掃呢頁CODE去手機

2015年12月9日 星期三

哪一天撻着蘇麗珊 游學修:佢唔係嗰啲唔痾屎嘅靚女! [FACE - 446 - 專訪] __,痾屎,MF,

真人騷哪一天撻着蘇麗珊 游學修:佢唔係嗰啲唔痾屎嘅靚女!話說訪問的那天,剛好就是游學修和蘇麗珊戀情曝光的一天。我們一邊拍照,一邊翻報紙想看看報導內容,卻翻呀翻,翻來翻去都是50歲阿黃和27歲𡃁模的花邊,是的,同一天,也是天王城史上第一遭公布戀情那一天。游學修如釋重負:「呀……好彩俾郭富城冚一冚啫……」我笑咗,笑他不知天高地厚拿自己跟城城比,也笑他竟然不想上頭條很傻很天真。是真的,一部《哪一天我們會 ...


真人騷

哪一天撻着蘇麗珊 游學修:佢唔係嗰啲唔痾屎嘅靚女!

話說訪問的那天,剛好就是游學修和蘇麗珊戀情曝光的一天。

我們一邊拍照,一邊翻報紙想看看報導內容,卻翻呀翻,翻來翻去都是 50歲阿黃和 27歲𡃁模的花邊,是的,同一天,也是天王城史上第一遭公布戀情那一天。

游學修如釋重負:「呀……好彩俾郭富城冚一冚啫……」

我笑咗,笑他不知天高地厚拿自己跟城城比,也笑他竟然不想上頭條很傻很天真。

是真的,一部《哪一天我們會飛》跑出三個新演員,就數讀演藝出身、兼為 CA:P Tv主腦、亦為傳媒機構拍短片的游學修瓣數最多、想法最多。他的諗頭並不是怎麼讓自己上位上頭版,而是自己得到了,該怎麼扶別人一把,讓別人也得到。

拍電影,他向導演推薦幾個演藝學院師弟演蘇博文一角,其中一個就是吳肇軒;做訪問,他會無緣無故提起導演上部作品《狂舞派》,說除了大紅的蔡翰億和顏卓齡,其實還有一個被遺忘的楊樂文;不只會說,他還確實靠一己之力拍了一段年輕版英仁同學會聚頭短片,旨在讓觀眾除了彭盛華、蘇博文和余鳳芝,亦認識其他在戲中不太起眼的年輕演員。

也才 25歲,也才剛剛起步,我是真的覺得游學修說得出以下這番話很了不起:「我覺得做人要係咁,喺未仆嘅時候就話定俾自己聽一定有機會仆,一定要提醒自己有機會打回原形……係真㗎,太多比我叻嘅人都苦無機會,我有機會做男主角,都想幫佢哋製造機會俾人認識。」

不過始終還只有 25歲,當和戲裡的對手蘇麗珊撻着,才熱戀幾個月,還是會面紅,還是怕說錯話會惹女朋友生氣:「唔好叫我講佢,唔好叫我扮佢佢實嬲㗎!係呀,我好冇鬼用㗎!啲人話靚女唔痾屎㗎嘛,總之佢就好真實,唔係嗰啲天上至有、唔存在嘅靚女囉!」

明白了,這個靚女會痾屎吖嘛!等睇訪問出咗之後游學修俾蘇麗珊扭耳仔!

最後限期,係 2015。

呢種咁鍾意吹嘅性格係由幾時開始?

小學㗎喇!好多人估唔到,我屋企其實家教好嚴。我睇完套張達明扮律師嗰套電視劇,覺得好正,好鍾意扮佢成日駁嘴,又攞阿媽把扇喺度撥下撥下扮狀師,嘴 gel gel咁講好多嘢,自此以後阿爸覺得我會學壞,就唔再俾我睇電視。

冇得睇不如自己吹?不如自己創作?

細個係貪玩,真正自己創作係中六喇……入咗 drama club,開始覺得自己好勁、好叻,於是自編自導自演咗一個舞台劇。概念嚟自一套電影,講一個人不停重覆同一日嘅經歷,領悟咗啲人生道理。

爸爸媽媽係做咩行業?

爸爸喺機場揸車,冇錯喇,就係車行李、車飛機餐嗰啲,我阿媽好複雜㗎,又做 part-time,又返下醫療輔助隊。我仲有一個細佬,細我五年,𠵱家跟咗我爸爸一齊喺機場做嘢。有時我拍片,佢都會幫下手,佢都好有興趣。

咁屋企住喺邊?喺邊區長大?

