掃呢頁CODE去手機

2016年1月28日 星期四

THE X FILES回歸 莫探員郭探員重出江湖 [壹週刊 - 1351] __,莫探員,郭探員,THE X FILES,M1,

電視精THEXFILES回歸 莫探員郭探員重出江湖讀書時老師話學語文最緊要係多聽多講,當年仲未有TSA,梗係睇電視學英文,因為可以趁廣告轉台!其中一套必睇之選係《X檔案》(TheX-Files),跟住莫探員同郭探員查案,非常緊張刺激!2002年呢套二百幾集嘅長劇落幕,事隔十四年,台前幕後原班人馬回歸,fans相當興奮,雖然只係六集,試吓水溫,不過如果反應好,點會唔添食呀?繼續查外星人《X檔案》於1 ...


電視精

THE X FILES回歸 莫探員郭探員重出江湖

讀書時老師話學語文最緊要係多聽多講,當年仲未有 TSA,梗係睇電視學英文,因為可以趁廣告轉台!其中一套必睇之選係《 X檔案》( The X-Files),跟住莫探員同郭探員查案,非常緊張刺激!

2002年呢套二百幾集嘅長劇落幕,事隔十四年,台前幕後原班人馬回歸, fans相當興奮,雖然只係六集,試吓水溫,不過如果反應好,點會唔添食呀?

繼續查外星人

《 X檔案》於 1993年首播,一共拍咗九季, 2002年曲終人散, 2008年拍咗電影版,不過成績差強人意。相隔十四年,監製決定召集原班人馬,開拍電視劇。分別係唔似之前咁有二十集一季,只拍六集以迷你劇形式推出。

《 X檔案》可以話係九十年代美國科幻電視劇嘅代表作,好多 fans更加係因為呢套劇而對外星人以及超自然現象產生興趣。新劇會繼續追尋外星人真相,先交代當年「 X檔案」部門解散嘅內情,莫探員同郭探員金盆洗手,不過外星人事件陸續有嚟,於是搵佢哋重出江湖,再拍住上查案。劇情離唔開都係陰謀論,除咗兩個主角之外,一眾配角都係焦點所在,好似黑客 The Lone Gunmen及終極大佬 Cigarette Smoking Man等, fans都好想知道佢哋點樣出場!

《 X檔案》首播係 1993年,搵番當時嘅劇照,完全感受到歲月嘅流逝,當年我仲未有手機呀。

今次劇集背景定於 911事件之後,本來莫探員同郭探員已經無來往,因為前上司嘅急召而再次走埋一齊。

感情線無交代

不過最令 fans期待,都係主角「莫探員」大衞杜楚尼( David Duchovny),以及「郭探員」姬莉安德遜( Gillian Anderson)。佢哋喺劇中一段疑幻似真嘅戀情,吊癮吊足十幾年,好多 fans都希望佢哋可以有好結果。不過據知可能又再令大家失望,今次只會交代佢哋兩個所生嘅仔被人領養,想知更多應該要等再添食先有機會。

大衞杜楚尼同姬莉安德遜之間嘅默契毋庸置疑,佢哋都話好開心可以再次合作,近期都有頻頻現身宣傳。有劇迷就大潑冷水,指大衞杜楚尼已經 55歲,姬莉安德遜都 47歲,唔再係以前嘅金童玉女,加上多數「食過翻尋味」嘅劇集,好多都爛尾收場。不過作為睇《 X檔案》長大嘅 fans,呢六集就當係重拾集體回憶,拍得唔好咪 close file囉。

「莫探員」大衞杜楚尼及「郭探員」姬莉安德遜再次合作,相隔十四年再拍《 X檔案》, fans引頸以待。

《 X檔案》曾奪得多個艾美獎及金球獎獎項,創作呢套神劇嘅監製 Chris Carter(右)功不可沒。

終極大佬 Cigarette Smoking Man明明最後暗示佢死咗,原來係伏線,今次又回歸同兩位探員較量。

撰文:關錦雯


鍾意就快D Share啦!