53歲鄭敬基（Joe）早前宣佈再婚，同拍拖8個多月、細自己19年嘅教友Angie喺北角基督教國際神召會拉埋天窗，以基督教儀式進行婚禮，有live band伴奏。今日係鄭敬基大日子，問到心情如何？鄭敬基就話：「暫時好平靜，今日我一啲嘢都無郁過，多得啲兄弟啦，好似有NBA球星(指住錢嘉樂)。」錢嘉樂即笑住話：「Well，我成日佐敦芬蘭浴㗎！」鄭敬基問佢今日幾點起身，佢答：「我真係唔覺意講咗粗口，下次真係咪制呀！」接新娘一刻，佢話：「我將會同大家分享人生最重要一刻啦，真係好多謝，嚟一個hug先！」跟住逐一同啲兄弟嚟個擁抱！到同錢嘉樂擁抱時，佢就好搞鬼咁話：「我唔係第一次聽㗎喇呢啲嘢！」佢咩意思，大家懂的！跟住行去接新娘，鄭敬基不停咁講多謝啲兄弟，錢嘉樂就話我真係唔係第一次聽，由今朝7點鐘起身，攞車時已經講，做兄弟真係有今生冇來世，頭先又講，真係呢一過50歲嗰啲人呢，一樣嘢好似國內前排都好興㗎嘛，重要嘅嘢要講三次，佢唔係㗎，佢八次以上㗎！」Joe就好心急話要拑鐘，嘉樂就話唔好俾人知你心急，價錢就唔同架嘛，經過一輪接新娘環節，佢哋去咗北角基督教國際神召會舉行婚禮，以簡單佈置為主，Joe仔女都有嚟，麥包麥長青、伍允龍等到場觀禮，Joe同親友先進場，新娘子就繑住爸爸進場，新娘子進場時明顯好緊張，新娘子爸爸交阿女隻手畀Joe手上，則拍拍Joe講：「恭喜你，佢真係好彩。」
|
鍾意就快D Share啦！
|
|
|