堪輿學家指翠如BB行運行足30年。
藝人黃翠如爸爸黃永華的建築公司尋日上市，今日股價繼續勁升，市值估計超過52.79億元，令翠如BB一夜之間成為「富貴千金」，認真羨慕死人！堪輿學家陳子才亦指翠如BB超旺父親：「黃翠如嘅命格有『財氣通門戶』及『財多身弱』，即係話佢容易有錢，但身體比較多病、比較差。而女仔嘅財星係代表錢銀同埋爸爸，所以翠如唔單止自己有錢，仲好旺爸爸、老公，甚至係老闆添！」
出身低微「錢」途無限
眾所周知翠如BB年幼家貧，試過一家七口要住木屋，原來同個鼻有關！陳子才分析：「睇番翠如嘅面相，佢嘅鼻樑低，代表出身差，相反鼻樑高就係出身富貴之家，不過佢鼻頭有肉，即係我哋俗稱嘅『豬膽鼻』，所以佢就算出身差，之後慢慢儲到好多錢。」子才師傅指翠如BB今年開始正式行大運，仲要行30年以上，認真「錢」途無限！
與蕭正楠夫妻宮「相合」
至於，大家都好關心翠如BB男友蕭正楠會唔會「入贅」黃家？陳子才話佢哋好夾，好大機會拉埋天窗喎！佢話：「依家我哋唔講入唔入贅㗎喇！不過睇番翠如同蕭正楠嘅命格，佢哋嘅夫妻宮『相合』，加上父親宮都夾，即係佢哋同對方父母都相處得好好，所以佢哋好夾，結婚都唔出奇。」
子才師傅仲話蕭正楠都好旺翠如BB爸爸，佢分析：「因為蕭正楠依家行緊財運，而財運都代表爸爸，加上佢同翠如嘅父母宮『相合』，假如佢同黃翠如結咗婚，可以話係會幾旺翠如爸爸。」
來源 source: http://hk.on.cc
|
鍾意就快D Share啦！
|
|
|
