嫁人收山後，袁彩雲移居溫哥華，最近返港過年，一家三口行花市辦年貨。
娛樂偵訊
踎低執平貨 袁彩雲肉緊殺價
09年嫁給從事金融業的男友 Anthony後，袁彩雲嫁雞隨雞，移居溫哥華，前年更做埋媽咪，誕下 B女 Alycia。今個農曆新年，袁彩雲一家三口返港探親，趁住花市期，同老公帶埋囡囡去維園行花市辦年貨。養尊處優多年，袁彩雲外觀並無大變，但為咗執平貨，逼入花檔踎低左揀右揀，揀啱又同老闆講價，講到咬牙切齒，正宗 C9！
四張冇走樣
婚後移居加拿大的袁彩雲，前年突然傳出她老公在溫哥華經營的餐廳蝕入肉，搞到欠租九個月，被入稟追討七十六萬加幣（約五百六十萬港元），之後袁彩雲一家冇晒音訊！
直至今個農曆年，舉家返港，更一家三口到年宵市場辦年貨。
當日下午三點，袁彩雲同老公推住兩歲 B女，到銅鑼灣維園行花市。踏入四十歲，淡妝之下的袁彩雲，樣貌身材都冇走樣。兩歲囡囡 Alycia，眼仔碌碌，皮膚白雪雪，同媽咪一個餅印，全程坐喺 BB車，冇扭計！
等到呆晒
一行人在花市的濕貨區不停兜圈睇年花，其間袁彩雲充分發揮師奶最強本色，走勻花檔，逐檔格價。
有目標後，袁彩雲唔理三七廿一，交低囡囡俾老公照顧，自己逼入檔口，搵個靚位，踎低揀花盆，逐個逐個拎上手睇。
終於揀啱心水！袁彩雲開始運勁，同老闆講價，你來我往，講到鬼咁肉緊！之後又拎住個花盆驗屍咁驗，睇吓是否有瑕疵，最後成功殺價，成交！
殺價搏老命！袁彩雲老公推住 BB車，企在檔外食風等到呆晒。之後兩公婆再去揀水仙和臘梅等年花，行行吓，又停低用手機自拍，完全沒有因為花市多人而不習慣。
逗留了個幾鐘， B女亦玩到冇晒電瞓着覺，袁彩雲見戰利品已塞滿架 BB車，走得！
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|