掃呢頁CODE去手機

2016年7月14日 星期四

半年俾猷亨飛 陳瀅秒殺張振朗 [壹週刊 - 1375] __,陳瀅,張振朗,猷亨,M1,

早前陳瀅孖張振朗拍新劇《全職沒女》而熟絡,劇中雖然飾演兩夫婦,但在人前人後都繑住手,好入戲。娛頭半年俾猷亨飛 陳瀅秒殺張振朗呢個世界真係變幻莫測!女神陳瀅與賭王四房公子何猷亨拍拖以來甜過糖水,加上四太梁安琪開綠燈,故不時傳出入門有望。不過世界每分鐘在變,相戀半年,兩個月前,猷亨主動提分手。童話未有成真!女神甩拖,最開心是一班餓男,連有女友Apple陳芷尤的張振朗,一樣唔放過機會,晨早陪陳瀅去將軍澳 ...


早前陳瀅孖張振朗拍新劇《全職沒女》而熟絡,劇中雖然飾演兩夫婦,但在人前人後都繑住手,好入戲。

娛頭

半年俾猷亨飛 陳瀅秒殺張振朗

呢個世界真係變幻莫測!

女神陳瀅與賭王四房公子何猷亨拍拖以來甜過糖水,加上四太梁安琪開綠燈,故不時傳出入門有望。不過世界每分鐘在變,相戀半年,兩個月前,猷亨主動提分手。

童話未有成真!女神甩拖,最開心是一班餓男,連有女友 Apple陳芷尤的張振朗,一樣唔放過機會,晨早陪陳瀅去將軍澳食早餐,拍完劇收咗工,仲叫住對方「老婆」,冧爆。

投訴男友冇得閒

爆出陳瀅與四房大公子何猷亨拍拖,大台小花個個葡萄!

熱戀期過後,二人最後一次公開露面,已是今年三月尾;陳瀅被發現陪男友加埋超盈、超欣一齊去馬來西亞旅行。去完何家旅行團後一個月,早前陳瀅出席活動時卻一反常態,拒再公開談感情事;到四月底,出席一個以花花為主題的活動時,被問到有否收過男友猷亨送花,她更勁耍太極:「好多人都有送。」

忽然低調,原來逝去感情留不住。據了解,二人已甩拖兩個月。

「猷亨咁後生,又係個極筍盤,點會為咗一棵樹放棄成個森林,加上要返工睇實屋企啲生意,成日要返澳門同周圍飛, Jeannie(陳瀅)就成日投訴男友唔得閒陪自己!咁投訴得多,男人實唔 like,仲要猷亨不嬲唔鍾意女人黐身,咁不如算其實四太都好鍾意 Jeannie,猷亨啲女友好少可以咁快融入佢哋屋企, Jeannie真係少數。」知情人說。

早餐撐枱腳

劇已拍完一段時間,但日前一個早上,陳瀅與張振朗「拍拖」到將軍澳食早餐,陳瀅無懼素顏,以真面目展示劇中「老公」。

張振朗 chok住個身扮 Chilam,成功 kill掂陳瀅。

曾經融入何家

同猷亨拍拖時,陳瀅不時被御准出席男友家庭聚會,跟四太及妹妹超欣打成一片。

匿埋屋企喊

拍拖七個月就玩完,為免成為外界焦點,同時二人亦覺得無必要向其他人交代,決定順其自然,冇刻意宣布分訊,但劉佩玥、何雁詩等閨密就一早知情,大家輪流陪住因甩拖而心情低落的陳瀅。

「啱啱分手嗰段時間, Jeannie好唔開心,成日匿喺屋企,諗吓諗吓就喊,因為佢同阿 Moon(劉佩玥)、 Stephaine(何雁詩)係夾份租屋住,所以邊個得閒就負責陪佢,安排 Jeannie出埠去旅行、行山散心,就算阿 Moon有嘢做緊,都請咗幾日假,陪佢飛轉台灣,好唔話得。」

