未夠廿四個鐘已經搵番五個喇，網絡嘅力量係幾咁強大！
今日網上流傳一段「尋人啟事」短片，一出街就得到熱心人士李克勤、陳慧琳、任賢齊、梁漢文等等幫手，最快最新嘅《東網》當然亦急不及等幫手尋人啦，等等先，咩話？要搵返1987年係紅館出現過嘅小朋友？
校長出山幫手
原來徐小鳳將於7月28日喺紅館開騷，喺籌備演唱會中，突然好回味1987年有一幕係成班小朋友喺巨型燈泡裙內「捐」出嚟，好想同一班小朋友再次重聚！而「尋人啟事」短片一出，廿四小時唔夠就有五個「小朋友」報到，連當年幫手安排小朋友上台演出嘅校長都「出山」幫手，主動留言爆料話其實因為當年怕小朋友攰，而每晚分別安排唔同組合演出，依家開始搵緊當年啲學生啊！小鳳姐今次真係遇到貴人喇，不過...小鳳姐當年足足開咗二十幾場，如果每晚都唔同小朋友，數下手指咪有二百幾個小朋友！
唔知實際小朋友人數
記者聯絡小鳳姐，小鳳姐就話公司已經話咗佢知反應好好：「好開心好多謝全港市民朋友咁幫手，希望大家再繼續努力幫手，幫我搵番班小朋友，到時我哋一齊喺紅館共聚下。」講到小朋友的人數眾多，佢就笑言：「我真係唔知有幾多個小朋友參加過1987年嗰次演唱會呀，剩係記得係方方幼稚園幫忙安排。如果真係有二百幾人都好呀，紅館坐萬幾個觀眾，一定坐得晒㗎！」
來源 source: http://hk.on.cc
|
鍾意就快D Share啦！
|
|
|
