2016年3月17日 星期四

潮流姣主 男友睇定情趣 SM服 蔡思貝透 bra色誘麥秋成 [壹週刊 - 1358] 麥秋成,蔡思貝,M1,

被放假三個月,Sisley大把時間,mark實男友陪睇戲。娛頭潮流姣主 男友睇定情趣SM服 蔡思貝透bra色誘麥秋成現年25歲的蔡思貝(Sisley),入行即被封TVB新一代姣精,去年尾,更爆出兩個月極速大學畢業,涉學歷造假;為平息事件,大話妹蔡思貝被無綫放假三個月。奉旨放假!同舞蹈總監男友麥秋成打得火熱的蔡思貝更加肆無忌憚,日日瘟仔!就連拍拖睇戲,都要透bra的她,潮流姣主,戰鬥格!被放假三個月 ...


被放假三個月, Sisley大把時間, mark實男友陪睇戲。

娛頭

潮流姣主 男友睇定情趣 SM服 蔡思貝透 bra色誘麥秋成

現年 25歲的蔡思貝( Sisley),入行即被封 TVB新一代姣精,去年尾,更爆出兩個月極速大學畢業,涉學歷造假;為平息事件,大話妹蔡思貝被無綫放假三個月。

奉旨放假!同舞蹈總監男友麥秋成打得火熱的蔡思貝更加肆無忌憚,日日瘟仔!就連拍拖睇戲,都要透 bra的她,潮流姣主,戰鬥格!

被放假三個月

同陳凱琳同屆的一三年港姐亞軍蔡思貝,未卸任已被無綫力捧,由早前的《衝線》到《潮流教主》,還有未出街的《味想天開》、《純熟意外》,套套做女主角,就算被網民插雞仔聲又戲屎,但擦得掂監製高層的她,仍然被力捧。

入行兩年,但蔡思貝除了緋聞厚過電話簿,更加是非纏身。去年十月被揭大學學歷造假,之後再被踢爆以造假學位報讀碩士課程,滿口大話,誠信破產。雖然如此,無綫已講明盲撐蔡思貝,更加不會取消其港姐亞軍資格,但為平息風波,落令她放假,消失三個月。

「假學歷件事爆咗出嚟後, Sisley都灰到爆,試過喊晒話想公開解釋,但公司怕愈描愈黑,唔俾佢咁做,只係要佢放假,除咗間中去吓谷劇活動,暫時唔安排佢接 job!」蔡思貝身邊人說。

透晒 bra的 Sisley發現記者後,不停同記者講《美人魚》,避開提男友麥秋成。

男友俾錢買飛睇星爺的《美人魚》。

散場時,麥秋成顧住講電話, Sisley面燶燶追問對方係邊個。

同記者遊完一輪花園, Sisley坐上男友的 Benz離開。

拍拖戰鬥格

一四年,蔡思貝跟電影《狂舞派》的舞蹈總監麥秋成學舞撻着,拍拖年半,原本與家人同住杏花邨的她,去年被發現秘搬清水灣村屋,與男友同居。不過,出名「人肉發電廠」的蔡思貝卻多次強調自己單身,繼續放肆在外「亂食」,為此,二人一度分手。但爆出假學歷事件後,兩人患難見真情,被放假的蔡思貝,亦修心養性,日日陪實男友。

上月尾,蔡思貝化行妝透晒 bra出動,陪男友麥秋成去數碼港戲院睇《美人魚》,揀位買飛期間有售票員同蔡思貝搭訕,她亦禮貌打招呼,相反麥秋成就 cool爆,繑實雙手扮唔熟。

散場後,麥秋成顧住傾電話,面燶燶的蔡思貝一見男友收線,立即追問對方是誰,十分緊張。之後發現記者,一臉尷尬的她和記者廢噏幾句,便坐上男友的平治跑車離開。

13年,蔡思貝以喱士透黑 bra造型出席香港小姐首輪面試,當時被傳媒封為「黑 bra千語」。

Sisley雖然多次否認戀情,但早前有人將大合照上載到社交網站,竟不慎洩漏她肉緊攬實男友面貼面,勁痴纏。

鍾情黑 bra的 Sisley,去年曾經著住印有黑 bra圖案 tee會男友。

與男友在清水灣村屋同居,二人坐駕不避嫌泊埋一齊。

帶父母撐男友

早個禮拜(三月五日),麥秋成全新街舞劇作品《炫舞場》公演,作為女友的蔡思貝拉大隊撐場,好友陳嘉寶、賴維玲、孫慧雪、徐肇平外,就連未來外父外母都有到場,可見麥秋成已經是蔡家的「半邊仔」。

三十五歲的麥秋成靚仔又大隻,一一年擔任電影《狂舞派》的舞蹈總監為人認識,有自己舞蹈學校的他亦算是一個筍盤,多女埋身外,更有女主動發性感相,難怪電廠蔡思貝都要經常低 V透 bra,箝實!

