韓國天團 BIGBANG巡迴做咗一年，終於返到首爾做尾場，並且宣布緊接舉行十周年演唱會，做到無得抖。
外太空
首爾直擊 BIGBANG黃金十年
韓國天團 BIGBANG上年 4月開始巡迴演唱會，由首爾開始，走遍內地、東南亞、美國、南美洲、大洋洲等三十多個城市，經過差唔多一年，終於凱旋回歸！喺首爾舉行「 World Tour[MADE] Final in Seoul」，一連三場演唱會，為世界巡迴畫上完美句號。
今次演唱會吸引咗來自世界各地嘅 VIP（ BIGBANG歌迷統稱），皆因有成員即將當兵， full team演出買少見少。點知 BIGBANG為歌迷帶來驚喜，尾場宣布舉行出道十周年演唱會，開完先入伍！
返家鄉零舍 high
BIGBANG五子巡迴一年，做咗六十六場，最 high最開心始終都係首爾場！韓國歌迷相隔一年再睇同一個演唱會，會發現有好大分別，其間出咗幾首新歌，整個演唱會更加流暢，幾段間場嘅短片近乎由頭剪接過，製作甚有誠意！一播出幾首大熱快歌《 BANG BANG BANG》、《 Tonight》、《 Stupid Liar》時，現場氣氛非常熾熱，五子見到歌迷反應熱烈，都跳得特別落力！
返到家鄉，五位成員終於唔使學唔鹹唔淡嘅外語，可以用韓文盡訴心中情！勝利首先代表 BIGBANG多謝歌迷，令為期一年嘅巡迴可以順利舉行，五位成員特別強調多謝韓國歌迷，又話去完咁多個國家開騷，始終最鍾意返到韓國，因為呢度係佢哋嘅家，講得最多嘅係「我愛你」，就連最 cool嘅隊長 G-Dragon都開口向歌迷示愛，韓國歌迷對佢哋太多海外活動而忽略本地市場嘅怒火，相信應該可以平息！
十周年演唱會
BIGBANG氣勢如日方中，不過都鬥唔過天敵——當兵！五位成員嘅入伍期逐漸接近，計年齡率先要喺今年入伍嘅係 T.O.P，之後輪到其他成員，所以有指今年演唱會係最後一次齊人，要再見五人合體須在七年後，令今次演唱會更加有話題！喺演唱會上，五子經常將「出道十周年」掛喺口邊，感謝歌迷對佢哋不離不棄，又提到可以同歌迷相處嘅時間所剩無幾，會好好報答歌迷。喺最後一場， BIGBANG宣布為咗慶祝，落實喺下半年舉行演唱會！依時間推算，相信會係 T.O.P入伍前最後一個演唱會，各位歌迷要準備定彈藥，準備再睇過喇！
撰文：關錦雯
|
鍾意就快D Share啦！
|
|
|