娛頭
怪病纏身 頸耷腰歪 爬住行 66歲羅浩楷：照顧唔到自己！
曾經是 EYT（歡樂今宵）扮嘢高手，又擅演奸角的羅浩楷，近年已在大台消失。原來， 66歲的他怪病纏身，去年初，在毫冇先兆下，瞓醒第二朝就企唔直，甚至要坐輪椅出入。
經過一年來不停求醫，幾經辛苦撐到最近開始有起色，雖然行得番，但羅浩楷仍是耷晒頸要戴頸箍，因為上身冇力易失平衡。講到怪病突襲一年，苦不堪言的他說：「連基本生存能力都冇，照顧唔到自己。」
九十度駝背
自拍罷去年初出街的無綫劇《東坡家事》後，羅浩楷已消失於熒光幕足足一年。冇咗影，原因是被突襲的腰病困擾，企唔直，更慢慢演變至九十度駝背。失去工作能力，連日常生活都大受影響，過去一年，四出尋醫，心力交瘁。
大半年前，有人見過情況最差時段的羅浩楷，要靠老婆推輪椅出入。一下子由行得走得，變成坐輪椅，身體巨變，令羅浩楷飽受精神困擾。當時每次去覆診，因為怕被人認出，他總是將 cap帽拉低，用手遮面。
醫病一年，羅浩楷睇勻中、西醫、又試過針灸做物理治療，甚至坐住輪椅入大埔搵神醫。
艱難時期，身邊幸有能共患難的妻子悉心照顧。據悉，數月前開始，羅浩楷的情況終於有改善，冇再九十度駝背，但因彎腰大半年，就算可以企番直，但頸椎卻因長期受壓變彎曲，需要佩戴頸箍固定，加上腰患未完全康復，行路時好容易失平衡，仍然需要太太扶住出入。
手腳欠靈活
上週五（三月四日）早上，逐步恢復的羅浩楷戴住 cap帽、眼鏡，還有不可缺的頸箍，由屋企出發到九龍城食早餐。在嘉林邊道泊低車後，羅浩楷落車時用右腳先落地，之後再吃力地用手提起左腳跨出車廂，企定後，由羅太扶住，龜速行去隔籬街的茶餐廳。
一坐低，羅浩楷就除低頸箍。點了粥、炒米粉以及油炸鬼再加支裝可樂，胃口好好，不過因為身體失衡，上半身向左傾的他，全程要耷住頭食，食到攰，便要挨向椅背稍作休息。由於手腳欠靈活，右手唔夠力夾麵，要羅太出手幫忙。
除箍證冇事
當日所見，病中仍有留意股巿的羅浩楷，不時拿出股票機㩒㩒吓。食完早餐，戴番頸箍的羅浩楷扶住老婆離開。
記者上前問候他的病況，羅浩楷表現有禮。
「唔好意思，我冇嘢講，因為我冇乜平衡力。（呢一年係點過？）我過得好好。（情況係點？）我冇事㗎。（究竟出咗乜事？其實羅浩楷立即除咗頸箍，證明自己健康冇問題）我冇事，你睇我，我係冇嘢嘅。」
但行了一條街，羅浩楷又開始喘氣。「頸箍壓住我胸口，變咗我抖唔到氣。」
多得老婆按摩
本週二（八日）早上，羅浩楷再偕妻外出，見到記者，亦再不抗拒透露過去一年來的苦況。
「有日瞓醒就突然企唔到，條腰慢慢彎到變九十度，之後仲要坐輪椅，好辛苦，返唔到工。條腰彎到要喺地上爬住行，真係一個基本生存條件都冇。點解呢？因為我連買個飯盒都唔得，好困難！」講幾句已經喘晒氣的羅浩楷，說身體冇力要搵地方挨一挨。
「呢年做咗好多治療，搵咗幾個脊醫、骨醫，整吓整吓，突然有日又行得番，依家剩番條頸未好。（醫生話你咩事？有冇話幾時完全康復？）佢哋都唔知咩事，唔知幾時好，可能俾我老婆按摩吓，我會突然好得番。」
性格樂觀，被突如其來的病痛拆騰一年，羅浩楷苦中尋樂，聲稱今次最大得着，是有老婆陪住行孖咇，和享受她的按摩。
「佢好叻，做咗我骨醫，每日幫我按，做艾炙，差在未幫我針（灸）埋。」
靠股票生活
手停口停，又要應付醫藥費，但羅浩楷說經濟冇問題。
「呢幾年有搞股票買賣，可以維持生活。」羅浩楷說。
識彈琴，又教唱歌的羅浩楷早年儲落唔少積蓄，擁有兩個物業的他，一二年將牛頭角淘大花園頂層連天台單位，以三百五十萬售出，套現傍身，才不致要四圍撲醫藥費。
扮嘢最經典
講到扮嘢，絕對是羅浩楷的專長！當年拍住盧海鵬、廖偉雄等，是 EYT台柱。最經典扮嘢之作是呂奇同林子祥，尤其黐上二撇雞笠個假髮唱 Lam腔，上身一樣。
瓣數多
羅浩楷不單是扮嘢高手，更有音樂才華，曾拜師許佩、張雲、林祥園等名師門下，有超過 20年職業琴手經驗。百足咁多爪的他，除了演藝事業，亦試過不同範疇的工作。
上封面拎前度底褲
羅浩楷另一經典，是與亞視前藝員區靄玲拍拖，分手後因為放唔低，竟然拎住前度條內褲接受訪問，公開自爆經常幫女友洗底褲，雜誌封面一出，轟動全港。但此舉亦令其形象受損，在幕前沉寂了一段時間，名副其實洗底。
至於區靄玲， 95年離開娛圈從商， 11年重返幕前投無綫，雖與前度羅浩楷同一公司，但冇碰過面。
脊醫：有啲人企唔番
羅浩楷一覺醒來腰患纏身、不良於行，著名脊骨神經科醫生溫文灝表示：「佢有機會係椎間盆凸出，椎間盆係兩層脊骨中間嘅軟組織，佢側邊嘅組識脹起咗就發炎，又或者係勞損性受傷發炎。點解條腰彎咗，係個身體自我保護繃緊咗，壓落去會影響神經。有啲人可能熱吓身下晝就冇乜事，有啲人一直唔理佢就好唔番。病人依家輪到條頸冇力，反映咗成條脊椎都有事，我哋建議病人要做運動，例如游水，因為只要強化番啲肌肉，個骨架就有力支撐番個身體。」
撰文、攝影、攝錄：娛樂組
|
鍾意就快D Share啦！
|
|
|
