網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年12月3日 星期四

股壇長毛叫中央「埋單」 [壹週刊 - 1343 - 財經] __,長毛,梁國雄,M1,DavidWebb

高鐵超支猶如無底深潭,納稅人唔嬲就假。中環人語股壇長毛叫中央「埋單」港鐵(66)星期一出通告,擬向股東派發逾$257億特別股息,政府作為大股東可分$195億,近乎彌補高鐵超支費用。通告一出,全城鬧爆港鐵玩財技。小宗搵來正義嘅化身──「股壇長毛」評評理。DavidWebb試過鬧港鐵唔公布韋達誠離任,係管治差,又話起高鐵浪費公帑,但今次佢唱反調,撐派息對小股東仲好。David叫政府出租高鐵俾大陸,做收 ...


高鐵超支猶如無底深潭,納稅人唔嬲就假。

中環人語

股壇長毛叫中央「埋單」

港鐵( 66)星期一出通告,擬向股東派發逾$257億特別股息,政府作為大股東可分$195億,近乎彌補高鐵超支費用。通告一出,全城鬧爆港鐵玩財技。小宗搵來正義嘅化身──「股壇長毛」評評理。 David Webb試過鬧港鐵唔公布韋達誠離任,係管治差,又話起高鐵浪費公帑,但今次佢唱反調,撐派息對小股東仲好。

David叫政府出租高鐵俾大陸,做收租佬。

David Webb認為港鐵作為一隻公用股,資本負債比率好低,今次舉債派息,有助提升將來股本回報。但佢就認為,派息應該係無條件嘅,唔可以同增加撥款作「捆綁式銷售」。既然超支已成定局,長毛提出咗個解決方案。佢認為將來高鐵落成後,若果港鐵以拆賬方式,將收入同內地分賬嘅話,香港段只佔二十六公里咁短,分得嘅錢會有幾多?佢建議索性將香港一段,長期租埋俾中央政府,做其收租佬好過。計小宗話,呢筆蘇州屎從來無人認頭;以後納稅人經過高鐵,只剩「眼寃」兩隻字。

金融逍遙客:最賺錢的私募項目

游走於中港台併購、私募投資的金融多棲動物,現為多間上市公司主要股東及董事

早輪的 A股股災、港股下挫,以至從石油、黃金及大宗商品近年都大幅縮水,連堅挺的香港地產也開始回軟。其實近年炒得熾熱的私募投資( PE)也聞到燶味,特別是各種各樣夢幻估值的泛互聯網項目。剛 IPO的美國移動支付公司 Square,上市前一輪投資者以 60億美元入股,準備等 IPO時食胡,奈何音樂椅已停,幾經辛苦上市時, Square只值 27億,跌咗足足 56%!

二級市場與私募市場是麵包與麵粉關係,而家已陸續出現麵包平過麵粉。這兩個市場圈子楚河漢界,分工明顯,各專攻一瓣,很少見到兩者皆精之士。逍遙客算是游走二者之間,但僅掌握少少基本功,也有幸與兩行業中頂尖高手為友,年中都有機會研究唔少得意 project,有好項目老友也經常帶逍遙客入局。年末,與北京著名天使投資者入股的一個教育 app,入股唔夠半年就被大眾點評以五倍收購。天使階段,即係金額大極有限,但論 IRR(內部回報率)就創逍遙客紀錄。

半生從事投資,驚覺其分工愈來愈細,亦愈來愈專業, 20年累積下來的經驗也愈來愈唔夠用。有樣嘢所有學校都冇教嘅,但逍遙客覺得最有用的,就是怎樣交朋結友,充分運用身邊親戚、同學、朋友資源。要學人做吓天使, VC或 PE,甚至做吓其他生意仔,人脈圈子往往是決定性的。自己唔叻嘅嘢,若能搵到叻人指點吓,效果完全唔同。所謂三人行必有我師,逍遙客認識各門各派金融高手大多性格怪異,你識邊個唔係重點,重點係,呢啲怪異叻人連埋堆都唔容易,又點解會幫你?教育局唔好成日諗諗埋埋啲折磨死學生嘅 TSA,如果識得開個人際關係科,肯定令香港學生將來競爭力大增!

