經過日操狂操，艾威減肥最後一日見成績，腰圍見番斜度，買定嘅 30碼新褲可以著住上機。
探熱針
救妻加分 閉關削十磅 57歲艾威坐正
老婆子宮有巨瘤，失業的艾威去年不惜花光百萬積蓄救妻；但手術後威嫂身體出現後遺症，導致肝臟得番兩成功能，艾威願意為了另一半捐肝，犧牲精神令人感動，暖男形象亦為艾威的事業扭轉乾坤，獲一部由中美合資的網上電影鎖定做男主角。
57歲轉運，艾威不敢怠慢，展開地獄式特訓，閉關削十磅肥膏，操 fit飛荷李活開工。
日日朝六晚十
過去一年，艾威陪老婆捱過人生一段艱難歲月，不離不棄，暖男形象，更令他的事業帶來一個突破機會。
在內地影視網「愛奇藝」即將開拍的一套網上電影中，艾威被欽點做男一，該片有美國資金，全片在美國拍攝，艾威第一次在電影中孭正，便有機會進軍荷李活。
約滿港視後，食白果兩年，搞到要剝光拍戲搵路行的艾威，把握今次黃金機遇，許勝不許敗，為擺靚個陣，早前更單拖飛去馬來西亞，閉關兩星期，進行地獄式減肥。
閉關兩週，每日朝六晚十，游水、跑沙灘、跑樓梯、跳繩、打拳狂操，再配合三餐減肥食法，艾威更將瘦身過程拍低，結果超出預期，成功出關。
唔敢太興奮
從自拍的紀錄片中，見到每日半裸出鏡的艾威由孭住個三十二吋肥腩開始，到最後一日，著住預先買定，得三十吋褲頭的新褲上機，凱旋回歸。
Fit晒做男一，艾威說是對自己有交代。
「呢次唔係去荷里活商場，而係喺荷李活個字下面拍，開心有少少但唔敢太興奮，怕會妨礙演出，所以要保持平常心。」艾威說。
中段最痛苦
有勇氣全裸拍戲，如今孭正男主角，更加激發艾威的爆炸力。
「年紀大咗，新陳代謝都慢咗，原本諗住減八磅，後來加多兩錢力，減夠十磅。」
閉關最辛苦階段，係中場。
「最難捱係踏入第二個星期，一個人日日重複做同樣嘅嘢，真係好悶！要提自己絕不容許有一絲放棄就咁返香港嘅念頭，否則，一定捱唔到落去。（點解唔叫老婆一齊去？）去埋我就要照顧佢，而且我食得好簡單，佢一定冇可能跟我咁食！」艾威說。
中年暖男有運行
雖然老土，但自身形象好壞，對事業機遇，始終有一定影響。圈中不少中年暖男，因為對家庭盡責，以好爸爸好丈夫形象，助旺事業。
威嫂都威過
獲老公艾威花光百萬身家救命的威嫂（ Liza），過去亦有威水史。當年在新世界集團舉辦的選美中艷壓群芳，與艾威拍拖前，更被俞琤發掘游說入行，跟娛樂圈早有淵源。
據悉，當年在新世界服務式住宅開班做健康舞導師的威嫂，裙下之臣不缺城中富家公子，贏得 86年新世界小姐選舉冠軍後，老闆鄭裕彤主動建議做提名人，勸她選香港小姐。
「當年嘅新世界酒店好多圈中人出入，好多人都識 Liza，好似俞琤就試過薦佢入德寶電影，只要佢簽約就做女主角，男主角係當時已經好紅嘅張學友，套戲叫《痴心的我》，但 Liza對呢行冇興趣推咗，更加冇去選港姐。結果套戲女主角由羅美薇做咗，佢同學友就係拍呢部戲撻着。 Liza如果揀咗入娛圈，命運改寫，結婚對象都未必係威哥。」知情者說。
艾威減肥法
每日選擇兩項運動：
游水（半小時）
跑步（一小時）
做 gym（四十五分鐘）
跳繩（五百下）
跑樓梯（八層樓）
以上兩項做兩轉
進食三餐：
早餐最豐富，享用酒店自助餐。
午餐一碗淨魚蛋或馬拉雜菜加蒜蓉包
晚餐只飲一碗番茄濃湯
戒除一切雜食及酒類
每天早睡早起：六點起床、十點入睡。
撰文、攝影、攝錄：娛樂組
|
鍾意就快D Share啦！
|
|
|