2015年12月16日 星期三

大開支 撲水打官司 晒 bra江若琳唔敢再簽經理人 [FACE - 447] __,江若琳,MF,

成立自己工作室後,廣告商親自聯絡江若琳傾合作,慳番大筆經理人佣金!真面目大開支 撲水打官司 晒bra江若琳唔敢再簽經理人江若琳去年與前經理人公司寰宇老闆林小明反面,被控違約,官司上年9月開審,搞足1年幾仍未解決。打官司等同燒銀紙,江母為幫愛女籌錢不惜賣物業套現,江若琳亦狂接job撲水,在內地接拍多套電影又積極出騷,大小通殺。日捱夜捱都未夠俾律師費,見過鬼怕黑的江若琳早前為新廣告露bra上陣時,講明 ...


成立自己工作室後,廣告商親自聯絡江若琳傾合作,慳番大筆經理人佣金!

真面目

大開支 撲水打官司 晒 bra江若琳唔敢再簽經理人

江若琳去年與前經理人公司寰宇老闆林小明反面,被控違約,官司上年 9月開審,搞足 1年幾仍未解決。

打官司等同燒銀紙,江母為幫愛女籌錢不惜賣物業套現,江若琳亦狂接 job撲水,在內地接拍多套電影又積極出騷,大小通殺。日捱夜捱都未夠俾律師費,見過鬼怕黑的江若琳早前為新廣告露 bra上陣時,講明唔會再簽經理人,自己揸 fit,「𠵱家成立咗自己嘅工作室,今日唔知聽日事,最緊要未雨綢繆!」

28歲江若琳去年同前老闆林小明爆出合約糾紛,林小明堅稱江若琳仲有 5年生約未完,而江若琳則哭訴 10年內喪做得個桔之餘更倒欠公司 200萬,於是發律師信要求解約。

連續兩年做化妝品牌做代言人,江若琳話好多謝廣告商雪中送炭,唔理佢有官司在身都照用。

一度係林小明(右)愛將嘅江若琳,估唔到搞到要打官司先解到約。 《忽然 1周》圖片

雖然日捱夜捱,但江若琳算 keep得唔錯,不至於早熟早殘。

打官司用過百萬

要解決羅生門惟有法庭見,為應付 7位數字律師費,江若琳壓力一度爆煲患上抑鬱,晚晚失眠。「打官司到呢刻已經用咗過百萬,呢年幾大家都知我跑山跑海跑江湖都好辛苦,每一分每一毫咬出嚟都係有血有汗!」

血汗錢唔易搵,為免歷史重演再被抽乾,江若琳決定自己成立工作室,唔再簽經理人公司。冇靠山冇背景的江若琳,甚至在微博「工作聯繫」一欄直接寫上自己電郵地址,一條龍撲水。

拍廣告當日,大感冒嘅江若琳吹風吹到差啲暈低,要狂飲紅棗水先回復元氣。

江若琳上年去倫敦學戲學上癮,今次再次報名上堂,過埋除夕先返港。 網上圖片

戲接戲嘅江若琳,上年年尾同台灣型男賀軍翔(右)拍《我愛費貝勒》,仲傳出緋聞。 網上圖片

執馬賽二攤

接 job靠自己,幸好江若琳同廣告商關係唔錯,即使有官司在身,仍獲化妝品公司續約做代言。難得有人撐,江若琳今次搏到盡,罕有剝剩黑 bra大露背,拍攝當日仲帶病上陣,差少少暈低入醫院!

除了廣告,內地唔少劇組都愛用江若琳,「呢段時間我拍咗 5套戲,嚟緊 1月又要開新戲。」今年中江若琳同馬德鐘、向海嵐接拍汪子琦執導電影《愛在星空下》,被指係執馬賽二攤,不過片酬有 7位數,執幾多攤又有乜所謂!

喺微博寫自己個 email做工作聯繫,真係好少有! 網上圖片

除咗北上賺人仔,江若琳唔使開劇就會返香港出騷,工作機會一個都不能少! 《蘋果日報》圖片

下年再出碟

江若琳 07年出道做歌手,曾經攞過唔少新人獎,可惜多年來冇 hit歌,只出了 5隻大碟後就無以為繼。雖然拍戲先搵到真銀,但江若琳好想重返樂壇,「自己離開咗樂壇 3年,呢個夢想其實一直放唔低,希望下年可以出一張真正屬於江若琳、可以同大家分享心路歷程嘅唱片!」

07年同屆新人有洪卓立(左一)、陳柏宇(左二)及鍾舒漫(右二)等,可惜四個都未能上到一線,陰功豬! 《蘋果日報》圖片

江若琳入行前唱功極幼嫩,曾學 Twins唱〈女校男生〉喪走音,俾人笑到面黃! 網上圖片

江若琳出過 5張大碟, 12年《天空之樹》後再冇出碟,難怪心郁郁想重返樂壇。 網上圖片

採訪、撰文、攝影:娛樂組


鍾意就快D Share啦!
Related Posts Plugin for WordPress, Blogger...