中環寸嘴:出年見萬四點喎

呢度啲雲吞麵麵底夠幼,細蓉食三碗都唔飽呀。

工廈大王楊耀松長子,是各大有名食肆之 VIP,喜歡研究城中有錢佬對食之要求,透過美酒佳餚,察看人生百態,讓讀者「嗒」落有味。

我唔介意分享炒股錦囊,不過我唔係好似大部分香港人,睇單邊買實股等升,我跌市都要諗辦法賺到錢,所以最緊要睇通攤路。

上個禮拜五,恒指跌四百點,唔係我牙擦,投資呢家嘢除了配合天時地利人和,有時要加埋術數,我有幾個老友仿效中信里昂年年都講風水指數,醒咗我一個錦囊,我又唔介意同粉絲「些牙」吓嘅。嗱!講咗十一月八日到十二月六日,股票大跌,仲有天災甚或大地震;巴黎恐襲後 IS講明會再嚟料,股市想好都難。投資嘅嘢要睇攤路,家陣投行啲 view point日日轉,我攞住呢個錦囊慳番唔少精神呀!出年仲大鑊,估會跌到 14,000點喎!

其實,行出條街都 feel到市道唔好,上個禮拜,去麥兆記整碗雲吞麵做下午茶,嘩,連雲吞麵鋪都促銷禮券,買滿六嚿水送一樽蝦子。生意唔好,多啲 marketing channel冇壞嘅,尤其呢啲嘢老式人先食㗎咋!

市道唔好,搞慈善班友都要勤力啲,早排喺機場撞到公益金個 CEO,係咁𦧲我買枱,支持吓喺禮賓府舉行嘅慈善晚宴,買枱唔難,唔係咁多人鍾意去,有個法國勃艮第酒莊嘅吳志誠贊助成場紅酒,佢阿哥坐埋我嗰枱,都算俾面又俾錢。

鄭建明被追數

鄭建明電話關機,債主惟有出絕招

中環街頭不時被借用來追數,今次主角輪到順風清潔能源( 1165)老闆鄭建明。「債主」十分用心,棄傳統街招,改用成本高好多嘅易拉架,除咗有鄭建明嘅高清靚相,仲清楚列出佢持有嘅上市公司。同鄭生有過數面之緣嘅小宗,即刻打俾佢問候吓,但其內地手機一直維持「關機」狀態。老友即笑謂:「如果搵到就唔使擺易拉架」兩年前,媒體踢爆鄭建明的生意拍檔是太子黨耿志遠,而耿相信是習派親信。但咁唔代表一切順風順水,年中時,鄭建明先被懷疑用順風股份「對賭」或押股,另外收購榮暉( 990)亦被港交所封殺。跟咗佢上船嘅小散戶,要自求多福了。

端傳媒遲出糧

今年成立的端傳媒,當初大灑金錢,最近已要縮皮。

最近端傳媒嘅揸弗人,同隔籬位仁兄一樣,被踢爆同習總好有關係;唔知係咪身份曝光,上面閂水喉呢?有端傳媒嘅員工報料,話佢哋十一月嘅糧仲未出。過往佢哋出糧都好準時,但十一月糧到本週二( 12月 1日)都未出,公司解釋話轉賬系統出現問題,會喺本週三出。不過員工都好懷疑,其中一個員工話:「一路公司都好大使,但最近同員工講要慳啲,亦唔再請人。之前請咗個 full time,人哋辭咗份工過來,竟然要佢轉 part time。」近排有台灣投資者去端傳媒 office參觀,個個員工都打醒十二分精神,認真工作,希望能逃出生天!

鍾意就快D Share啦!