黎明（Leon）嘅唱片公司A Music，走下一個走下又一個，正當大家以為成間公司得番佢同馬天佑兩個男丁，原來Leon秘密簽咗個新女仔——JC。對J字好似情有獨鍾嘅黎明，簽番嚟呢個女仔叫JC，唱片公司上周二將佢嘅國語新歌《說散就散》放上網，正評不絕，但AMusic就用番以前嗰套，冇公開JC個樣，只係見到佢嘅側面，聲稱JC今年18歲，係土生土長香港人，啱啱考完DSE，其他嘢就無可奉告，幾時出嚟見人都話未知。(新聞連結： http://bit.ly/294yaRF )不過呢！作為一位地球人，身邊又有咁多地球人，要完全隱藏一個人嘅身份，真係唔易嘅，《蘋果》今日就收到讀者報料，佢話JC今年18歲，中文名叫陳詠桐，英文名就叫Jennifer，佢之前喺嘉諾撒聖方濟各書院讀書，啱啱考完DSE。讀者羅小姐透露：「佢喺學校嘅成績屬於中上啦，因為係女校，咁女仔都會一堆堆玩，佢身邊都有好多女仔圍住佢㗎，佢就好似大家姐咁囉！」問羅小姐知唔知JC家底係咪好厚？佢就話唔太清楚：「唔知佢係咪好有錢，但一定唔差囉，我知佢係家中獨女，之前有個男朋友，不過依家分咗手。」問羅小姐覺得JC人緣好唔好？佢話只係一般，又話JC有時都覺得自己係女神咁，但就話佢彈琴都唔錯嘅。不過，睇過JC放喺ig嘅相，佢屬唔屬於女神呢就見仁見智，但係佢唔介意晒三點式泳照，就肯肯定佢對自己嘅身材都有一定信心嘅，再加上佢帶點卡通feel嘅一字眉，都幾可愛吖！
|
鍾意就快D Share啦！
|
|
|
