黎明（左）首次做企堂，就畀嚴格嘅女領班「再培訓」。
向來官仔骨骨嘅黎明（Leon），簽約大陸真人騷後乜都要做，今次仲要做埋企堂，即係大陸講嘅「服務員」。呢個任務，對於Leon嚟講當然冇難度，話晒佢經常出入五、六星級酒店，就算未做過企堂都見過唔少大場面，所以佢原本都信心十足咁話：「我不介意做服務員，因為每樣東西都是從底層慢慢開始學嘛。」
不過當Leon換上唔稱身嘅侍應制服後，天王頓時變咗平民，仲要接受女領班嘅「再培訓」。由斟茶開始，Leon就係咁挨鬧，女領班Keep住話：「不對…不對…不對…你怎麼可以這樣呢！」名副其實天王都冇面畀，而一向甚有大將之風嘅黎明，亦畀女領班鬧到頭耷耷兼騰晒雞，認真陰公。
Leon：希望她能諒解我
之後嘅打擊仲大，上菜時，女領班指Leon錯漏百出，仲話黎天王冇正確使用托盤：「你這樣倒在客人身上怎麼辦？你知道客人一件衣服有多貴嗎？你覺得你今天的工資能賠得起他的衣服嗎？」黎天王聽完即時啞咗，急忙為自己解釋，不過女領班完全唔理，仲要指責Leon藉口多多。Leon事後表示，希望女領班可以諒解他：「我完全理解她，但我剛下飛機（很累），有些脾氣，我也希望她能諒解我。」畀人鬧到咁，都可以調番轉話希望人哋可以諒解自己，黎天王真係夠晒大器。
來源 source: http://hk.on.cc
|
鍾意就快D Share啦！
|
|
|
