2016年7月28日 星期四

《一屋》三寶悲慘童年 阿媽出走 30年 張穎康流淚:點解佢唔搵我? [壹週刊 - 1377] __,張穎康,M1,

一提到阿媽,張穎康即控制不住情緒,阿媽離棄是一世的傷口。娛樂偵訊《一屋》三寶悲慘童年 阿媽出走30年 張穎康流淚:點解佢唔搵我?大台劇《一屋老友記》中憑四寶溫馨搞笑戲爭到收視。飾演金融才俊、長腳蟹呂慧儀老公的張穎康,背後暗藏了一段尋母三十年的孤苦身世。34歲的張穎康,自小遭父母離棄,在成長過程留下傷痕;母子相認,更是他既渴望又害怕的情景。尋母多年的傷口無法癒合,問他是否希望母子相認,被離棄又奢望團 ...


一提到阿媽,張穎康即控制不住情緒,阿媽離棄是一世的傷口。

娛樂偵訊

《一屋》三寶悲慘童年 阿媽出走 30年 張穎康流淚:點解佢唔搵我?

大台劇《一屋老友記》中憑四寶溫馨搞笑戲爭到收視。飾演金融才俊、長腳蟹呂慧儀老公的張穎康,背後暗藏了一段尋母三十年的孤苦身世。

34歲的張穎康,自小遭父母離棄,在成長過程留下傷痕;母子相認,更是他既渴望又害怕的情景。

尋母多年的傷口無法癒合,問他是否希望母子相認,被離棄又奢望團聚的張穎康雙眼通紅,強忍眼淚說:我好想見佢,點解佢唔搵番我。

父另娶母出走

飾演老婆奴的「三寶」張穎康,現實中是大台中人所共知的愛妻號。上週六(七月二十三日)下午,不用開工,張穎康與妻女外出家庭樂,同兩歲囡囡肉緊嘴嘴,錫到出面。

十分重視家庭的「三寶」,四歲時母親出走,從此音訊全無。缺乏母愛,張穎康亦得不到父愛彌補;有指張父在他十歲那年於內地另娶,對作為長子的張穎康甚少過問,父子關係疏離。

張穎康由祖母帶大,被雙親遺棄,他變得沉默寡言。直至太太麥雅緻出現,逐漸感受到溫暖家庭的他,近年才變開朗。

媽咪出走後,張父內地另娶甚少回港,童年的張穎康失去父母的愛。

愛妻麥雅緻及女兒小豆,彌補了張穎康成長的缺口,令他重拾溫暖。

《一屋老友記》憑倫理劇情,及演員生鬼演繹贏收視,張穎康亦因此冒出頭。

有指拍《師父明白了》時,張穎康與羅蘭姐一場母子相認戲,因觸及內心傷痕,一埋位便淚如泉湧。

觸景傷情爆喊

母親狠心遺棄,是張穎康心裡致命的一根刺,一碰到就會痛。

據了解,一三年拍《師父明白了》時,有場與羅蘭母子相認戲份,戲假情真,被觸動傷口的他當場失控痛哭,令在場工作人員不知所措。

「拍第一 take佢已經係咁喊,導演都嚟唔切反應;大家以為佢太入戲,之後先知佢因為同自己媽咪冇聯絡幾十年,一時觸景傷情。」一名幕後人員說。

湊女公

上週六( 23/7)唔使開工的他陪實妻女。兩父女醫肚時都要玩一餐,萌爆的小豆氹到爸爸好開心。

帶兩歲女去玩,兩公婆錫到個女燶,經常互嘴。

等阿媽拒改藝名

母親出走後冇晒影,但他內心仍存在渴望,有朝能母子相認的張穎康曾拒絕公司要求改藝名,為的是讓對方知道他的所在。

「阿康表面好似唔在乎,但內心其實好渴望再見到自己媽咪。冇見咁多年,但佢一直 keep住張同媽咪嘅合照;有段時間佢仲喺 facebook尋親,又試過有親戚提起喺邊見到,佢就專登走去同一個地方等。

