掃呢頁CODE去手機

2016年5月5日 星期四

大台救亡再抄 崔建邦做真人騷打 MMA [壹週刊 - 1365] __,大台,崔建邦,TVB,M1,

娛樂偵訊大台救亡再抄 崔建邦做真人騷打MMA風水輪流轉,不再一台獨大的無綫,被四月開播的ViuTV打個措手不及,劇集收視下跌至平均只有二十點,為救亡,無綫除調動影帝鄭則士孭飛的《火線下的江湖大佬》臨時頂上,取替原先準備出街的《爸B有話兒》。見觀眾對打到飛起的《G-1格鬥會》有反應,原來已安排崔建邦停工半年受訓,參加職業MMA賽做真人騷,擺明抄橋。睇中崔建邦大製作《殭》收視直插,更一度跌至二十點,被 ...


娛樂偵訊

大台救亡再抄 崔建邦做真人騷打 MMA

風水輪流轉,不再一台獨大的無綫,被四月開播的 ViuTV打個措手不及,劇集收視下跌至平均只有二十點,為救亡,無綫除調動影帝鄭則士孭飛的《火線下的江湖大佬》臨時頂上,取替原先準備出街的《爸 B有話兒》。

見觀眾對打到飛起的《 G-1格鬥會》有反應,原來已安排崔建邦停工半年受訓,參加職業 MMA賽做真人騷,擺明抄橋。

睇中崔建邦

大製作《殭》收視直插,更一度跌至二十點,被 Viu搶去五至八點收視,無綫不敢怠慢,向來在抄橋方面有番咁上下功力,眼見一班二打六在《格鬥會》打到變豬頭血肉橫飛,即時抄得就抄,安排曾經打過職業賽的崔建邦停工半年接受特別訓練,參加之後的職業拳賽。

「佢哋遲啲安排 Amigo(崔建邦)去日本同韓國受訓,喺香港亦會日操夜操,之後參加職業賽,成個受訓同比賽過程會全程直擊。因為係職業賽,一定比《格鬥會》血腥,加上 Amigo知名度高咁多,佢哋覺得節目出嚟一定有 noise。」知情者說。

近排狂操嘅崔建邦,喺 ig放好多做運動相,又話謝絕一切燃燒生命同影響健康活動,原來佢秘密練兵幫公司挽收視出戰。

去韓國出戰前,班老友同崔建邦餞行,為佢挑戰一個不可能嘅任務打氣。

有西洋拳同泰拳底嘅佢,打 MMA職業拳賽雖唔算難倒佢,但為迎戰點都要搏命操 fit嘅!

打七場贏六場

未入行前,崔建邦跟徐家傑學了十一年西洋拳,試過七場贏六場的記錄,算是有資格去玩,不過為要觀眾睇得過癮,現正考慮加多幾個藝人參加。

「今次搵 Amigo去參加嘅係職業比賽,真係有危險,不過為咗谷收視,加上 Amigo本身都想有突破,所以一傾就掂。反而佢哋再想加入其他幾個藝人,好似陳志健同林子善,佢兩個望落好大隻,又好似好打得,但如果真係落場,就未必夠班,所以到依家都未落實。」知情者說。

ViuTV重頭節目《 G-1格鬥會》跑出,贏口碑贏話題,故要救亡嘅大台一於有樣學樣,搞男子版。

由舊愛 Kelly(左圖),到轉食林姍姍細女野人(李怡),崔建邦的戀事比事業精彩。唔想俾外間着眼佢嘅私人生活,唯有冒險搏一鋪,接拍 MMA真人騷。

據悉大台嘅 MMA真人騷,除派崔建邦出戰,還在密斟其他藝員,包括健身教練陳子健同近排操到鬼咁大隻嘅林子善。

為救重頭劇《殭》,大台破格為劇集搞《殭女神》選舉,希望力挽曾被新台打擊至下滑的收視。

救亡陣營

曾拍《老表,你好 hea!》獲收視佳績的黃光亮,加埋老戲骨鄭則士,對大台而言是收視保證,故調走原先準備出街,李思捷孭飛的《爸 B有話兒》,改由他們合演的《火線》上陣,好合理。

撰文、攝影、攝錄:娛樂組


鍾意就快D Share啦!