掃呢頁CODE去手機

2016年7月14日 星期四

《發字精神》(2):發哥包到冚有原因 __,發哥,周潤發,

發哥原來係為大家着想!神級偶像周潤發平日被市民大眾捕獲已非新聞,但上月大熱天時,發哥卻被發現戴上Cap帽、面罩,身穿黑Tee加緊身Leggingpants外襯運動褲,現身銅鑼灣港鐵站,雖然發哥已經包到冚,但仍被認出及上載互聯網,大批網民𢱑頭不知發哥搞邊科,發哥透露其實他有苦衷!的確涼唔怕熱原來發哥包到冚的苦衷,就是不想麻煩他人,他說:「點解我要『嬲』住呢?因為如果人哋見到我,佢唔影一張,就好似『哎 ...


發哥原來係為大家着想!

神級偶像周潤發平日被市民大眾捕獲已非新聞,但上月大熱天時,發哥卻被發現戴上Cap帽、面罩,身穿黑Tee 加緊身Legging pants外襯運動褲,現身銅鑼灣港鐵站,雖然發哥已經包到冚,但仍被認出及上載互聯網,大批網民𢱑頭不知發哥搞邊科,發哥透露其實他有苦衷!

的確涼唔怕熱

原來發哥包到冚的苦衷,就是不想麻煩他人,他說:「點解我要『嬲』住呢?因為如果人哋見到我,佢唔影一張,就好似『哎呀!』,個心囉囉攣咁樣,我又唔想麻煩到人有咁嘅念頭。如果佢真係要搵你影呢,其他人又追住影,咁唔好麻煩人啦,包鬼住,又唔熱嘅,因為嗰啲的確涼嚟,好舒服!但有人就好醒目嘅,佢見呢個成碌竹咁,包到冚,一定係周潤發,咁佢就會好有誠意走埋嚟:『發哥, 影張相得唔得呀?』,『我咁嘅樣你都制?』, 『特別吖嘛,未見過嘛,人哋認唔到,我認到咪得囉!』,『好吖!』,咔嚓!」

讚粉絲好識做

「佢又唔會依嘩鬼叫,仲好有禮貌、好識做,影完之後就走,呢啲影迷真係抵錫到不得了,真係識諗,又唔會騷擾到人哋,又唔會騷擾到我。喺地鐵包住塊面咁樣嚟影一張相都幾特別,因為咩都見唔到,淨係見到對眼!」

熱愛大自然

不過就算多熱,其實發哥還是喜歡親近沒有空調的大自然,他說:「我係好鍾意一個人去山、去遠嘅地方做運動……我好鍾意大自然!可能我出身南丫島,覺得大自然同我好接近,啱我啲囉!你叫我去商場行,我又唔鍾意,喺市區我又唔鍾意,我鍾意山、水、陽光、風……雖然你見我出去好多人、做宣傳《寒戰2》嘅時候,Bi Li Ba La,其實某個程度上我係為咗個job,到我唔做嘢,我就好希望自己一個人……!」

最怕冷冰冰

發哥設想周到,也不擔心熱親,他是怕冷多於怕熱:「我其實好怕好怕凍,始終係南方人,最凍嘅一次經歷係零下四十幾度,因為刮起大風,其實佢本身零下廿幾度啫,但刮起大風就再加個double,根本連對白都講唔到,牙骹喺度打震。至於最熱……喺香港拍戲熱到你頭瘟腦瘴都周不時有,香港嘅熱天有一樣唔好,就係好潮濕,悶熱囉!最慘就係落完雨之後,個地下好熱好熱,蒸啲蒸氣出嚟,你係好想死架!」


來源 source: http://hk.on.cc
鍾意就快D Share啦!