掃呢頁CODE去手機

2016年2月10日 星期三

自爆入行周身債 被男編劇恰 黃真真:嗰啲都唔係男人嚟! [FACE - 455 - 專訪] __,黃真真,MF,

真人騷自爆入行周身債 被男編劇恰 黃真真:嗰啲都唔係男人嚟!第一次見導演黃真真,才知道傳聞中的她細細粒,現實更加細細粒,脫掉那雙五吋高跟鞋,身高應該同小儀同鄭融一個level。難怪導演說,剛出道的時候,因為是女導演,因為是新導演,再加上又細細粒,常被男監製男編劇恰。我問她那種感受如何,她哈哈大笑:「夠膽你當面×我吖嘛!唔敢×又要恰女人,嗰啲都唔係男人嚟嘅!」好在人善人欺天不欺,黃真真的戲愈拍愈大製 ...


真人騷

自爆入行周身債 被男編劇恰 黃真真:嗰啲都唔係男人嚟!

第一次見導演黃真真,才知道傳聞中的她細細粒,現實更加細細粒,脫掉那雙五吋高跟鞋,身高應該同小儀同鄭融一個 level。

難怪導演說,剛出道的時候,因為是女導演,因為是新導演,再加上又細細粒,常被男監製男編劇恰。我問她那種感受如何,她哈哈大笑:「夠膽你當面×我吖嘛!唔敢×又要恰女人,嗰啲都唔係男人嚟嘅!」

好在人善人欺天不欺,黃真真的戲愈拍愈大製作,在強國愈撈愈上檔次,人民和人民幣冇恰佢。由第一套北上的作品《傾城之淚》開始,套套收過憶;大監製大明星冇恰佢,新作《消失的愛人》男主角黎明亦冇恰佢:「兩地三岸嘅 crew都好驚奇,原來黎生一啲架子都冇。叫佢『踏二』埋位,佢 09分一定準備好晒行定出嚟……包保唔會遲到,不過亦都唔會早到!」

有關黃真真的年紀一直是個謎,網上沒有資料,我旁敲側擊好幾次也不得要領。

好在有數得計,導演說她 21歲在香港演藝學院戲劇系畢業,以藝名黃樂桐在商台開咪, 26歲從美國讀完導演開戲不成欠了一屁股債回港,不久以後就自編自導了第一部電影《女人那話兒》,那年是 2000年,即是話今年應該剛剛四十出頭。

用了不到二十年光景,從欠下二十萬美金債項頭都痕,到今天身價百倍躋進億萬大導行列,剛剛在北京落戶自組電影公司。黃真真說歸納出一個道理「人算不如天算」:「細個我爸爸好信命,周圍帶我睇相,香港澳門,求籤算命摸骨乜都做齊,其實計我話根本冇得計,根本係條命帶住你行,條路擺喺面前,唔到你唔係咁行!」

話雖如此,我卻不小心偷聽到導演和髮型師的對話,原來從她第一部北上的《傾城之淚》開始,她就開始漂染頭髮。因為愈行愈順,從此不敢鬆懈不敢不漂……得來不易,所以有啲邪真係唔到你唔信!

人算不如天算,黎明好活潑!

《消失的愛人》呢個故事點嚟呢?

呢個故事講嘅係人鬼情未了,係歸來,其實係我爸爸喺 14年尾過身,對我同屋企人影響好大,我哋有時食飯都會諗,唔知佢會唔會返嚟呢……跟住會加雙筷。我會覺得係囉,一個人突然間走咗,身邊人會好突然,對佢嘅愛唔知點樣繼續,我覺得好有趣,就想拍一套咁嘅戲……

呢一種愛佢嘅人就可以見到佢靈魂嘅理論,係點得返嚟?

我哋做人都係㗎,你鍾意一個人就會留意佢,你唔 like佢,企喺你面前都見佢唔到㗎我哋掛住爸爸,屋企有隻蟲飛過,我都當咗係佢㗎……

點解男主角會揀黎明?

我套戲係講一個痴情嘅老公,就諗起《甜蜜蜜》痴情嘅黎小軍,黎生係有一種佢獨有嘅氣質,佢嘅愛好 pure。我搵佢,佢睇咗一晚劇本就答應咗,黎生呢幾年亦都有好多經歷呢…… Anyways,我接觸嘅黎生其實好活潑。

有幾活潑呢?你哋有合作過?

聚會、飲酒見過佢,佢好鬼馬,好出人意表㗎!所以我都特登搵個 fresh啲嘅對手俾佢(王路丹),因為我覺得會有火花。我哋隊 crew兩岸三地都有,大家都好驚奇,原來天王無乜架子喎!佢永遠都準時,例如佢會問我想佢幾點出嚟,我話「踏二」,佢 09分就會出嚟㗎喇……但係佢又唔會話 08分就見人喎……哈哈哈……佢造型各方面亦都好合作,第一次見佢,我想佢減磅,佢都好爽快:「好!你要(減)幾多吖?」跟住三個星期後開鏡,佢真係減到俾我 12至 15磅喎!

