掃呢頁CODE去手機

2016年1月21日 星期四

夜蒲女最 like神燈 [壹週刊 - 1350] M1,

落蒲場人逼人,冇盞燈仔射吓,點突圍呀?爆壹爆夜蒲女最like神燈唔知係咪太耐冇去夜蒲脫晒節,爆哥上星期去clubbing時,竟然俾個妹寸到冇聲出,認真失威。話說當時有個妹行埋嚟,爆哥以為自己型英帥靚正有嘢食啦,點知唔係,原來爆哥諗多咗,實情個妹行埋嚟問:「有冇燈呀?」咩燈呀?車頭燈呀?爆哥以為佢其實想借火,咪拿個名牌火機「雕嘭」出來晒命,兼好型咁撻着俾佢囉,點知個妹即時扁嘴兼好寸咁話:「阿 ...


落蒲場人逼人,冇盞燈仔射吓,點突圍呀?

爆壹爆

夜蒲女最 like神燈

唔知係咪太耐冇去夜蒲脫晒節,爆哥上星期去 clubbing時,竟然俾個妹寸到冇聲出,認真失威。話說當時有個妹行埋嚟,爆哥以為自己型英帥靚正有嘢食啦,點知唔係,原來爆哥諗多咗,實情個妹行埋嚟問:「有冇燈呀?」咩燈呀?車頭燈呀?爆哥以為佢其實想借火,咪拿個名牌火機「雕嘭」出來晒命,兼好型咁撻着俾佢囉,點知個妹即時扁嘴兼好寸咁話:「阿叔,係問你有冇燈,唔係借火呀,好心你一把年紀就戒煙啦。」爆哥蒲咗咁多年,俾妹寸成日有,但寸到冇聲出呢鋪都算最瘀皮。

無啦啦點會帶盞燈出街呀?爆哥諗極都唔明。之後,竟然見到好多女仔,真係攞部手提電燈仔出嚟,之後將部電燈仔夾住部電話玩自拍。原來呢樣小玩意係近來夜場至 hot玩物。有老友同爆哥惡補夜蒲常識,話夜蒲女一向鍾意玩自拍,但夜場環境太暗,好難玩 selfie,就算勉強影到,個個都變晒黑面包公,影成咁,點擺上社交網站開心「些牙」呀。所以有人設計咗呢款自拍神燈,無論現場環境幾黑都好,只要一開着部燈,即刻玩到自拍,靚樣完全出晒嚟,所以呢樣嘢好受一班夜蒲女歡迎。每個夜蒲女手袋,幾乎都有一盞自拍神燈,冇就問人借都實有。哦,原來係咁,早知買定十粒八粒燈仔跟身,下次有靚女埋嚟借燈,即刻「着燈」光到變舞台都仲得。

老蕭被健身男集郵

一向好好火嘅蕭若元,早排開火炮轟才子陶傑,仲要鬧對方係人渣,不過陶傑都唔輸蝕,猛寸老蕭唔係佢嗰皮,激到老蕭大失儀態變成黑暗老人,話要玩到去伊斯蘭國家搞寸陶傑個名咁喎。睇到一班花生友大叫過癮,係咁瘋狂洗版,不知幾熱鬧,連爆哥都日日追住劇情發展,好睇過電視台膠劇多多聲。不過,呢排又好似靜晒,可能兩位老人家都要回氣。

老蕭呢排唔鬧人,原來忙住做健身,爆哥冇吹水,有圖有真相。爆哥前幾日碌手機睇 fb時,見到個人好熟口面,睇真啲先知係老蕭。原來老蕭去做健身時,俾個健美男粉絲野生捕獲兼集郵玩自拍,之後個男粉絲仲擺咗兩張相上 fb,一張係兩人合照,另一張就見到老蕭玩跑步機。個男粉絲仲口甜舌滑,話好欣賞老蕭,覺得佢好有才華,希望佢可以努力做健身,每一次都做耐啲。估唔到老蕭一把年紀都仲有咁多男 fans,實在令陶傑葡萄。

定慧寺骨灰龕全面清拆

定慧寺呢單佛門醜聞算係上年大事,家陣仲有餘波,事緣地政署要求二月要拆除寺內違規骨灰龕場,上星期六,過百個苦主喺大埔開會,睇嚟佢哋都好徬徨,有一位男士大叫:「臨急臨忙點搵到位,唔通我捧住個骨灰龕返屋企?」全場起哄。

在場苦主都很徬徨。

爆哥都有去撐場,睇吓有冇機見到艷尼請教吓點密室參禪,點知同一位陳婆婆傾開偈,先知好慘,佢話○五年以六萬七千元買入兩個骨灰龕位,一個已安葬老公的骨灰,另一個就留俾自己過身後與老伴合葬,而家無啦啦冇咗龕位,佢都一把年紀覺得死無葬身之所,佢好唔開心。另一位苦主周先生,自稱係退休公務員,佢有親人喺定慧寺安放骨灰龕,佢嬲爆爆問 689有冇聽到苦主訴求,搞「一戴一露」都多乜餘!睇怕香港人要自求多福。成世玩嘢嘅爆哥呢次都有點傷感,人人一出世乜都要爭,生前要買燈仔爭女,死後又要爭買位安葬,真係冇陰功! A

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!


鍾意就快D Share啦!