李光洙喺《魚男突變》中全程見唔到樣，導演話揀佢做係因為佢夠高，戴埋個魚頭更加突出。
娛樂偵訊
重量級頭套遮樣扮魚 李光洙演技大爆發
韓國綜藝節目《 Running Man》喺亞洲大受歡迎，七位主持嘅人氣比起好多韓星有過之而無不及，賺咗知名度之後，做番老本行立即事半功倍！
喺節目入面嘅李光洙以搞笑形象而為人所熟悉，不過做演員就唔係講笑，屢獲好評！喺新戲《魚男突變》入面，李光洙變身廢青，基因突變成為半人半魚，成套戲幾乎無出過樣，咁先有挑戰性：「其實我都係拍完先知，原來見樣嘅戲份係咁少！」
戴頭套呼吸困難
電影海報中有一隻魚頭人身嘅怪物喺魚缸入面，被放置喺馬路中心，感覺上好似好荒謬，其實正正係戲中想帶出現實社會嘅扭曲。飾演主角「魚男」嘅係首次擔正電影嘅李光洙，不過可以見到佢個樣嘅戲份，只係得兩幕！「雖然成套戲都見唔到我個樣，不過睇完嘅觀眾同朋友都話，一睇就知道係我。因為角色嘅行為舉止，包括小動作、行路嘅姿勢等等，加上魚頭係以我嘅輪廓倒模做出嚟，好似個嘴同個鼻，都有我嘅特徵。」呢個頭套一啲都唔簡單，有 8公斤重，戴得耐會令膊頭負荷過重，呼吸都有困難，要用氧氣筒！光洙每日都要俾其他演員早到片場化妝，而且一化咗就除唔到，大家見到佢咁辛苦，都特別照顧佢：「拍過咁多節目，從未試過咁多人關心我，真係好！」導演權五光仲話「朴寶英都有餵他吃飯！」
整容都要做人
《魚男突變》早前參與《香港國際電影節》，李光洙亦有來港出席首映，喺紅地氈上大受歡迎。而家嘅光洙人氣爆紅，不過喺娛樂圈際遇好難講，就好似戲中嘅魚男人樣，一時係人人愛戴嘅吉祥物，一時係受人唾罵嘅怪物，光洙都有危機意識：「角色其實同藝人嘅情況好相似，我都好有共鳴，不過好好彩，我暫時都受到大家嘅愛戴，好感恩！」魚男被家人及朋友出賣，最後佢選擇喺大海生活，呢個選擇真係需要好大勇氣，光洙就話自己做唔到：「呢個角色一直好被動，從來無掌握過自己命運，所以到最後，佢做唯一一次嘅決定，就係決定去大海生活，係佢拿出勇氣做嘅決定，我覺得係 happy ending。不過如果係我，我一定揀做人，就算整容都要做番人！」
《魚男突變》
上映日期： 4月 27日
撰文：關錦雯
|
鍾意就快D Share啦！
|
|
|