷佢。」俊文世家疑幻疑真,律師陸偉雄聽完這個故事,便搖頭嘆息,「真係橋唔怕舊,最緊要受,佢捉到人嘅貪心。」他指這類投資產品須向證監會攞牌,否則屬非法集資。而集團職員聲稱一定可上市,及澳門碌卡造數,亦犯上串謀詐騙及使用虛假文書等罪。他指做大律師多年,過去見過不少人被騙買原始股,最終化為烏有。他說:「無嘢係一定上到市,佢話上唔到俾番錢你啫,但間公司清盤,你告得邊個?」

過去兩年愈來愈多創業板股仔上市,一三年十月,一日內有六隻股票上市,其中三隻都是配售股,當中的毅高(右下為主席勞炘儀),俊文世家職員聲稱其背後老闆有份。

俊文世家的晚宴上,參加者夾錢「集資」數萬元大獎,但最終只有一位幸運兒。這種金錢遊戲,輸錢的機會遠超贏錢。但為搏一個機會,大家都願意參加,正是這個投資計劃的寫照。

後記:證監會繼續官腔

記者本週一早上,致電及留言予證監會傳媒部門,希望向證監會了解這些投資計劃的問題,但一直未獲回覆,下午再致電一般查詢熱線,對方稱一定要找傳媒部門作答。惟記者表示,想「降低要求」,只是先了解什麼是非法集資、在香港賣原始股是否犯法等問題,對方都說不能回答。記者指有人正向本人推銷,急需了解這些「黑白分明」的條例定義,對方仍一味推說不能回答。本週二,傳媒負責人終於回覆了七個字:「個別事件不評論。」態度官腔,難怪光怪陸離的投資局,繼續明目張膽,亦繼續有人落疊。

撰文:財經組

攝影:財經組

攝錄:財經組

資料:財經組

news@extdigital.com.hk


鍾意就快D Share啦!