講開大牌,強國大牌明星最鍾意搞到自己排場第一,你呢幾年喺內地拍戲有冇見識過?

僥倖我遇過嘅演員就冇,聽就聽好多,開工要帶夠一打人嚟聽唔少,身為導演我聽到係會有預防嘅,你擺排場唔緊要,但我會搞清楚你有冇影響劇組囉!好似話范冰冰咁,我聽番嚟都係佢啲好嘢,話佢係女中豪傑嚟㗎!反而係拍《閨蜜》,唔係三個女仔(薛凱琪、陳意涵和楊子姍)不和,係個個補妝都補好耐,拍到超晒時!

'00《女人那話兒》

《蘋果日報》圖片

'03《六樓后座》

《蘋果日報》圖片

專恰女導演,係唔係男人嚟㗎?

你都係女中豪傑㗎!係近年撈得掂極少數嘅一個女導演?

緣份嚟嘅,我第一套(合拍)戲《傾城之淚》,當時係一個香港朋友介紹咗個大陸老闆俾我,大陸市場我又唔熟,但一個人膽粗粗咁就去咗做……有時睇番轉頭,人生就係緣份嚟嘅,其實真係唔使睇相,命運自然會拉住你走!我嗰日人哋介紹,就一個人去咗諾士佛台見個老闆,我都心諗係真唔係真,朋友聽到都話點知係唔係一個局……見完兩日,就一個人買張機票上咗大陸……不過始終係第一次(北上),係有啲水土不服嘅……

點為之水土不服呢?

係有啲嘢夾硬作落去囉……套戲指明要發生喺內地,我唔熟內地,我嘅編劇亦都唔係內地,我哋係靠睇新聞同微博咋,𠵱家睇番係爭啲!所以有人問我,係唔係計劃好進軍內地,我就真係冇喇!

電影圈尤其係導演界,女人係絕少數,呢幾年喺香港喺內地,有冇人因為你係女人,唔聽你支笛呢?

有發生過,但唔係喺大陸。我啱啱出道嗰幾年,有啲監製同編劇明恰我,譬如大家一齊度劇本,嗰兩個男編劇話地下一爆可以爆咗個人出嚟,我梗係有疑問啦,佢哋兩個對望囉,冷笑囉……

你係導演佢哋係編劇,照計你大啲?

'04《六壯士》

'08《六樓后座 2家屬謝禮》

《蘋果日報》圖片

梗係冇嘢㗎,我咪知道呢個都唔係男人嚟囉!係唔係咁講?係男人埋嚟 X我又唔敢 X喎,淨係冷笑,咩意思啫?新導演應該要有經歷至會成長,尤其係我新得嚟又係女人仲要生得細粒添,不過佢哋呢種方法,唔係好有教養囉!

喺美國讀電影時呢,有冇俾男仔恰?

又冇喎,紐約大學全世界嘅學生都有,女仔讀電影仲要唔少添!

讀完演藝又可以去美國再進修,係唔係屋企環境都唔錯?

又唔係啫,我讀完演藝做咗幾年嘢,儲咗小小錢㗎,去到又一路有做工,幫電視台新聞部做 PA,一放學就開工有時開到半夜㗎!我爸爸做生意,媽咪教書跟住做到校長添,環境 ok但係我屋企有四姊妹呢,我仲要排第二添!通常都係㗎,爸爸媽媽最錫大女同最細嗰個,喺屋企我最冇人理,最似大家姐!

點解喺演藝學院讀完表演,又會走咗去美國讀電影呢?

我細個係反叛啲,係鍾意表演啲,但係直到我讀到最後一年就嚟畢業,猛然醒覺,我又唔係靚女,又要細細粒,做呢行點搞呢?當時商台、香港話劇團同 TVB份工我都見得成,都肯收我,最後我揀咗商台份工,但做落又唔滿意自己,然後至決定去報美國一個三個月嘅導演課程,去搵下自己到底鍾意乜嘢……

當時見 TVB真係想你做兒童節目?

嗰陣時喺演藝畢業,梗係覺得自己好型,你叫我做兒童節目?𠵱家諗番轉頭,做兒童節目都出咗個周星馳啫!

'10《抱抱俏佳人》

圖片

'10《分手說愛你》

《蘋果日報》圖片

二億大導,曾經係貧賤夫妻!

𠵱家咁成功,諗番轉頭,俾你仲捱唔捱到?

