娛樂偵訊
寸嘴 Barbie做阿四 莫凱謙 keep fat拍戲
十一年前參加過《殘酷一叮》的莫凱謙，眨吓眼已經 18歲，一直想入娛樂圈的他，今年初再參加《全港十二大大學大專聯校歌唱及創作大賽 iMusic iDol Contest 2016》搵機會。偏肥的莫生唔怕俾人笑肥，更為爭取一個電影角色， keep fat之餘再增肥。撰文、攝影、攝錄：娛樂組 設計：何嘉慧
先試水溫
一頭金髮的莫凱謙，沿住觀塘的海濱來回跑步，跑到上氣唔接下氣，不過他不是減肥而是要增肥。
「想唱好啲歌，就要練好啲氣；佢跑完又食番好多嘢，因為嚟緊要 casting一套勵志青春片，個角色又有其他人爭，不過導演講咗如果揀啱都要再增肥，佢想自己機會大啲，所以要 keep fat。」知情者說。
九月將在中文大學升讀二年級的莫凱謙，主修新聞與傳播系，早前他將自彈自唱的 MV《今天只做一件事》派上台試水溫，結果引起網民留意。
「莫凱謙自細就鍾意唱歌，當年參加過《殘酷一叮》後，佢咁多年嚟都有繼續參加唔同嘅歌唱比賽，累積經驗，而家唱片市道咁差都有人簽，都算好好運，但只會先推出 single派台，睇吓外界反應，再考慮係咪出碟。」
唱《少訊》主題曲
據了解，莫凱謙將會為《少年警訊》唱主題曲，已收到 demo的他，每日都騰出時間練習，為下月尾推出歌曲做好準備。更騎呢是莫凱謙搵咗做過娛樂圈的寸嘴 Barbie做助手。
「 Barbie舊年搵咗份工，喺科技公司做 marketing，因為公司成立咗經理人部門，又簽咗莫生同其他歌手，所以安排咗有經驗嘅 Barbie負責照顧佢哋，仲要幫手化埋妝。」知情者說。
一夜成名
1998年出世的莫凱謙，細細個已經成日喺 K房練歌。 05年，只得 7歲的他參加《殘酷一叮》，人仔細細唱《習慣失戀》、《月亮代表我的心》、《愛與誠》亦勁有 feel，憑可愛 outlook、講嘢直率而一夜成名。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|