網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2016年4月7日 星期四

7女格鬥 打出火互寸 [壹週刊 - 1361] __,M1,

探熱針7女格鬥 打出火互寸ViuTV開台主打MMA真人騷《G1格鬥會》,前所未有搵八個女仔上擂台堅係打餐飽,賽前更要簽生死狀及保密協議,被外界一致質疑造假,眾女當初亦私下夾定,保住個樣唔打面。點知愈打愈狼,爆鼻、骨折嘢嘢嚟真。訪問當日,除了滾軸溜冰運動員王蘊妮不問世事、唔用是非做宣傳,其餘七女公開互寸,好唔妥。至於「晶女郎」唐紫睿(Hazel)最唔妥黎美言(Winkie),是日二人互當透明,Haz ...


探熱針

7女格鬥 打出火互寸

ViuTV開台主打 MMA真人騷《 G1格鬥會》,前所未有搵八個女仔上擂台堅係打餐飽,賽前更要簽生死狀及保密協議,被外界一致質疑造假,眾女當初亦私下夾定,保住個樣唔打面。點知愈打愈狼,爆鼻、骨折嘢嘢嚟真。訪問當日,除了滾軸溜冰運動員王蘊妮不問世事、唔用是非做宣傳,其餘七女公開互寸,好唔妥。至於「晶女郎」唐紫睿( Hazel)最唔妥黎美言( Winkie),是日二人互當透明, Hazel更坦言:「從來唔熟!」

真•報仇

女人堆向來多是非!本週三(四月七日)晚十點首播的《 G1格鬥會》更加食到正,贏埋噱頭。八個女仔由唔識打到識,沒有情節規範,連稿都冇,全靠打出火花。

唐紫睿( Hazel)、鄧穎芝( Van仔)、鄧洢玲(阿旦)、劉燕妮( Rika)同一陣線,視前 HotCha成員黎美言( Winkie)為頭號大敵。

有指阿旦在練習時不敵 Winkie被打傷,其他人睇唔過眼,幫手報仇,在第二場鄧穎芝與 Winkie對賽,鄧穎芝一個超狠鎖頸將對方 KO,完場更講咗句:「我係為朋友出氣。」打出火,唔妥到出面。

黎美言雖被排擠,仍有龍小菌和郭思琳撐。七個女仔接受訪問時被問到是否打出真火?鄧穎芝一副大家姐姿態搶答。「我由細到大都冇俾人打過,識咗佢哋就成日俾人打。打交要有火先有動力去打,係咪先?但其實我哋私底下好 friend,(望住身旁 Rika)係咪先?」

問她是否只和 Rika特別好時?鄧穎芝即攬實 Hazel及阿旦:「唔係喎!我哋全部都好 friend,會約出嚟食飯打邊爐。」但她一直用個背脊「得」住 Winkie、龍小菌及郭思琳,楚河漢界好分明。

爭咪

本來輪到龍小菌(右一)講嘢,鄧穎芝(左三)正想遞錄音咪俾佢之際,卻忽然轉軚遞俾唐紫睿(左一),明玩嘢!龍小菌個樣好冇癮。

當透明

未埋位訪問時,唐紫睿、劉燕妮、鄧穎芝、鄧洢玲好好傾,完全當其他女仔透明。

當記者問七個女仔係咪打出真火之際,鄧穎芝先發制人攬實鄧洢玲同劉燕妮話:「你覺得我哋有嘢咩?」

藐嘴寸爆

另一個好唔妥 Winkie的 Hazel,傳聞她曾誇口要「買起佢隻左手」,替朋友報仇。為此, Winkie所屬公司要她退賽「保手」,二人無緣在擂台對決,訪問當天, Hazel亦擺明當對方透明,每逢 Winkie講嘢,她便擰歪面又嘴藐藐,更寸爆:「比賽受傷一定有,我同佢完全唔熟。」火藥味甚濃。

下下被針對的 Winkie唔願回應是非,只講自己。「我冇咩想講。因為做幕前無啦啦走去打交,媽咪同公司已經好擔心,我仲先斬後奏瞞住佢哋簽生死狀,搞到媽咪好嬲,不過佢最後都俾我嘅勇氣感動咗!」

據知唐紫睿(右)在總決賽同郭思琳爭冠軍,二人毫不錫身互伸對方一腳,最後郭思琳扔白毛巾投降,唐紫睿成為第一屆女拳王。

第二場鄧穎芝(左)與黎美言埋身肉搏,毫無保留「舂」對方。

是非源頭

而傳聞中引發「戰爭」的源頭阿旦,是眾女中最細粒,打 MMA明顯較輸蝕,她無奈說:「真係有少少唔公平嘅!不過效果真係好睇!」

在旁的 Hazel立即插口:「咩呀!佢好狼死㗎!上到場好犀利,唔好睇佢身形咁,大家都係初學技術唔夠,就要睇吓邊個夠狼!」一直沉默的龍小菌亦贊成:「落到場要有團火,唔可以有惻隱之心。」

睇完一班女仔打交,《 G1格鬥會》三位主持都不約而同叫「佩服」, Leo(左一):「女仔因為打 MMA而受傷,我覺得好型。」柳俊江:「現場睇佢哋流晒血,起晒雞皮,但真係好精采。完賽後我忍唔住擁抱佢哋。」阿 V:「睇完第一場,嘩!堅嘢!唔敢笑佢哋!」

比賽期間睇七女 po咩相上 ig,同邊個 friend?好明顯。

活在地獄

一場比賽,為八女帶來前所未有的折磨。正式上擂台前,大家要各自搵私人教練地獄式集訓半年,打到遍體鱗傷。

唐紫睿 打男友發洩

「平時歎慣食慣,嗰半年好難捱,所以搵咗個男朋友調劑吓,佢識咗我之後成日俾我打,所以佢想去學拳(自衞),但俾我阻止。」

黎美言 睇物理治療

「呢半年好似職業 fighter,每日留喺拳館 6個鐘,成身瘀晒,要 keep住睇物理治療,心理同生理都要攞平衡。」

鄧穎芝 發脾氣鬧 sales

「呢個節目真係害人不淺,因為我要用使錢嚟氹番自己,不斷 shopping。有次 train完好攰去買衫,但個 sales係咁追住响我身邊推介,我覺得佢好煩,忍唔住大聲喝佢:『得我自己會睇喇!』其實屋企人受得最多。」

龍小菌 經期亂晒

「因為太緊張成個人失調,搞到經期紊亂情緒又唔穩定,練練吓會突然間喊,覺得好辛苦點解要咁!但最慘係失眠。」

鄧洢玲 出街想打人

「我覺得精神壓力好大,成日發噩夢,時時刻刻打緊交,無啦啦起腳,連我啲狗都嚇親。最搞笑有次行街見到個人嘅步姿,跟住就心諗:『咦,佢有弱點喎!就想一嘢『舂』埋去!個腦入咗打交 mode。」

郭思琳 朋友當我男仔

「呢半年成日發夢自己喺個籠,又要 keep住睇物理治療同跌打,最慘係成日著運動衫,打交打到粗魯晒,身邊啲朋友都當咗我係男仔。」

劉燕妮 上到台好驚

「可能我最輕,所以係受傷最多嘅一個,但受咗傷仲要去練,但咁先訓練到意志同體能極限。仲要成日記住教練話:『你輕一磅,出拳就會輕 10磅。』我身形較蝕底,上到台好驚。」

撰文、攝影、攝錄:娛樂組


鍾意就快D Share啦!