掃呢頁CODE去手機

2016年5月29日 星期日

【又迫我睇蔡思貝?!】花旦缺貨 鍾嘉欣要生仔 李施嬅姚子羚趕嫁有錢人 __,蔡思貝,鍾嘉欣,嘉欣,李施嬅,李詩韻,李嘉欣,姚子羚,

大台近年為咗綁實花旦、小生約,短則加監5年,長則加監8年或以上,搞到藝人雞飛狗走,除咗阿佘唔肯續約,要另起爐灶外,有份量嘅花旦,好似楊怡、胡杏兒、徐子珊近年亦先後離開大台,至於陳茵媺同鍾嘉欣,亦因為要排隊生仔嫁人,要暫別幕前。花旦走吓一個,走吓又一個,原本屬於花旦第二梯隊嘅胡定欣,大台為咗要舖路將佢捧上一線,舊年喺台慶頒個視后俾佢,賽果令人嘖嘖稱奇,不過事後有網民質疑胡定欣未夠料做視后,變相大台愛 ...


大台近年為咗綁實花旦、小生約,短則加監5年,長則加監8年或以上,搞到藝人雞飛狗走,除咗阿佘唔肯續約,要另起爐灶外,有份量嘅花旦,好似楊怡、胡杏兒、徐子珊近年亦先後離開大台,至於陳茵媺同鍾嘉欣,亦因為要排隊生仔嫁人,要暫別幕前。花旦走吓一個,走吓又一個,原本屬於花旦第二梯隊嘅胡定欣,大台為咗要舖路將佢捧上一線,舊年喺台慶頒個視后俾佢,賽果令人嘖嘖稱奇,不過事後有網民質疑胡定欣未夠料做視后,變相大台愛你變成害你。而其他仍然留喺大台嘅姐仔,好似李施嬅、「民選港姐」朱千雪、「表哥」姚子羚、「最佳女友」唐詩詠、「香香公主」岑麗香,一係等嫁人,一係等入雪櫃。其中李施嬅、姚子羚都係等嫁個有錢人嗰隻。李施嬅男友係投資公司董事總經理,同居貝沙灣,明係等嫁做少奶奶;為配合男家低調作風,李施嬅近年減少接job;姚子羚呢,就有個的士行太子爺男友鄭子邦,家族資產逾億,男友錫到佢燶,都係疊埋心水等嫁。至於香香岑麗香,對愛情全情投入,不顧處女黨形象高調認戀情,待嫁指日可待。至於鍾嘉欣,去得更「盡」,秘婚仲嫁返加國(即係佢家鄉),依家陀緊B。雖然嘉欣BB話就話一定會返TVB,但幾時呢?唔知㗎!朱千雪人靚樣甜身材勁,最重要係有觀眾緣。問心,佢喺《EU》嘅角色同蔡Baby一樣咁煩膠,但你睇嗰陣,你係enjoy俾佢煩,因為靚吖嘛!但大台只係力捧陳凱琳同蔡Baby劉佩玥嗰啲,千雪BB都心淡,請假讀書進修滿約就轉行走人喇。咁「最佳女友」唐詩詠呢?《鐵馬戰車》佢做女一,耳目一新,外間反應都幾好,但詩詠BB始終做二線做得耐,仍未擔得起一套劇,除非男主角夠份量帶得起詩詠BB又唔同,但無綫家陣都好缺小生,搞到要搵班年紀有番咁上下嘅中生返嚟……至於黃翠如,權鬥犧牲品,都係做住綜藝節目先啦。又講吓亞視幫,陳煒過咗大台咁耐,到最近陣亞視除先冇咁濃,佢擔正女一嘅《火線下的江湖大佬》,有口碑有收視,可惜光環就俾晒劇中嘅Ken哥鄭則士同黃光亮。而之前同佢傳不和嘅萬綺雯,一直唔肯簽約做親生女,舊年5月約滿索性放假休息。之後佢決定以部頭形式同大台合作再拍劇,擺明唔憂做。數來數去,數來又數去,「方方面面」都數勻晒,外強中乾嘅大台,每次開新劇,惟有局住無限loop演技仍屬幼兒班嘅陳凱琳同蔡思貝等上位姐仔。難為佢哋,更加難為咗電視面前嘅觀眾。嚟緊,蔡Baby又有新劇上喇!

演技仍屬初哥嘅陳凱琳。 高分貝bb。 李施嬅留喺大台咁耐,仍然未上到一線。
唐詩詠有人緣,可惜大台將佢放埋一邊。 千雪bb同樣有觀眾緣,弊在冇後台。 現時為止,岑麗香算係最有機會上一線嘅姐仔。
有指翠如bb早排因為權鬥,搞到冇劇拍。 胡定欣舊年終於攞到視后。

鍾意就快D Share啦!