翠如咀Bosco 蕭正楠醋爆問罪：又話借位?
無綫昨日於《香港國際影視展2016》舉行《TVB 2016劇集推介記者會》，適逢昨日白色情人節，焦點落在兩對情侶鄭嘉穎和陳凱琳，蕭正楠和黃翠如身上。四位打情罵俏耍花槍，翠如與黃宗澤的咀戲令蕭正楠投訴：「開頭講冇呢場戲，又話係借位！」之後更醋爆說：「佢送呢場戲畀我，睇我幾時回番場畀佢！」採：影視組 文：專案組
翠如與Bosco的咀戲，令蕭正楠嬲嬲豬質問女友：又話借位？
蕭正楠勁呷醋，看來翠如要出力氹番男友了。
陳凱琳全程冧爆甜笑，與鄭嘉穎Sweet到爆！
近50位無綫藝人落力谷劇。
楊秀惠晒事業線和香肩吸睛。
胡定欣（左）和王君馨齊晒打女功架。
昨日無綫電視於《香港國際影視展2016》舉行《TVB 2016劇集推介記者會》，接近50位藝人落力谷劇。適逢昨日是3月14白色情人節，焦點即落在兩對閃爆情侶：鄭嘉穎和陳凱琳（Grace）、蕭正楠（Edwin）及黃翠如身上！
「睇我幾時回番場畀佢」
現場播放《殭》、《來自喵喵星的妳》等新劇片段，其中播到由Edwin、翠如及黃宗澤（Bosco）主演的新劇《幕後玩家》時，除Edwin與翠如的結婚咀嘴戲外，竟播出另一幕Bosco咀翠如的片段，Bosco忍不住在台上說：「套戲好亂！」Edwin即扮嬲嬲豬呷醋：「我唔覺得好亂，我好唔開心囉！開頭講冇呢場戲，又話係借位？」並趁機向女友翠如撒嬌：「你同記者朋友講吓點解你要錫？」翠如亦相當識做氹番男友：「返屋企先」連Edwin身旁的張繼聰也加入戰團，大爆Edwin原本有場戲要和其他女藝人咀，可惜最後被Cut，此時Edwin即「笠水」向翠如賣口乖：「真係冇！導演叫拍都唔拍」令翠如哭笑不得！站在兩口子中間的Bosco也忍不住問：「我係咪企錯位？」
事後兩人一同受訪，Edwin被問到是否呷醋？他繼續嬲嬲豬：「唔好問，點答你！戲入面佢（翠如）同Bosco一對，仲多過同我，睇到好傷心！」問到為何女友拍咀戲都冇「監場」？Edwin說：「可能導演使開咗我。」問到為何背住男友在開篷跑車咀Bosco？翠如解釋：「我有話佢聽，嗰日佢早收工啫！」之後記者提議二人現實生活來一次Kiss Kiss作補償，Edwin卻抵死說：「我又冇開篷跑車。」
談及白色情人節，問到Edwin有否送禮物給女友？他笑說：「佢送咗呢場戲畀我，睇我幾時回番場畀佢囉！」
兩周冇見互望冧笑
而另一對情侶鄭嘉穎及Grace一樣冧爆全場！兩人為主演的劇集《殭》宣傳時，Grace全程冧爆甜笑，兩口子不時互望甜笑，幸福滿瀉！當Grace談到劇中因與謝安琪（Kay）一同愛上嘉穎而要變做殭屍時，主持即插話笑指二人現實中不用變殭屍都在一起，即時氹得Grace再度冧爆兼甜笑！問到在戲內有否咀戲？嘉穎說：「有啲啲啦，一場囉！（同Kay咀得激過Grace？）冇比較喎，都唔需要比較」問到身旁的Grace會否介意男友咀Kay，此時全程甜笑的Grace即細細聲說：「唔會嘅……」不過口不對心一向為女人強項，似乎嘉穎要落力氹番女友！適逢昨日白色情人節，嘉穎坦言因女友往加拿大工作，他倆已兩個多星期沒見面：「唔知喎，唔話你哋知！不過應該都係食飯慶祝。」
翠如與Bosco的咀戲，令蕭正楠嬲嬲豬質問女友：又話借位？
蕭正楠勁呷醋，看來翠如要出力氹番男友了。
陳凱琳全程冧爆甜笑，與鄭嘉穎Sweet到爆！
近50位無綫藝人落力谷劇。
楊秀惠晒事業線和香肩吸睛。
胡定欣（左）和王君馨齊晒打女功架。
|
鍾意就快D Share啦！
|
|
|
