G.E.M.同阿 Mark之後去到希慎廣場拍拖，離開時他們唔搭𨋢，寧願行八層扶手電梯，沿途講唔停。
娛頭
夜半後門調情 宇宙 G.E.M.強搶 JW富貴男友
「宇宙巨 G.E.M.」鄧紫棋同台灣歌手林宥嘉分手，由情人變仇人後，做過奀星馮允謙同表妹之間的第三者，最終難逃被飛命運；之後向賭王三房公子何猷啟主動求愛，可惜對方唔落疊。
唯我獨大的 G.E.M.最近又再主動出擊，並成功搭上一名有米新歡，兩人秘密拍拖兩個月。筍盤難求！經常要返內地的 G.E.M.，每次返港，必第一時間蒲頭交人。
但原來 G.E.M.新歡 Mark已經名草有主，正印更是同樣是歌手的 JW（王灝兒）， G.E.M.明知對方有女友，照樣強搶。
連衰三鑊
JW同阿 Mark拍拖兩年，但當被記者問到二人現時關係時，她說：「我係 single。（係咪因為 G.E.M.令到你哋分手？）真係唔係。（知唔知佢哋拍拖？）應該唔係囉，我哋成班 friend知道發生緊咩事！」
二十四歲的 G.E.M.（鄧紫棋），歌唱事業紅到直衝宇宙（自以為），但感情就鋪鋪衰！一○年秘戀台灣歌手林宥嘉，拍拖四年，有指是基督徒的她，要保持處女之身，堅拒婚前性行為，導致男友背住她出軌，二人最終反面收場。
對音樂才子情有獨鍾的 G.E.M.，分手後搭上奀星馮允謙，但對方原來有個拍拖多年嘅表妹女友， G.E.M.變成小三，但因相信男方解釋同表妹已分手，兩人繼續發展，二人更將一齊行山拖手相上載 Instagram高調放閃。
點知最近馮允謙突然宣布有圈外女友，公開與 G.E.M.劃清界線，宇宙 G.E.M.再一次被飛。
連番打敗仗！ G.E.M.決定改變口味，轉溝富二代，因為閨密何超蓮關係，有機會親近到何家三房公子何猷啟，經常到三房大宅打躉，借機同猷啟混熟，甚至親自整甜品送上門，點知三房公子嫌宇宙 G.E.M.多是非，落閘拒愛。
拉新歡匿埋傾
眼見好姊妹李蘊閃嫁，超蓮飛甩吳克羣後更加成為富二代（霍啟山、劉根森）你爭我奪的目標，性格唔衰得的 G.E.M.更加不甘後人，主動出擊，最近終於溝掂個陀地闊少，秘密拍拖兩個月。
在剛過去的平安夜， G.E.M.唔返祖國唱歌賺錢，留港瘟仔。化行妝一副戰鬥格，著到紅噹噹會新歡，不過對方就全程戴住口罩，十分避忌。兩人先去開餐，跟住再去碌 lane打保齡。
碌完波已經半夜一點，二人漫步銅鑼灣，而同行的一名朋友更幫眼睇水，留意是否有記者跟踪。行到去時代廣場，一行人企埋一邊傾偈，之後 G.E.M.索性拉住男友，走入時代廣場走火通道防煙門內一個凹位，匿埋依泣談心，至於同行朋友就留守在外，繼續睇水，間中擰轉與二人搭訕幾句，傾了大約半個鐘， G.E.M.因為第二日要早機飛大陸，迫於無奈讓男友送她上的士離開。
明做小三
據了解， G.E.M.的新歡叫 Mark Ngai，二人年齡相若， Mark屋企十分有錢，不過，原來他有女朋友，和女歌手 JW（王灝兒）拍拖已接近兩年。
「 G.E.M.識阿 Mark已經知道佢同 JW拍緊拖，開頭都冇乜嘢，仲成日三人行一齊玩，又一齊去行山，不過玩玩吓， G.E.M.同阿 Mark突然多咗私下聯絡。 G.E.M.覺得同阿 Mark好啱 key，兩個成日講音樂，講講吓講到有晒 feel，佢就主動約阿 Mark單獨出街，阿 Mark又好受落，成日瞞住 JW同 G.E.M.去街。」 G.E.M.身邊人說。
返港即交人
雖然明知男方有個正印女朋友， G.E.M.決定強搶，無畏做小三繼續去馬！日前 G.E.M.從內地返港，回家換過衫後，出車去中環購健康食品，買完就直奔銅鑼灣時代廣場，會合有米仔 Mark，一齊行去希慎廣場，在誠品書店打了一陣書釘，跟住再去搵食醫肚。
離開時， G.E.M.同 Mark寧願由八樓搭扶手電梯逐層落，兩人沿途不停傾偈，更一度行出去商場的空中花園，坐低慢慢吹，但因為花園內人太多，才打消原意。
之後二人發現記者影相， Mark立即急急腳送 G.E.M.上車後，再極速跑回商場，狂奔避追訪。
壹：近排影到你同個男仔成日一齊，拍緊拖？
G：影到我同男仔一齊呀？（皺眉）喺邊度？（俾張相嚟睇）
G：嘩！哈哈哈，呢啲全部都係我哋朋友圈入面，你睇我哋……（咁靚仔無諗過咩？）你睇我哋開聖誕 party，全部大合照入面，喂，唔好將我同我啲朋友每一個都傳緋聞（笑晒），太搞笑
壹：有冇發展機會？
G：梗係……唔會啦，朋友嚟㗎！
壹：知唔知馮允謙有新女友？有冇恭喜佢？
G：（搶答）梗係知朋友嚟㗎嘛！（你識佢女朋友？）唔識。
壹：（被飛）唔會唔開心？
G：哈哈哈，唔好咁搞笑啦你哋。
有米外公
家底豐厚的 Mark Ngai，出身顯赫，外公是現任金融公司老闆王國旌， 81年，曾與大美人關之琳在拉斯維加斯閃婚。 Mark母 Jannine是生意人，與四洲太子女戴凱欣合資開餐廳 Room 28，與眾多圈中人熟絡， Mark亦不時於網上 post明星合照外，亦愛於 ig大晒滑雪、船 P照，典型富二代。
惡啃女友
一向目中無人的宇宙 G.E.M.，得罪前輩甄妮，又在網上寸爆楊千嬅、鄧麗欣冇料到。參加《歌手 2》爆紅後，更加自我膨脹，拍廣告獅子開大口，接商演要求多多，實行「國際式」訪問得罪傳媒。工作上犯眾憎，私下一樣惡頂，同林宥嘉秘交多年，分手後公開插爆對方，反目成仇。
嚴重公主病
身為家中獨女的 G.E.M.公主病嚴重，偏偏林宥嘉性格大男人，拒做受氣袋，拍拖四年，二人經常為小事嗌大交。
拖手騷逼公開
13年舉行的台灣金曲獎，有指當時在台灣知名度麻麻的 G.E.M.，自度拖手騷，焗男友公開戀情，二人十指緊扣行紅地氈，成功騎劫金曲獎。
分手後唱衰
分手後 G.E.M.在私人 fb唱衰林宥嘉，指對方經常在訪問中提她的名字借她宣傳，兼且「從來沒跟我提過分手……原來人家早已在外面風流快活。」直指對方劈腿。
撰文、攝影、攝錄：娛樂組
|
鍾意就快D Share啦！
|
|
|
