人生勝利組麥明詩(Louisa)，集十優、劍橋法律系畢業生同時亦係港姐冠軍，銜頭水蛇春咁長，男友林作叮噹碼頭，既係英國牛津畢業生，又係執業大律師，同時家底亦相當豐厚。去年佢參選區議會，家住麥當勞道嘅林作，斥資約620萬購入星河明居一個單位做選舉心戰室，真係落足本。林作現時同媽咪家住麥當勞道傳統豪宅嘉年大廈一個1,700呎(坊間一直傳係3,000呎)實用面積單位。早喺兩個月前，林母見樓市有下滑趨勢，咁啱見到同屋宛同座數有罕見複式單位放盤，同業主再三議價後，上星期終扑鎚，豪擲6,500萬，購入同座一個3,400呎複式單位。睇番成交紀錄，已有59年樓齡嘅嘉年大廈，成交甚少，對上一次已經係1月8號，成交價$3,030萬，面積1,697呎，呎價$17,855。據知，林母購入同座數複式單位，目的係留畀阿仔將來娶老婆用，住樓上樓下，方便一家人互相照顧。亦即係話，麥明詩未過門，就有機會收到未來奶奶呢份超級大禮。其實林作同麥明詩拍拖兩年多，林母對呢位未來新抱仔印象一直唔差，成日明示暗示要阿仔箍實女方，更試過喺佢哋面前催婚，但林作同麥明詩依家為事業搏殺，所以只當林母說話係耳邊風。如今林母出動「殺手鐧」買定豪宅，唔知會唔會令一對小情侶心動呢？今日記者致電林作，對於媽咪買大屋打算娶新抱，佢「哈哈」兩聲話：「我唔知佢(林母)買嚟做乜喎，佢有佢嘅打算，可能見近排樓市跌咗，所以決定入市，有可能用嚟投資啩！」雖然林作表明層樓係屬於母親，但買樓前亦都試過陪佢睇過呢個樓盤，認為上手業主裝修幾啱心水，所以唔需要再有咩大改動。問佢係咪同女友麥明詩好事近？林作笑笑口話：「唔會啦，大家事業先啱啱開始。」對於媽咪買樓催婚，林作就話自己冇傳宗接代壓力，相信母親係新潮人，應該冇呢個意思。不過佢就承認媽咪好疼錫Louisa。「佢成日叫我生性，要珍惜Louisa，話佢係好女仔，睇得出佢好錫佢，對佢印象好好。」
|
鍾意就快D Share啦！
|
|
|