本週一(十四日),麥秋成揸車去旺角會合朋友,停燈期間,篤手機睇性感裸女同情趣 SM服。

現年 35歲的麥秋成曾在《中國好舞蹈》節目中演出,獲得郭富城盛讚。

三月五日晚, Sisley帶埋父母支持男友的街舞劇作品《炫舞場》。

Sisley嗌咪撐男友,徐肇平亦有份。

擺晒事頭婆款

本週一(十四日),麥秋成獨自揸車到旺角,停紅燈期間,見他拎電話睇 WhatsApp,內容竟是個半裸女,他更即時放大欣賞,之後又再收到一張 SM情趣服相。

「呢啲見怪不怪其實好多女學生都好迷戀佢,仲成日有意無意 send啲相俾佢扮問意見!我哋好多人都見過 Sisley上舞蹈室等佢收工,每次佢都會好似事頭婆咁,買晒嘢食嘢飲俾大家,阿成咁受歡迎,佢擺明係宣示主權」麥秋成身邊人說。

Sisley經常攬住男友的愛犬 po上網宣示主權。

女友成為網民箭靶,今年二月 Sisley生日,麥秋成公開在 instagram送上祝福力撐。

曾在德國留學的 Sisley性格開放,參選港姐前就有個老外男友。

本月初,仍是「 P牌仔」的 Sisley,不惜一邊揸車,一邊伸手出車外拍下男友駕電單車英姿,認真搵命搏。《蘋果日報》圖片

發電廠

人肉發電廠蔡思貝入行短短兩年,身邊拍檔幾乎個個傳緋聞,主動收兵的她,被稱新一代姣精。

周志文

14年,首次孭正做《衝線》女一,劇組在台灣拍外景時,蔡思貝發功姣電「巨聲大孖」周志文,主動摸上對方酒店房過夜,回港後再撐枱腳互餵糖水,毫不避忌。

羅仲謙

連名草有主的羅仲謙都唔放過,拍《衝線》期間,蔡思貝主動抄牌約食飯,更當眾伸手幫羅仲謙扣皮帶,完全唔放楊怡在眼內。

洪永城

合作《味想天開》時經常出雙入對,即使劇集煞科仍私下約見面,更被拍到一齊於西貢做運動,蔡思貝向住對方擘髀拉筋玩色誘,二人態度曖昧,一度激怒洪永城女友唐詩詠。

陳展鵬

去年被拍到孖住陳展鵬去九龍城車房整車,二人身貼身毫不避忌,其後陳展鵬主動坐上司機位幫蔡思貝試車,之後雙雙返回男方維景灣畔寓所短聚。

鄭俊弘

14年,與鄭俊弘合拍超市廣告,一撻即着,姣功搶姜麗文男友,又突擊 Fred的處男 catwalk騷,親自到後台送花,其後更被拍到孖住去紅館睇蘇打綠演唱會。

是非女王

蔡思貝 13年當選港姐亞軍後雖然受大台力捧,但緋聞不絕的她負面新聞更一籮籮,當中虛報學歷一事,轟動娛樂圈。

戲屎雞仔聲

在《衝線》初次擔正做女一的蔡思貝,被網民插爆戲屎外,高八度的雞仔聲令人極度反感,其後竟憑電影《陀地驅魔人》入圍第三十五屆金像獎最佳新演員,惹起網民極大回響。

假學歷

蔡思貝去年被踢爆虛報學歷,只花兩個月時間極速完成菲律賓一間大學學士課程,拎埋畢業證書,事後她以九次「我要了解吓先」解釋事件。

危險駕駛

早前,蔡思貝涉嫌危險駕駛,仍是「 P牌仔」的她,一邊揸車一邊拎住手機伸出車外,為揸住電單車的男友麥秋成拍照,十級危險。網民即譏諷她在《鐵馬戰車》中,曾飾演交通警察一角,咬住唔放。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...