鄭敬基前日以53歲之齡再婚，迎娶年輕19年的圈外女友Angie，一對新人前晚於大潭陽明山莊擺喜酒，除伴郎錢嘉樂與太太湯盈盈外，當年與鄭敬基合唱熱爆K歌《酒杯敲鋼琴》的黃寶欣、李逸朗及伍允龍等均有到場飲喜酒。
繼婚禮於facebook玩直播後，鄭敬基前晚婚宴亦全程在fb直播，當一對新人趁母親節前夕送禮物給兩位媽咪時，錢嘉樂突然走上台問：「究竟你外母大定你大？」全場賓客起哄，鄭敬基亦大方回應說：「我大啲。」直認自己年紀大過外母。
仔女致辭極溫馨
婚宴上，司儀宣佈鄭敬基的25歲長子家揚將於明年8月20日大婚，鄭敬基做完老襯後再做老爺！司儀問獲悉父親結識了新女友及要結婚後有何反應，家揚笑說：「Cool！Alright！好呀。我話幾時發生㗎？But我好開心囉！」之後家揚大談對父親感受，一度哽咽，他說：「爸爸我戥你同Angie好開心……你哋兩個都唔perfect，但你哋唔perfect都繼續包容大家嘅唔perfect、繼續相愛，用你哋啲愛嚟感染隔籬啲人……可能好多人覺得我係乖仔，啲人覺得我support你，但其實係你support咗我25年。」鄭敬基聽罷感動得幾度落淚，又走上前跟囝囝相擁。
接着21歲索爆囡囡依揚說：「我成日喺加拿大都會好關心爸爸，冇一個老婆陪佢會點呢？𠵱家有Angie，真係好開心。Angie我真係好多謝你，你咁愛錫爸爸，佢咁怪，我唔知邊度搵到你，你又冇乜所謂，爸爸我為你好開心，祝福你兩個！」再度眼濕濕的鄭敬基上前攬住囡囡，而囡囡又跟父親和Angie抱擁，場面極溫馨。及至婚宴尾聲，鄭敬基邀請黃寶欣上台合唱《酒杯敲鋼琴》，全場歡呼聲不絕。
撰文：魯吉
|
鍾意就快D Share啦！
|
|
|