熱爆娛樂: 帶住壓力去開工　高海寧失控嚎哭 [壹週刊

2016年7月21日星期四

帶住壓力去開工　高海寧失控嚎哭 [壹週刊 - 1376] __,高海寧,M1,

探熱針

帶住壓力去開工　高海寧失控嚎哭

無綫今年二月大地震後，杜之克升助理總經理擔大旗，統領重頭新劇《不懂撒嬌的女人》，二千八百萬元製作費，舊將林文龍、宣萱回巢孭重飛，一百萬一集，加上全實景拍攝，令有份參演又一直性感行先的高海寧，突然受壓。

日前劇組在九龍灣拍外景，帶住壓力去開工的高 Ling頻頻 NG，收工後更即時失控喪喊，爆煲！

煲劇做功課

是日劇組在九龍灣郵輪碼頭一間餐廳取景，回巢幫拖的林文龍、宣萱，以及王浩信、唐詩詠和高海寧都有份埋位；下午兩點左右，全世界齊人 stand by，只見林文龍劇本不離手，拍檔宣萱則坐埋一邊，培養情緒。

入行六年，以 34D拋胸出位的大台咪神高 Ling，是第二女主角，飾演林文龍女友，劇中跟林文龍前度宣萱有大量對手戲，沒有孭重角經驗的她，直言好大壓力。

「高 Ling個角色係個好內斂、唔外露嘅精明女人，同佢以往賣吓身材做花瓶好唔同；所以佢早早就做定功課，《法證先鋒》、《甄嬛傳》呢類考演員牌嘅劇，佢差不多煲晒，不過對高 Ling嚟講，做呢個角色真係好有難度。」劇組人員說。

其實高 Ling今次喊得幾有層次，未喊出聲前，佢拍完當日最後一場戲，執嘢走人時，已經冇心機冇表情。

林文龍同唐詩詠做對手戲時好認真，劇本不離手。

宣萱唔需要埋位，就匿埋一邊培養情緒。

忍到收工喊

角色新挑戰，還要同一班資深演員做對手，高 Ling終於爆煲！在郵輪碼頭取景當日，高 Ling收工離開時遇見同樣走得的唐詩詠，講了兩句，她突然失控，當場爆喊。

「高 Ling開工嗰陣已經好緊張，撞正嗰日講嘅對白又零舍繑口，佢講咗好多次都唔 OK，跟住就發自己𤷪𤺧，喺現場係咁話：『唔知點解做嚟做去都做唔到？』

「當時現場有咁多對眼望住自己，高 Ling愈 NG愈心急，更加愈講唔到。忍住捱到收工撞到唐詩詠，講起件事，佢先好似決堤咁喊；啱啱開工已經咁，嚟緊嗰啲場口有好大量內心戲，到時都唔知佢點算。」

見到唐詩詠，高 Ling即失控掩面爆喊。

早前拍王晶電影《賭城 2》，高 Ling大晒 34D白滑身材，呢幕水上電單車戲大晒冷，令人印象深刻。

新劇一班主要演員當中，入行六年的高 Ling年資算係最淺。

雖然被指戲屎，但早排先跟好戲佘詩曼合作《賭城群英會》，扮演兩姊妹。

新劇一班演員未埋位前，索性在碼頭餐廳歎茶傾偈。

宣萱同林文龍 N年前合作過《洗寃錄》，由於收視爆燈，之後添食開續集。

文龍宣萱執到正

百萬一集的製作，一班工作人員不容有失，要求高兼且分秒必爭。

「過往公司拍劇都係用三部機，可以好快拍完一場戲，但今次要講求質素，一部機拍時間用多咗，加上係實景，好多嘢要兼顧。

「其實唔只高 Ling騰晒雞，文龍同宣萱回巢頭炮，亦明知老細好睇重，喺現場更加執到正，成 crew人都步步為營，部劇要拍四個月，大家有幾 tense，可想而知。」一名劇組人員說。

林文龍同艾威都去過港視，有機被邀返娘家拍劇，證明他人緣唔錯。

暑期大收的《寒戰 2》，林文龍亦升呢跟梁家輝、郭富城有對手戲。

未夠班

08選港姐入行的高海寧，多年來雖然偶有劇拍，但多被安排做閒角，直到 12年，她開始「封胸」，唔再拋胸做遊戲節目，雖然拍劇機會多咗，不過，始終無法打動師奶觀眾俾 like，入唔到屋。

15年

有指高海寧拍《愛•回家》時，因演技差及師奶接受唔到而拖低收視，有網民更指名道姓，指因為是高 Ling做，所以失去睇《愛•回家》的意慾。

14年

內地經理人汪子琦，睇完《使徒行者》後有感而發，發微博勁踩高海寧。