去年 12月,陳瀅偕猷亨拍拖赴北海道慶祝第一個聖誕節,兩喼去一車喼返,估唔到呢段關係咁快玩完。

與猷亨熱戀期間,陳瀅曾在 ig晒疑似男友送的鑽戒,難怪不時傳佢入門有望。

陳瀅被張振朗的笑話氹到鬼咁開心,連身旁路過的學生妹駐足,都未有發現。

返加拿大療傷

上星期六(七月九日)下午,好姊妹何雁詩做司機,送陳瀅去機場,出發飛溫哥華探外婆兼療情傷。

記者上前向陳瀅求證分手一事,她左閃右避,不願多談,「佢(指猷亨)好忙㗎!男人以事業為重嘛!」陳瀅說。

陳瀅重新掛牌,對一眾餓男絕對是好消息。尤其是近水樓台的大台小生,機會又來了。

在新劇《全職沒女》飾演陳瀅老公的張振朗,就成功攝位,就算《全職》已經煞科,二人的「夫妻」關係仍被保留。

有朝早記者便撞破二人在將軍澳歎早餐,女神最忌素顏見人,但一滴妝都冇,只戴住黑框眼鏡的陳瀅,在「老公」張振朗面前表現習以為常,可見二人交情不淺。

7月 9日(上週六)下午,陳瀅飛溫哥華探婆婆,記者在機場問她猷亨為何沒同行,她只輕輕帶過:「佢好忙,我鍾意佢都係因為佢勤力。」

陳瀅此行約飛一星期,她說回港後翌日便要開工。

當日老友何雁詩當柴可夫,由九龍站君臨天下寓所,載陳瀅去機場,更搵埋位飲茶,抵錫。

人前人後毫不避忌孖公仔的陳瀅與張振朗,在劇集煞科宴上又黐到實,儼如情侶。

扮張智霖勁氹

早餐當然唔係主菜!只見張振朗為搏女神一笑,不時 chok爆扮 Chilam,相當受落的陳瀅亦笑多過食,之後陳瀅更做埋司機,車埋張振朗走。

今年五月中,《全職沒女》如火如荼之際,其時剛甩拖的陳瀅心情奇差,劇中做一對的張振朗好快就聞到味,機不可失,出擊!

「 Owen(張振朗)識氹女仔,最鍾意扮 Chilam,一見到佢上晒身,啲女仔就冧晒。失戀嘅人最想有人呵住,佢周不時幫 Jeannie買早餐,收夜就買消夜,樣樣都照顧周到,仲開口埋口叫『老婆』,真真假假都氹到 Jeannie開心。」知情人說。

日前出席完活動,陳瀅獨自去買綠茶,其間顯得悶悶不樂。

今年 4月已跟猷亨分手的陳瀅,在 5月 20日刻意 po相說「 happy 520(諧音我愛你)」,以混淆甩拖視聽。

陳瀅甩拖後,同居密友劉佩玥及何雁詩日夜陪住,行山絕對是散心最佳活動。

張振朗同「 Apple」陳芷尤地下情四年,曾俾傳媒影到二人同居深并。之前 Apple借同男友合唱擊退龔嘉欣,唔知今次佢會用咩招數掃走陳瀅。

陳瀅在加國長大,自小跟婆婆一齊生活,感情好好。

陳瀅、張振朗不時把與劇中女兒的一家三口照 po上網,係咪戲假情真要當事人先知。

保鮮期有限

現年 23歲的何猷亨,是何家四房長子,家底厚朋友多,更遺傳賭王老豆 DNA,揀女友要樣靚,女神級更佳,雖然優質選,但保鮮期並不長。

劍橋 Sabrina

12年,跟同在英國讀書的 Sabrina陳可欣拍拖,女方被四太大讚聰明讀書叻,賭王亦曾公開俾滿分,在劍橋修讀經濟的 Sabrina回港後任職投資大行高盛分析員,在行內有女神之稱,但二人戀情一年就玩完。

陳凱琳

14年,猷亨在時裝騷認識港姐冠軍陳凱琳後,即發動攻勢,在對方 IG留心跡外,又公開叫對方女神,可惜鍾意大叔的陳凱琳冇反應,最後揀咗比她大 20年嘅鄭嘉穎。

劉佩玥

同陳瀅之前,被影到半夜探劉佩玥班,又做外賣仔送消夜,不過女方指二人只是好朋友,唔係拍拖。

梁政欣

跟劉佩玥傳緋聞冇耐,猷亨同時傳出跟在英國讀書時已認識的梁政珏胞妹梁政欣,由書友變拖友,二人被拍到孖住睇演唱會、行年宵。去年 9月,身為 P牌仔的他徵用老媽子的坐駕,飛車趕去為對方開 P慶生。

女人湯圓

出道四年,快將滿 29歲的張振朗,一向有女人緣。 11年讀藝訓班時,因為貌似黃宗澤,高層曾勵珍、樂易玲對他特別有眼緣,畢業後簽經理人約即獲力捧,短短四年,火速由配角上到擔正做《愛•回家》男主角。

樣似 Bosco,聲似 Chilam, 06年參加過英皇新秀大賽的他,亦破格獲大台另一話事人余詠珊歡心,俾機會他在《 Sunday扮嘢王》擔大旗,大台三大女高層都 like,得心應手。

女高層喜歡之外,張振朗跟《愛•回家》的女拍檔亦特別有緣。跟《愛•回家》侍應「 Apple」陳芷尤拍拖,新《愛•回家》的對手龔嘉欣對他又嗒晒糖,仲大晒親密合照向正印挑機,搞到陳芷尤借《東華》嘅「卡拉之星」環節,同男友 sweet合唱宣示主權。

女人為佢爭風呷醋,大小通殺張振朗前途無限。

撰文、攝影、攝錄:娛樂組


鍾意就快D Share啦!