有㗎!讀完電影我想拍戲走去買孖展,結果揹咗一身債……嗰陣時我同當時男朋友一齊開公司,幫 CNN、 NBC拍新聞片,儲咗一筆錢,但係筆錢又唔夠拍電影喎,嗰度係 8萬 5蚊美金,嗰陣時又係拍菲林完全唔夠。我周圍寄劇本俾人,人哋開都唔開就彈番轉頭。我諗到, Robert De Niro有間電影 centre,我就喺佢間 building對面等咗一個禮拜,諗住見到佢就衝埋去俾個劇本佢……點不知等到第五日,個實 Q已經發現我坐咗幾日,佢話 MR.Robert De Niro有秘密通道㗎!最後佢有問我攞個劇本走,最終當然都係冇下文啦……結果我哋聽朋友講掉咗啲錢去華爾街,輸突十幾廿萬美金……仲唔癲吖!

男朋友有冇走佬?

咁又冇喎,當其時好愛㗎嘛,佢又冇怪我,不過隔咗幾年感情破裂都係因為貧賤夫妻百事哀,連買支紅酒都要度過,買兩個九毫九美金最平嗰支……諗番轉頭,為咗錢要做 bar tender要賣保險,俾𠵱家嘅我仲行唔行到?唔知呢……不過人好得意嘅,當你冇得選擇時,條路擺喺面前,只可以咁行。

相比下,𠵱家係咪好風生水起?

好多人都問我點解唔見我停,因為我真係好珍惜𠵱家我有得拍戲囉……《消失的愛人》亦都係我自己開工作室嘅第一套戲,我都會物色新導演,睇下幫唔幫到手,嚟緊我套《閨蜜 2》又會搵新導演同我合作,因為我知道,每個導演起步都好難,都需要人哋俾機會。

咁𠵱家有冇拍拖?

有!我不嬲都有拍拖!好少唔拍拖!我份人,拍拖會開心好多,拍拖對我嚟講係一種調劑,唔只 sex嘅,兩個人一齊,係要同佢分享下。其實我同佢分過手,又一齊番……

'11《傾城之淚》

《蘋果日報》圖片

'13《被偷走的那五年》

《蘋果日報》圖片

點解會分手呢?

因為我怕悶囉,有一排覺得好想試下新嘢……咁啱我當其時寫緊《被偷走的那五年》,個劇本講緊女主角明明同老公離咗婚,但失去咗五年記憶又會好掛住個老公喎,就係因為我哋經歷嘅越多,越係只記住啲衰嘢,睇唔到好嘢……其實有時我哋對另一半,只係需要換個 new eyes去睇佢,其實佢係可愛㗎!

你哋𠵱家一齊開公司,唔會傷感情咩?

唔會,我負責拍戲,佢負責 run間公司,成日都見唔到!我返工一個樣,放咗工其實好易話為,開戲已經要決定太多嘢,返到屋企我可以好簡單……我發覺人越大越係少咗啲執着……其實咁執着嚟做咩呢?你知唔知,我一年之內有兩個差唔多年紀嘅朋友生 cancer,佢哋人又好又善良……照呢個理論,係唔係我每日可以擘大眼都應該覺得自己僥倖呢?

呢幾年最好成績最高票房係邊套戲?

《閨蜜》,大陸收咗二億票房。

但係你覺唔覺以前你拍落港產片評價更高?係唔係要顧票房多咗負擔?

我冇負擔㗎,我會睇番想拍嗰套戲嘅本質。我想拍《分手說愛你 2》㗎,如果搞得成,我都會係返香港拍。作為一個導演,唔係下下要大製作先肯拍,如果唔係,我覺得自己會停滯不前,好似我最鍾意嘅導演咁,拍拍下大製作,又會有套《變型怪醫》,又會有套《少年 Pi》喎。

'14《閨蜜》

'16《消失的愛人》

《蘋果日報》圖片

真的離地了

說實話,《女人有話兒》、《六樓后座》、《女人本色》還有《分手說愛你》,導演的舊作我幾乎都看過,都看到共鳴,自從她開始北上拍合拍片,也太煽情也太離地,實在少看。

上部作品《閨蜜》內地收二億,本港我卻看到有男士入場後大叫爛片,話浪費佢人生寶貴 120分鐘。老老實實,睇完未至於爛,不過擺到明就唔係拍俾香港人睇,你入場搵共鳴其實自己攞嚟衰。至於嗰位叫爛片嘅男士更加九唔搭八,男人老狗,邊個叫你自己送上門睇《閨蜜》呢?

撰文:朱小博

攝影:范仲良

化妝: Joe Wong

髮型: Alex Chan@Queen's Private i

服裝: anges b


鍾意就快D Share啦!