陣容非常強大，不過偉仔對電眼依然吸睛！
「76天團」又出動喇！咪住…咩係「76天團」？就係由梁朝偉、杜德偉、鍾鎮濤、呂方同葉童老公陳國熹等等一班型佬所組成，佢哋會定期開P或者飯聚！而鍾鎮濤就曾經講過，話「76」係有意思，「6」係指固定成員有六個人，至於「7」，佢就話係秘密喎！而尋晚成員之一嘅陳國熹喺微博晒大合照，雖然未見呂方，不過就多咗劉嘉玲、上山詩鈉、曾志偉、吳廷燁、邱淑貞同老公沈嘉偉，同埋梁家輝太太江嘉年，非常熱鬧！
陣容閃到暈又強勁到咁，難怪陳國熹只係上載呢張相，留言都唔使留，就即刻引起大批網民關注！相中亮點之一，係每位「76天團」成員都帶埋另一半嚟聚會，其中將會喺十月生B仔嘅杜德偉太太Ice都有現身，合照時杜德偉冧到爆咁挨落太太個肚到；范姜攬住老公鍾鎮濤之外，沈嘉偉同邱淑貞又黐到實一實，真係Sweet到暈！
不過最令網民Sweet到暈嘅，當然係喺劉嘉玲身後嘅偉仔，見佢笑容燦爛嘅同時，又使出「梁電眼」，難怪網民都話頂唔順，仲話隔住個mon都收到偉仔嘅電力！另外，有網民反問呢張大合照究竟邊個出手影，有人估係梁家輝，但亦都有人估係呂方，仲話無論邊個影都好，呢張相真係勾起大家唔少集體回憶！
來源 source: http://hk.on.cc
|
鍾意就快D Share啦！
|
|
|