賭王三房千金何超蓮同內地百億家底富二代劉根森（Sam）暗撻，聖誕夜喺中環玩AIA歐陸嘉年華，雖然超蓮就解話同Sam係「普通朋友」，仲話係同一大班菁英會朋友一齊去玩。超蓮唔敢認愛係明嘅，畢竟佢同吳克羣分手都唔夠1個月，想低調處理感情事係合情合理。據悉，超蓮今個聖誕去咗澳門同一大班朋友倒數，當中包括Sam，本報讀者余小姐透過「爆相爆料」提供咗一張佢哋拍拖相，原來佢哋晏晝先喺珠海玩咗一輪，現場所見當日3、4點，超蓮同Sam二人世界去咗橫琴海洋王國玩機動遊戲，當時Sam負責睇地圖，之後就一齊去咗排隊玩過山車，之後就急急腳會會合排緊隊0既朋友仔。之後，佢哋衫都冇換，原班人馬夜晚返到香港去嘉年華玩第二場。一向童心嘅超蓮真係玩機動遊戲玩唔厭，兩場都同Sam一齊玩，將聖誕呢個機會畀晒對方，咁狂追佢嘅霍啟山會唔會好葡萄？！超蓮同Sam除咗一齊過聖誕，原來之前仲喺IG互相傳情，超蓮喺1個半月前擺咗張賭王老竇17歲嘅靚仔相，跟手Sam亦post咗張阿爺相，tag了超蓮談情寫上：「你有帥爸 我爺更帥！」而超蓮亦有回Sam：「還是我爸帥。」計返時間，超蓮仲未同吳克羣正式分手，估計二人當時尚未奉撻着。另一邊，爆出Sam戀上超蓮新聞後，亦有讀者翻佢舊帳，提供了一張舊年佢仲喺波士頓大學，當時陪女友影畢業相，不過據悉二人已分手，才有機會今個聖誕係超蓮身邊「做兵」。唔知超蓮係咪好緊張同Sam新聞，噚日就忽然擺咗一張佢同Sam同埋一大班朋友相，更刻意留言：「鄭重聲明：我們是一大群的好朋友，一起過聖誕，不是單獨約會，沒有發展空間，我還是單身，謝謝。」真係好大陣此地冇銀味，更有網友笑她：「為什麼還特意強調了~哈哈。」
|
鍾意就快D Share啦！
|
|
|
