Girl's Day四位成員（左起） Yura、敏雅、惠利及素珍寒冷天氣警告下晒美腿，三位成員表現從容，惠利就全程黑面。
外太空
Girl's Day黑面晒美腿
上個週末係香港 59年來最凍，得三度，不過對於韓國人嚟講，可能真係小巫見大巫！韓國女子組合 Girl's Day揀定襲港，所有 fans都包到成隻糉咁樣，佢四個女仔非常專業以性感短裙上陣，見到都覺得凍！不過成員之一惠利全程黑面，莫非凍到笑容都無埋？
出道六年首次訪港
韓流吹襲香港已經好幾年，加上韓國大型頒獎禮 MAMA連續幾年喺香港舉行，基本上大部分當紅韓團總會嚟過香港同 fans見面，唯獨是有一隊，出道六年到而家都仲未到訪過香港，就係 Girl's Day喇！四個女仔終於首次襲港，行程梗係緊湊，先去商場出席新年活動。 Girl's Day一向以性感見稱，以為遇上嚴寒天氣會著厚啲？梗係唔會繼續騷長腿！隊長素珍仲以 lace透視裝上陣， fans當然係尖叫聲不絕。見到 fans咁熱情，四位成員惠利、素珍、 Yura及敏雅不停揮手回應，不過惠利全程零表情，面黑黑，仲以為佢唔舒服。偏偏喺寫揮春環節，惠利寫嘅祝賀語係「笑口常開」，見佢木無表情咁寫，場面真係幾搞笑。之後去到傳媒訪問環節，所有問題都要被經理人過濾先可以答，令現場氣氛非常尷尬，最後喺記者追問下，惠利先話自己唔係黑面，而係因為見到咁多傳媒同 fans，所以緊張得滯！
音樂節延期五月
完成商場活動， Girl's Day馬不停蹄趕去下一個活動。其實佢哋本來今次訪港，係為一個音樂會做嘉賓，不過音樂會因牌照問題，延遲到五月舉行，今次就先做宣傳！ Girl's Day衫都無換，聯同本地樂隊 Dear Jane同 24味出席記招。兩隊樂隊見到打扮性感嘅 Girl's Day，對眼都唔敢周圍望，不過都誠實咁表示好想睇佢哋跳舞。而 Girl's Day轉場之後，似乎心情好咗好多，惠利面露微笑。大會更加安排 fans上台送上蛋糕同禮物，佢哋表現興奮，仲同女 fans抱抱，真係恨死一班台下得個睇字嘅男 fans呀！
李鍾碩蠟像揭幕 旋風襲港
內地自由行旅客不斷下降，各大景點各出奇謀。杜莎夫人蠟像館上年開始設立韓流專區，加入互動遊戲同韓國街景。至於蠟像，今年有一個新成員加入，就係韓流新四小天王李鍾碩！
呢個蠟像係李鍾碩專程飛到去倫敦度身訂造，整個過程長達 7小時，除咗基本度身之外，仔細如眼珠顏色都要配對，非常嚴謹。李鍾碩見到個蠟像已經笑到見牙唔見眼，原來佢話當時工作人員叫佢擺個得意啲嘅甫士，佢就擺 V字手勢、插袋同繑起腳，點知要維持 7個鐘，佢話非常後悔呀！
李鍾碩今次係專程嚟為蠟像揭幕，儀式都只係進行咗短短 15分鐘，佢就閃電走人，唔知係咪忙住拍內地劇，所以要分秒必爭，不能久留呢？
撰文：關錦雯
攝影、攝錄：梁錦波
|
鍾意就快D Share啦！
|
|
|
