41歲鄧健泓同29歲前Freeze女子組合成員石詠莉拍拖三年，石詠莉噚晚喺IFPI頒獎禮上，拎咗兩個獎「十大銷量廣東唱片」同「IFPI十大銷量本地歌手」，鄧健泓搞咗個驚喜party向女友求婚，今早即向大家宣佈喜訊，今早二人喺facebook貼出合照，大晒幸福。《蘋果》今日問咗鄧健泓，佢就話個求婚party喺尖東富豪九龍酒店舉行，計劃咗半個月多：「我成日講喺一個啱嘅時間，做啱嘅嘢，噚日對我哋嚟講係一個好有意義嘅晚上，係一間獨立音樂公司好值得感恩嘅事。」佢又稱自己喺一班雙方家人及好友見證下，下跪求婚，佢笑言：「我以前拍戲拍過一場求婚戲，咁就係好順利，但到我人生第一次做呢樣嘢嘅時候，係有啲尷尬同緊張，即係我完全唔知自己做咩，唔知係下跪，定係畀咗花先，要蕭定一喺隔離叫佢跪咗先，畀花佢揸住。」反而女友石詠莉一直叫佢唔好緊張。鄧健泓又指女友石詠莉一入場已經喊晒，因為成班員工都呃住佢：「當我求婚時，佢都諗咗一陣，我問佢咁都要諗，我噚日就算畀一隻草戒指或汽水蓋佢，佢都會答應，因為我同佢呢三年經歷咗好多嘢，我哋成長咗好多。」鄧健泓坦言佢同石詠莉將喺香港結婚擺酒，plan好於加拿大影結婚相。
來源 source: http://hk.apple.nextmedia.com
|
鍾意就快D Share啦！
|
|
|