「啱啱簽約嗰陣,公司叫佢改藝名,但阿康唔肯,佢要留住自己個真名,等媽咪知道佢喺電視台做嘢,可以搵佢。」知情者說。

本週一(七月二十五日),問張穎康有關尋母多年,他呆了好一陣子。

「係……都三十年冇見,又冇話刻意去搵(有冇問其他親人搵佢聯絡方法?)冇,因為大家都失咗聯絡。我 keep住用自己真名,因為只要佢在世的話,就會睇到我。」張穎康說。

因為一絲希望,張穎康不敢貿貿然搬離與嫲嫲同住的舊居,直至二十歲屋企已經唔夠住,心灰意冷的他才決定離開。

「阿媽走嘅時候我得四歲,當時係同緊阿嫲住,相信佢會記得阿嫲地址;不過上年阿嫲都過咗身,不過佢想搵我嘅話,可以去電視台。」

在《一屋》張穎康係老婆奴(左圖)!現實中嘅佢,鍾意湊女,老婆冇公主病,仲係賢妻一名。

13年張穎康在內地拍《東坡家事》,曾與馬賽合作。

在大台十年,去年在《潮拜武當》登上男二。

老婆安慰補番數

留下的是不快童年,因為失去母親,每逢生日,只會勾起他對母親的想念。

「小學時,因為同學會笑我冇阿媽,我同佢哋打交。最掛住佢嘅日子就係我生日,依家自己有頭家,冇再唔開心,老婆會安慰我,彌補咗我呢樣嘢。」

對於母親不顧而去,張穎康這樣開脫:「我出世佢先得十八歲,太後生。(有冇嬲佢當日遺棄你?)有嬲佢點解唔搵我?但同一時間我都好嬲自己,其實當日佢有拉我走,但我唔肯跟佢,所以好矛盾。」

假如有日,兩母子再見的話……

「唔敢想像呢個畫面!」一直表現克制的他,突然激動得雙眼渾滿淚水。

「你問我想唔想見佢?我梗係想……係囉!」

三十年不相認,是無法原諒自己當日的抉擇?還是……不願面對!恐怕張穎康也沒有答案。

05年出道的張穎康,有劉華做伯樂,雖唱歌事業未因而突破,但感激對方曾貼錢助他捱過難關。

年前再遇恩人,張穎康已是人夫,劉華也當了爸爸。

絕種好男人

被父母離棄的遺憾,某程度成就了今日的張穎康。

12年他跟前《東張西望》主持麥雅緻結婚, 14年女兒小豆(張雅喬)出世,是大台出名的愛家男人。

拍劇十年,一直零緋聞,全因願意拒絕誘惑,遠離發姣女藝人。

有傳張穎康拍《東坡家事》時,曾遇對手狂放電做晒主動;但稀世罕物張穎康卻報定案,再叫老婆去探班,令放電的女藝人知難而退。呢啲男人,應該早已絕種。

一屋好伴

大把人追,曾跟黃秋生傳緋聞的呂慧儀,最終還是揀了拍拖多年,對她百般遷就的健身教練 Dickson結婚,現育有兩歲兒子,一家三口常網上放閃。

單身的「四寶」張彥博,現實中的一屋老友是 Steven,二人合租旺角舊樓同居,不過 Steven經常在女友莊端兒家過夜,令交一半租的阿博成屋霸。

情路坎坷的滕麗名,錯愛過魏駿傑及人夫郭政鴻, 13年跟圈外男朱建崑結婚,婚後甜蜜美滿。

歐陽震華與澳門賭王傅老榕孫女傅潔嫻結婚廿年,經常孖住夜蒲,係圈中夾檔夫妻。

同陳偉霆拍可樂廣告

05年簽劉德華成為旗下的張穎康,被稱劉華契仔;當年處男作派台歌《我很好》,他說對母親的心聲。

06年,經劉華推薦入 TVB,由二打六捱到今日成為男二。除拍劇之外,他亦演出過十多部電影,更曾同陳偉霆及張致恆( Steven)的胞姊 Jan合作拍過可口可樂廣告。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...