E Cup Baby明做人妻 蜜桃胸賀大婚
現年27歲、擁34E蜜桃胸的「E Cup Baby」劉欣宜，將於明日出嫁，老公是35歲的音樂人、唱二創歌的窮飛龍組合成員陳子敏，現正職是理財規劃，大前日兩人到中環試婚紗，已改行做空姐的劉欣宜再現蜜桃胸，性感靚爆！戴着訂婚戒指的她更跟未來老公甜蜜咀嘴，煙韌到暈！
■E Cup Baby劉欣宜明天出嫁，她日前試婚紗時再現蜜桃胸。
男友包戲院求婚
陳子敏來自小康之家，劉欣宜打破𡃁模的拜金形象：「我鍾意佢，佢對我好好、好孝順，佢有幾多錢都畀晒我。」問到男友怎求婚？劉欣宜說：「我25歲生日前一晚，佢靜靜雞約晒我啲同事、朋友、屋企人，喺我以前做麥當勞姐姐嘅麥當勞安排生日會，我好開心。」怎知驚喜一浪接一浪，她說：「正日朋友畀兩張戲飛我，我哋先去食自助餐，佢食咗生蠔扮肚痛，我哋入場已經熄晒燈。」
陳子敏解釋：「因為佢啲朋友喺裏面，怕被佢發現。」劉欣宜接着說：「佢睇到中段又肚痛去廁所，幾分鐘後開燈，播阿爸阿媽、李蘊喺螢光幕同我恭祝生日快樂，我越睇越嬲，我生日箒，搞咁多嘢使咁多錢。跟住佢就入嚟，口震震同我講一堆嘢。」陳子敏憶述：「好希望佢可以畀機會我，下半生都可以照顧佢。」劉欣宜當時感動到喊：「眼淚真係會自動流落嚟。」
■再試婚紗前，E Cup Baby先補個妝。
■轉職做空姐的E Cup Baby將嫁作人妻。
畀兩年時間改變
男友屋企好傳統，問到是否被要求轉行？劉欣宜說：「之前都畀deadline，呢行唔啱自己就要轉，唔可以原地踏步，呢樣亦係我鍾意佢嘅地方，我哋都經歷一段低潮期，我講咗啲幾傷人說話。」劉欣宜眼紅紅說：「嗰時佢性格冇𠵱家咁進取，溫室家庭成長，好多嘢冇諗將來，我同佢講，畀兩年時間你，要睇到你有進步，我唔係要你養我，但至少你要照顧到自己，公一份婆一份OK，但唔好嘥你時間嘥我時間。」陳子敏見到未來老婆講到喊，他感動說：「佢同我講完後真係醒一醒，好彩捱得過嗰兩年，佢嘅信任同包容變動力。」
採訪：皓騫
攝影：陳慧安
化妝、髮型：Yanki Cheung of GABY make up
服裝：KARL HUI WorkHouse
場地：KIR ROYAL
■E Cup Baby冧爆咀未來老公陳子敏，重提拍拖感動處更感觸落淚。
|
鍾意就快D Share啦！
|
|
|