屋企就住屯門,但我𠵱家同幾個朋友喺觀塘有個 studio,住觀塘多。所謂嘅住,其實都係「抦」埋一邊打地鋪,嗰度得幾百呎地方,又殘又舊,四個男仔污糟邋遢咁。

幾多錢月租?拍咗一套戲,又兼職 CA:P Tv,夠唔夠你交租養自己?

我有 full time做創作有底薪,一定唔係多,但係都仲頂到自己。屋企嗰邊我有溝通過,開門見山同佢哋講,做呢行短期內都唔會好穩定,我暫時俾唔到家用,但係俾埋呢一年時間我……呢一年即係講緊 2015年,如果都係唔得,就做少呢啲呢行,我應承咗佢哋,出年會俾家用。

而 2015年,你係有計算《哪一天我們在飛》在內嘅?

呢套戲一直係我計劃之一,爆唔爆到我計唔到。我上年暑假拍咗呢套戲,預計到上畫時一定會對工作有影響,亦都預咗套戲毫無影響……今時今日一啲都唔奇,套戲上完任何聲氣都冇……所以我叫屋企人,點都俾我等埋呢年,睇下係唔係仲值得等落去。

結局呢?套戲成績咁好,前路係唔係豁然開朗咗?

係嘅,我多咗一個經理人約,短期之內工作機會真係多咗,但係唔係等於我三個月、半年後都仲有嘢做……又唔係喎。亦都有好多個 casting,大製作嘅小角色,同小製作嘅男主角都有,不過全部都未有回音。我自己真係好期待快啲落實,有下一個角色……唔使擔到正一正,我淨係想知游學修仲可以喺銀幕出現。

唔想仆,但要有仆嘅心理準備。

演員去 casting可唔可以進取啲呢?你有冇好似上次 casting《哪一天》咁,好宮心計咁帶埋套校服?

帶校服唔係我諗到㗎,係有位前輩提點我㗎……嗱,我又覺得宮心計同表現誠意係兩樣嘢,再講我真係諗唔到,都要人提。再講就算可以計,呢個世界邊度咁多戲有導演公開 casting㗎!

你 casting前知唔知係做少年林海峰?

唔知㗎……再講由細到大俾人話似周杰倫就有,林海峰又從來都冇。演員係被動,但都有得進取,好似我喺 CA:P Tv可以搞笑,學舌鳥諷刺時弊就需要更多演技,都係一個機會展現俾人睇。苦無出路嘅時候,好彩𠵱家網絡都有平台。 casting好難𢱑,都冇得宮心計,都要講適唔適合。

個頭開得咁好,你個年紀又正好年少氣盛,有無想像到自己未來二、三十年可以行到去邊?

我鍾意嘅同我想做嘅又係兩樣嘢喎,我鍾意劉德華,但我點都唔會係劉德華啦,係唔係先?佢太 perfect太靚仔!我都鍾意梁朝偉,但又冇佢咁 deep咁有氣質,真係有機會行到嗰一日,我希望可以做青雲,可以做家輝。

《哪一天》其實講緊夢想同現實嘅分別,你怕唔怕呢?𠵱家雄心壯志,但實情成長以後唔係嗰樣嘢?

我都怕㗎,唔係怕磨蝕自己,係想像唔到自己有朝一日會冇咗火、冇咗目標。好怕三十幾四十歲,見到原來已成定局,唔係家輝就唔係家輝。我覺得做人要係咁,喺未仆嘅時候就話定俾自己聽一定有機會仆。到仆嘅時候先至調整就有排搞,不如喺呢一刻爬嘅時候,就講定俾自己聽隨時冇得爬,一定絕對要提醒自己,可能會乜都冇,可能隨時打回原形。真係㗎,太多比我更叻嘅人連我嘅機會都冇,所以我好希望觀眾都可以認識我哋三個以外嘅人,所以我拍咗嗰條片,年輕版嘅英仁同學會聚會。

我有睇條片,但係唔知原來你拍條片係呢個用意?

我有機會做主角,我都希望佢哋有呢個機會。所以我好唔鍾意用呢個字,話自己「捱」過,我盡量唔用呢個「捱」字。我真係好好彩,上年一畢業就有得做呢套戲,呢一行個個都捱,佢哋都未呻,幾時輪到我話捱?

蘇麗珊好易嬲,我好冇鬼用!

