掃呢頁CODE去手機

2016年4月14日 星期四

真實定幻覺?姜暮煙劉時鎮重遇相擁 __,

究竟係真實定幻覺?聽日就會知!《太陽的後裔》現正播出第15集,一開始,劉時鎮坐喺輪椅等姜暮煙,然後兩人一齊去約會,兩人更一同分享同一首音樂,不過因為姜暮煙一鬆手,令到劉時鎮爭啲受傷,不過竟然係姜暮煙發劉時鎮脾氣。畫面一轉,尹明珠同徐大英一齊食飯,而尹明珠就問徐大英有咩想講,徐大英話自己好迷茫,尹明珠話唔知兩人嘅關係係點,究竟係分咗手定未分手。徐大英就提出分手,因為決心轉行唔做軍人。出口術叫暮煙沖涼 ...


究竟係真實定幻覺?聽日就會知!

《太陽的後裔》現正播出第15集,一開始,劉時鎮坐喺輪椅等姜暮煙,然後兩人一齊去約會,兩人更一同分享同一首音樂,不過因為姜暮煙一鬆手,令到劉時鎮爭啲受傷,不過竟然係姜暮煙發劉時鎮脾氣。

畫面一轉,尹明珠同徐大英一齊食飯,而尹明珠就問徐大英有咩想講,徐大英話自己好迷茫,尹明珠話唔知兩人嘅關係係點,究竟係分咗手定未分手。徐大英就提出分手,因為決心轉行唔做軍人。

出口術叫暮煙沖涼

晝面再轉,到姜暮煙收到劉時鎮信息,問女方做緊咩,女方話準備沖涼,不過劉時鎮即搞笑話着衫點沖涼,搞到畀姜暮煙話佢變態,而劉時鎮突然出現,仲係咁叫姜暮煙沖涼,話姜暮煙講過會畀佢睇自己充滿水分嘅一面,之後,姜暮煙逼問之前VIP所送嘅金卡去咗邊,劉時鎮逃避問題,搞到姜暮煙勁嬲,到最後,劉時鎮都冇正面回答過問題。

畫面再轉,軍隊中最細嘅軍人去考試,成班軍人包括劉時鎮同徐大英現身幫佢打氣。之後,佢哋各自接到隊中嘅電話,接到新嘅任務,然後返咗軍隊。徐大英之後見司令軍,司令軍畀機會佢繼續做軍人,仲話叫佢做完任務後,好好返嚟同佢兼同佢個女一齊飲茶。徐大英答應會好好返嚟,司令軍之後撕爛咗徐大英嘅轉職單。

叫時鎮唔好死

畫面再轉,見到劉時鎮同姜暮煙,姜暮煙仲話點解你早咗到嘅,而劉時鎮就面有難色,表示要去「百貨公司」,仲話會去好耐,今次去三個月,而姜暮煙就喊咗,仲叫劉時鎮唔好受傷,唔好死,姜暮煙仲問可唔可通電話,劉時鎮抱住姜暮煙,話有時間一定會通話,仲話下一季節先見面,叫女方好好照顧自己。

姜暮煙突然回憶起之前嘅嘢,有種唔好嘅預感,劉時鎮Send信息畀姜暮煙話自己到達,姜暮煙之後不時Send信息畀劉時鎮,但劉時鎮並冇唔係好理佢。

時鎮大英齊中槍

畫面再轉,劉時鎮話再等10分鐘就可以返去,但突然有人開槍,現場非常混亂,而劉時鎮更中槍而失去意識。喺劉時鎮中槍時,回憶起佢嘅前輩,徐大英係咁話唔好、振作啲,點知連徐大英都中咗槍,作戰現場更爆炸,其他軍人不斷嗌隊長隊長。

畫面再轉,姜暮煙因為咩都唔知,所以係咁怨劉時鎮唔覆信息,而之後佢就同尹明珠一齊飲酒,仲因為嬲劉時鎮所以話要同其他男人飲酒,不過都係心軟,話如果劉時鎮返嚟一定會黐住劉時鎮。而軍人方面,就一直搵唔到劉時鎮同徐大英嘅屍體,而劉時鎮父親就拎住劉時鎮嘅相不斷手震,不斷喊。

徐大英下屬搵尹明珠,尹明珠仲以為徐大英返嚟,好開心,但係,徐大英下屬話徐大英死咗。而劉時鎮嘅下屬就去搵姜暮煙,話畀姜暮煙知,劉時鎮同徐大英死咗,姜暮煙驚到話咩都唔知,話:「我聽唔明,理解唔到。」而畫面一轉,尹明珠因為唔信徐大英死,而係咁鬧個下屬。

