慘！慘！慘！英格蘭「臨尾香」再中歐國盃魔咒！港人至愛嘅「三獅兵團」今晨喺B組出戰俄羅斯，雖有新星艾歷迪亞憑罰球入波先開紀錄，但眼見3分穩陣落袋之際，卻喺補時階段被俄軍隊長華斯利比里蘇斯基近門建功扳平，追和1比1完場。翻查歷史，英格蘭過去8次出戰歐國盃分組賽首戰從未嘗贏過波，果然今次都唔例外，補時都捱唔住，想話首度問鼎冠軍，難難難呀！
將占美華迪擺落後備席，隊長朗尼移任中場嘅英格蘭，今仗上半場可算佔盡上風，控球率多達6成。比賽初段「三獅兵團」以利物浦前鋒拉爾拉拿最活躍，此子先後兩次接應隊友基爾獲加妙傳，殺入禁區勁射，可惜一是逃不過俄軍門將艾堅菲夫十指關，一是僅僅斜出。28分鐘，英格蘭曾經攻破俄軍大門，無奈射入波的哈利卡尼被判越位先。之後佢哋仲有朗尼後上禁區邊勁射又被艾堅菲夫救出，全力防守嘅俄羅斯總算保住半場不失。
換邊後英格蘭攻勢略為放緩，俄羅斯連番嘅角球曾經令「三獅」防線出現混亂。62分鐘，俄羅斯前鋒史莫洛夫禁區外嘅熨射更幾乎收死英格蘭門將赫特，可惜僅僅貼柱出界。捱過一段劣勢，英格蘭之後再次搶回主動，71分鐘，史達寧左路地波傳中，後上嘅朗尼禁區內撞射被艾堅菲夫撲救後再中柱彈出，已為俄軍防線響起警號！
2分鐘後，英格蘭禁區邊得一罰球，熱刺中場艾歷迪亞右腳狂抽直飛死角入網，終於打破悶局，助英軍領先。之後俄軍積極反撲，但始終欠缺威脅射門，但一直未放棄嘅佢哋，去到補時2分鐘，由隊長華斯利比里蘇斯基接應傳中，近門頭槌攻門笠過英軍門將赫特入網，終於追和1比1完場，令英格蘭上下失望心碎！
來源 source: http://hk.on.cc
|
鍾意就快D Share啦！
|
|
|