【首次合體出騷】谷胸楊怡10月2號擺酒 謙謙：盡擺啦，四五十圍左右
2016-05-31 13:20:00 HKT
(採訪：黃曉妍)(攝影：葉君海)
楊怡同羅仲謙今年三月秘密喺英國註冊結婚，一對新人結束成婚之旅返港後一直各有各忙，羅仲謙忙於宣傳新片，楊怡啱啱約滿無綫，自由身出席下電台活動商場騷keep住人氣。講開又講，楊怡做咗人妻之後，多咗著短褲仔騷長腿喎!
一對新婚夫婦到今日先至有機會合體——出席公開活動，齊到銅鑼灣出席一家美容中心開幕，兩人打扮到成封大利是咁，楊怡仲低胸晒身材。做咗人妻之後，楊怡真係熟晒！
活動上，楊怡除咗幫老公做下手部護理之外，又扮錫錫，仲即場宣佈兩人將於十月二日喺香港The Ritz-Carlton擺酒。點解揀呢日？佢哋話:「因為十月一號係國慶日，十月二號普天同慶，搵師傅擇過日子，揀呢日對所有屋企人都好好。」楊怡都話:「係呀，嗰日全日都係好日。」
咁會擺幾多圍？有人提議擺二百圍，楊怡聞言即謂:「擺百零二百圍都好喎!」謙仔笑言:「盡擺啦，四五十圍左右啦!」兄弟姊妹團仲度緊。
兩人今次以夫妻檔上陣，咁酬金應該係收貴啲，可以擺多幾十圍啦。據聞兩人酬金有六位數……仲係六位尾數酬勞，係唔係？楊怡問謙仔:「你頭先講嗰句係點講0架？」謙仔笑言:「咁兩個人一定比一個人貴0架啦。」楊怡話:「希望越嚟越多啦!(係咪六位數近七位？)一定係六位數啦，係一個好開心嘅價錢，同埋一齊出席活動真係好開心。」原來今次係兩人第一次一齊賺外快，之後當然陸續有來，楊怡話:「大家都好想搵一啲gimmick多啲嘅，(好似張智霖兩公婆咁夫妻檔？)我唔介意呀!」
來源 source: http://hkm.appledaily.com
|
鍾意就快D Share啦！
|
|
|