今日突然有周刊爆周秀娜戀上有家室嘅「超級富二代」，話佢呢一年工作量唔大，主力做生意但可以逆市擴充，又買豪宅俾屋企人，自己就租住堅尼地道豪宅，真係財來自有方。本報今日聯絡娜姐，問佢係咪戀上人夫，佢淡淡定回應:「o依家仲係單身，咁結識朋友，將來有男友都好啦，唔會睇人背景，一嚟唔會係呢樣嘢做標準先。」娜姐承認o依家有人追，問到係咪富二代?佢話:「唔知呀，冇理由一嚟就咁問人哋，同埋都唔會理啦，朋友啱咪一齊囉，唔知呀，如果將來有男友嘅話，未必會公開，因為我覺得要睇下另外一半想唔想嘅，要尊重嘅。不過已婚人士我就抗拒啦，做朋友就OK。」講到「財來自有方」，娜姐就話:「自己都有其他投資嘅，不過呢方面我唔算係好清楚，Daddy有幫我睇，都有搵投資經理，可能有啲咩啱嘅，佢都會掟比我睇，暫時都係幫屋企人置業先，自己就未睇得啱。或者再睇下啦，要睇啱個價，再低啲時，或其他地方(置業)，成日周圍去，好似之前去澳洲都幾好喎，可能因為周圍去，都會留意下其他國家。」
來源 source: http://hk.apple.nextmedia.com
|
鍾意就快D Share啦！
|
|
|