爆喊睇遺書

而因為每個軍人出戰前,都會寫定遺書,而劉時鎮嘅下屬將劉時鎮遺書畀姜暮煙,遺書寫話我守唔到承諾,對唔住!仲話可以同姜暮煙一齊嘅時間,都係燦爛嘅。

尹明珠就去咗搵司命軍,喊住問「唔係真架」、「唔會咁架」,司命軍講對唔住,仲畀封遺書尹明珠,尹明珠唔肯睇,話如果睇咗就係證明佢真係死咗,兼不斷怨父親,話如果唔係因為父親嘅阻止,佢哋會好幸福。

為時鎮簽保密書

之後,姜暮煙跑去軍謍,見到尹明珠,問尹明珠點解喊,又話尹明珠父親職位咁高,一定可以改變啲咩,尹明珠好傷心咁話:「係真架,佢哋返唔到嚟。」傷心嘅佢哋相擁而哭。而呢個時候,出現劉時鎮嘅遺書,話希望姜暮煙唔好喊!

劉時鎮嘅上司去搵姜暮煙,指一個星期後,官方會公布佢哋死於交通意外,所以要簽下保密書。姜暮煙問劉時鎮嘅上司,劉時鎮最後有冇守護到和平同救到人,個上司話有。所以姜暮煙就反問:「咁點解仲要我簽呢啲嘢。」但姜暮煙最後都簽咗,因為佢認為劉時鎮會想佢咁做,然後,姜暮煙回復自己日常嘅醫院生活。

暮煙寄情工作

劉時鎮死後,姜暮煙沈醉於工作,成日都唔返屋企,同係咁做手術。姜暮煙仲話自己依家只係工作、工作同工作,但一但諗起劉時鎮嘅死,佢就覺得自己就嚟癲,然後喺朋友面前大喊,而尹明珠再次被派兵,所以去搵姜暮煙,同姜暮煙講聲,仲送咗個着軍服嘅公仔畀姜暮煙,話係離別禮物,仲話大家一齊將個公仔當係劉時鎮同徐大英,而尹明珠表明自己會被派兵於海外駐兵,姜暮煙又話佢一諗起劉時鎮,就諗起劉時鎮所講嘅承諾都守唔到,而姜暮煙之後就問尹明珠,佢同徐大英係點識!

之後,畫面回憶,徐大英就同劉時鎮講,佢同尹明珠拍緊拖。因為尹明珠喺幫徐大英手嘅時候,曾經要求徐大英要向劉時鎮講大話,個大話就係徐大英同尹明珠拍緊拖。

姜暮煙有幻覺

而姜暮煙因為經過以前同劉時鎮約會嘅地方,而又諗起男友,仲諗起男友當時同佢講「我愛你」。之後姜暮煙就真係當咗個公仔係劉時鎮,同公仔講嘢,仲出現幻覺,見到劉時鎮出現,兩人互相話掛住對方,姜暮煙喊住同劉時鎮講:「點解你冇返嚟。」然後見到姜暮煙攬住隻公仔喊。

真實定幻覺?

畫面一轉,姜暮煙同Daniel見面,姜暮煙表示自己要趕去海外烏魯克做義工,因為聽日就係劉時鎮嘅死忌,唔想忘記呢一日所以想做有意義嘅事。而姜暮煙去到外海做義工,雖然佢知道劉時鎮死咗,但佢都仲係不停聯絡對方,想同劉時鎮傾偈。

姜暮煙為咗悼念劉時鎮,去咗劉時鎮嘅地方,諗起甜蜜嘅回憶,又諗起劉時鎮同佢講過唔會受傷唔會死,然後不斷喊,之後突然收到對講機傳嚟要求協助,然後對講機傳出劉時鎮把聲話「Big Boss over」,姜暮煙又以為佢出現幻覺,而電話入面所傳畀劉時鎮嘅信息全部變已讀,之後對講機又講「Big Boss over」,劉時鎮仲對住對講機,講:「美女,你睇吓後面。」之後兩人終於見面,姜暮煙因為好急跑過去而仆倒,劉時鎮即去扶起佢,同姜暮煙講:「好耐冇見。」姜暮煙話:「你仲未死?」劉時鎮緊緊同姜暮煙相擁,仲講咗句「對唔住。」


來源 source: http://hk.on.cc
鍾意就快D Share啦!