《天煞地球反擊戰》（Independence Day）名導羅蘭伊馬力（Roland Emmerich）事隔20年打造續集《天煞地球反擊戰：復甦紀元》（Independence Day：Resurgence，簡稱《天煞2》），原版經典角色回歸拍住新兵力戰已經夠噱頭，仲搵嚟Angelababy加盟做要角，戲份不少而且仲有感情線，風頭直逼近年密密參演荷里活電影嘅「進擊的雙冰」李冰冰與范冰冰！
Angelababy去年曾參演荷里活電影《刺客特攻47》（Hitman：Agent 47）飾演男主角嘅指揮官，不過得幾句對白兼出鏡唔多，今次拍《天煞2》完全係升呢，等《東網》記者同大家深入解構一下！
1. 演新兵要角
今集搵來五位新兵加盟，佢地五個都係拯救世界嘅關鍵，做戰機機師去前線打外星人，當中包括里安漢斯禾夫（Liam Hemsworth）及Travis Tope，飾演上集英雄韋史密夫愛子嘅Jessie T.Usher，飾演上集總統愛女嘅Maika Monroe以及Angelababy。佢主演角色Rain係代表中國嘅戰機機師，飾演太空基地話事人嘅新加坡男星黃經漢就係Rain嘅叔叔。
2. 鏡頭對白3倍上
Angelababy上次於《特》片中僅得幾句英語對白，今次出場有中英語對白，仲多數講英文，另有多個大頭特寫，傷感落淚與上戰場「打飛機」嘅肉緊場面都有，雖然對白較短，不過亦比於《特》片演出多足3倍！
3. 感情線
唔止有親情線及主打戰機殺敵嘅場面，Angelababy於電影中仲有感情線，被五個新兵要角之一的Travis睇中為「女神」，一見面即立志學普通話力追，Angelababy仲嫌對方僅得23歲半，年紀太細，請對方食檸檬，不過二人苦戰過後亦總算擦出少許火花！Angelababy拍荷里活片都有「收兵」戲，認真不負女神之名！
4. 軍中風頭人物
Angelababy於中港做慣女神，去到荷里活拍戲都做女神，唔止有感情線呀，仲係軍中大明星，當中有一幕佢返到基地，大批人（多數係雄性）擁上前要求佢簽名，相信同佢平日生活都幾似！
5. 有望拍續集
今集結尾有鋪續集伏線，五個新兵仲士氣高昂咁嘅款，隨時孭飛拍續集！
|
鍾意就快D Share啦！
|
|
|
