結婚 14年依然恩愛，今年情人節，康子妮親自整蛋糕與老公慶祝。
娛樂偵訊
捱足 23年 850萬首做業主 林曉峰激讚康子妮：係佢成全我！
今年一月，林曉峰以 850萬購入大埔逸瓏灣一個近千呎單位，與陳小春、王祖藍做鄰居，入行超過廿年，從未持有過物業的阿 Lo，第一次做業主，全賴兩年多前巴打鄭伊健吹雞搞古惑仔《歲月友情》演唱會，加上一班古惑佬去年客串內地電影《煎餅俠》爆紅，一年間連踩 21場內地巡唱。
45歲，終於上到車的林曉峰，激讚老婆康子妮：「多得老婆陪我捱，為咗成全我，放棄咗自己理想，佢真係好堅！」
十四日做好決定
一三年，鄭伊健吹雞，拉埋陳小春、謝天華、錢嘉樂、林曉峰舉行古惑仔《歲月友情》演唱會，反應好，開完 part 1又開 part 2，兩年多以來不停巡迴，一班古惑佬豬籠入水，林曉峰亦於一年間，賺到一層樓。
今年一月，林曉峰以 854萬買入大埔逸瓏灣一個近千呎單位，雖然與同屋苑業主王祖藍（過億）、陳小春（七千萬）單位難以相提並論，但捱咗廿幾年，終於上到車。
「其實係舊年好偶然機會下，有個地產朋友同我哋講話有個筍盤，睇完樓兩個禮拜就扑槌買！」林曉峰說。
由攝影助手做起，林曉峰做勻香港大小電台電視台，主持司儀拍電影，瓣瓣掂，但要養老婆同兩個仔，每月開支一大條數，多年來，已經錯過幾次買樓機會。
「唔係無心郁過，但唔好話買，每次想咋，咁啱嗰個時間就係最波動。好似○三年大仔出世，就遇着沙士，當時大部分人都唔敢輕舉妄動，乜都唔做得，因為環境變數太大，加上工作方面亦一直有啲變動，錯過咗幾個機會。高時我買唔起，低水時又入唔到，係今次撞到正，先成事！」
戒鹽糖減肥
四十五歲第一次做業主，古惑仔演唱會，的確為林曉峰帶來很多。
「以前過咗去，又唔覺有乜辛酸，反而係我其實好鍾意運動，好鍾意大隻，但以前拍戲啲人覺得我肥肥哋幾得意，就 keep住肥，但外邊嘅工作例如幫啲大型宴會做 MC，著起套西裝都覺得唔係幾正統，肥得得咁！
「古惑仔演唱會係俾到我另一個階段，當時因為決定赤膊打鼓，我就搏命做 gym，打羽毛球，食嘢戒晒鹽糖，我知道自己係唔可以偷懶！」
老婆犧牲大
一班古惑佬在內地爆紅，連帶林曉峰亦唔唱唔知佢咁唱得，唱《海闊天空》大獲好評，但對當事人來說，背後意義更大。
「啲人俾我嘅反應係，原來你唱得咁好，係多咗好多人搵我做商演唱歌。講真，唱《海闊天空》我每一次都喊！因為呢首歌好代表我同我太太，係我自己嘅心聲！太太係我支柱，佢成日話阿 Lo你得嘅！點解你成日話自己唔得，俾好多鼓勵我！幫我解決晒所有麻煩事！」林曉峰感觸地說。
結婚十四年，現年三十九歲的康子妮，○○年由加拿大返港加入無綫，兩年後便嫁給林曉峰，婚後逐步淡出，全身照顧家庭，兩個兒子亦已經十二和十一歲。
「佢其實叻到不得了，大學畢業，讀古典音樂，係演奏級，音樂造詣好好，好鍾意唱歌，但為咗成全我，背棄自己理想，去照顧家庭。我想講嘅係，康子妮，你好堅！」
還有一個遺憾
在內地名利雙收，但林曉峰卻自嘲，反而在香港經常被人叫錯名。
「總之，香港以外嘅地方，大家都會認得我，對我有一定支持，反而喺香港，無乜人會嗌得出我個名，佢哋會叫我曾志偉、錢嘉樂，甚至乎林峯、謝霆鋒乜都試過，但就嗌唔到我個名，呢樣嘢，確係幾令我感到尷尬！」林曉峰說。
鄭伊健（持有物業）
黃埔花園 9期 4座單位
買入： 530萬（ 96年） 市值： 1,084萬
南灣雅景閣低層單位
買入： 2,800萬（ 08年） 市值： 3,600萬
錢嘉樂（持有物業）
北角半山豐林閣 2座中層單位
買入： 1,280萬（ 15年） 市值： 2,450萬
北角半山豐林閣 1座低層單位（湯盈盈）
買入： 590萬（ 05年） 市值： 1,800萬
陳小春（持有物業）
大埔天賦海灣 8座（夫妻聯名）
買入： 2,916萬（ 12年） 市值： 3,300萬
大埔白牛石下村
買入： 428萬（ 05年） 1,400萬
大埔逸瓏灣 8座相連單位
買入： 7,026萬（ 15年） 市值： 7,300萬
大埔逸瓏灣 12座單位（應采兒）
買入： 763萬（ 14年） 市值： 1,300萬
謝天華（持有物業）
大坑優雅閣低層單位（夫妻聯名）
買入： 3,728萬（ 15年） 市值： 3,800萬
林曉峰（持有物業）
大埔逸瓏灣 19座低層單位
買入： 854萬（ 16年）
撰文、攝影、攝錄：娛樂組
|
鍾意就快D Share啦！
|
|
|