其實你哋四個男仔屈埋喺幾百呎工廈,咁又點帶女仔上去呢?

佢哋帶女仔上去,會講聲先,咁我哋就會迴避㗎喇……哈哈……

你同蘇麗珊拍拖,開始咗幾耐?

好多人唔信㗎,覺得我哋做新聞……睇落係唔係好似做新聞?我都唔知吖……係做都唔係𠵱家做,套戲都上咗四個禮拜……拍緊戲時冇一齊,係唔係有第二個?唔好講得咁 detail,總之就有其他人啦……我哋真係一齊係今年暑假。我唔講得太多,講得太多會俾人鬧,會俾佢(蘇麗珊)鬧㗎!

你話拍戲時好專注,咁到底點由拍戲變朋友,然後跨過嗰步做咗情侶?

循序漸進囉……哈哈……好尷尬吖講呢啲……即係有一個地步,有一晚我哋兩個攤出嚟傾囉!

攤出嚟傾?可以點傾?

咪討論下呢件事囉……嗰日係嘈緊第二啲嘢㗎,嘈完就順便問埋,咁我哋係唔係算係拍拖㗎喇……

我前兩個星期都有問過黃修平導演,既然係初戀,既然愛到咁,彭盛華點解俾自己出軌,你覺得呢個係咩心態?

你諗下,佢哋識咗廿年,唔短時間。佢係俾生活磨蝕咗,覺得人生無晒火花……工作遇到一個女仔,就係俾到啲火花同化學作用,唔係新嘅火花,係提番佢廿年前火花,食到應一應喎!又唔係情有可原,但係可以理解。呢個位好尷尬,可以理解,又唔同可以體諒喎!咁出軌就係出軌,出咗軌就冇得救!

你有冇試過呢?一腳踏兩船?

冇喎!我最長拍拖都係一年,拍過四、五次拖,我試過讀緊中學時,鍾意咗第二個就會同前一個分手。我覺得一腳踏兩船係一種天賦,同時鍾意兩個人唔係個個都得。

扮演蘇博文嘅吳肇軒同你 friend唔 friend?佢會唔會現實都鍾意蘇麗珊㗎?

吳肇軒係我演藝師弟,本來都係打過招呼啫,跟住我 casting成功咗呢套戲,導演問我有冇人介紹,跟住我醒起佢,同埋兩三個同學,估唔到導演最後真係會用咗佢。梗係冇大家千祈唔好入戲太深,吳肇軒點會鍾意蘇麗珊?

吳肇軒現實係唔係都係斯文型小出聲?你肯定冇奪人所好?

絕對唔係!好多人俾佢呃咗,你知唔知好多人話現實我哋兩個調轉㗎!我平時份人唔出聲㗎,吳肇軒好煩好小朋友,我哋要不停鬧佢至同佢做到 friend。我未試過,幾男鍾意一女,都覺得個校花靚就試過。其實搞到兩男追一女呢個局面真係唔容易,事實上你知個 friend係鍾意,又點會叉隻腳落去呢?

蘇麗珊係個點嘅女仔?你最愛佢邊一面?

佢比鏡頭麻甩好多,好直率,佢好易醉,一醉就好攪笑。啲人話靚女唔痾屎吖嘛,佢唔係天上至有嗰啲唔存在嘅靚女,佢真實感好強。

你可唔可以扮嚟睇下,佢飲醉酒係咩樣?

唔好唔好扮佢佢陣間又嬲我喇!我冇鬼用㗎!

咁你讀戲劇㗎嘛,不如扮佢最 lovely,令你無力招架嗰面啦?

哦……嗰啲唔扮得㗎……因為嗰一面只能夠俾我一個人睇到咋……哈哈。

新人是原罪?

訪問第二天,游學修在面書發 post,這麼說:

說的當然不是我,不過我也想替行家說幾句好話。

老實說,握不握手是個人習慣,倒不見得是挑人來握。

係游學修諗多咗,定係個人太有火?

我想說,游學修是比一般的新人有火、有諗頭,不過有時候停一停,諗一諗,唔使下下講到原罪嘅!

神同步惡搞(YouTube畫面)

真的戀愛了

hehe賀千萬(網上圖片)

學舌鳥骨幹(YouTube畫面)

能直亦能攣 微電影《愛.不愛》

CA:P Tv主腦(YouTube畫面)

撰文:朱小博

攝影:范仲良

形象: Bryan@the Flaming

服裝: Mr.Collection


鍾意就快D Share啦!