星期日，林峯去機場會合女友，之後一齊飛去英國過他 36歲生日。
娛樂偵訊
同 BB飛英國過生日 林峯顧住拍拖唔願做
林峯同拍拖三年的吳千語愈來愈恩愛，星期二（十二月八日）是林峯三十六歲生日，壽星仔特登推晒所有工作，再幫女友請定假，雙雙飛去英國過二人世界慶祝。
其實自從林峯約滿大台轉投英皇後，事業心明顯放輕，終日沉迷拍拖，在整整一年內只拍了一部大陸劇，甚至連今個月中開拍的《使徒行者》電影版，林峯寧願拍拖都唔想拍戲，一口推掉。
請假拒宣傳
剛剛生日滿三十六歲的林峯，自從同他口中好愛、好愛……的千語 BB拍拖後，便戀愛大過天，最近剛剛有新歌派台的他，為了同女友一起過生日，他竟向公司請假暫停宣傳，更幫身在泰國拍電影《賞金獵人》的吳千語攞假，一齊飛去英國過二人世界慶祝。
星期日（十二月六日）傍晚七時，吳千語由泰國返回香港，她留在機場禁區內沒有出閘，到晚上十時林峯與一名女助手抵達機場，行李由女助手負責攞住，林峯兩手 fing fing兼 chok住行埋去櫃枱 check in，辦理完登機手續後，便心急入閘會合女友。
據知，雖然今次英倫之旅是慶祝林峯生日，但所有使費及安排均由林峯全權負責，吳千語只負責決定目的地，他們會在英國逗留五天，因為之後吳千語要返回泰國繼續為電影開工。
唔想做配角
其實林峯過檔英皇後，應女友要求大幅度減產，將更多時間用來拍拖，他簽了英皇整整一年有多，只拍了一部大陸劇《六扇門》，原本電影版《使徒行者》預埋林峯演出，做番「爆 Seed」一角，不過當林峯知道部戲會在聖誕節期間開拍，隨時打亂他同 BB外遊過節大計，於是決定推戲唔肯接。
「其實令到阿峯唔接呢部戲，除咗阻到佢同 BB拍拖之外，因為部戲會有古天樂、張家輝、吳鎮宇一齊拍，條數點計，阿峯只會係配角，所以索性唔拍，同 BB拍拖好過。」林峯身邊人說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
