現年49歲、坐擁350億身家嘅城中超級筍盤小小超李澤楷，自11年同舊愛梁洛施分手後，桃花運越見暢旺，短短5年，已先後多次俾人影到同新歡約會甚至同遊外地。今年2月14號情人節，讀者陳先生透過《蘋果》「爆相爆片」，影到小小超同一名長髮女浪漫遊東京。以前小小超同女伴外遊，都係以真面目示人，但呢次情人節之旅，兩個人忽然戴口罩遮樣，睇嚟小小超相當保護呢段感情，亦令人對佢身邊呢位新歡，更加好奇！雖然刻意用口罩遮樣，不過小小超身邊呢位女伴，笑起上嚟，單憑獨有嘅彎月型雙眼，好面善……本報收到可靠消息，小小超呢位着住火辣紅裙加黑絲嘅新女伴，就係23歲應屆港姐季軍郭嘉文(Karmen)，o依家喺大台主持《東張西望》節目，難怪佢擔心被認出，要戴上口罩掩人耳目啦。據知，小小超同Karmen喺去年尾開始撻着，二人隨即打得火熱，交往後第一個情人節，小小超就帶住Karmen浪漫遊東京，可見佢對呢位新歡情有獨鍾。喺東京浪漫之旅中，小小超同Karmen被讀者發現喺銀座博品館，當時二人正玩緊電動模型車，小小超玩咗一陣，就問Karmen有冇玩過，雖然Karmen話冇玩過，但就依然同小小超玩得好投入。佢哋玩咗15分鐘電動模型車，都只係使咗42蚊港幣，好鬼平民貼地。到離開嗰陣，讀者仲見到小小超落樓梯嗰陣，小心翼翼拖住Karmen隻手仔，真係錫到女友燶！當時，小小超以短訊回覆本報話：「是在日本的朋友帶我看看吧，不要想太多，情人節快樂。」對於拖住女伴手，小小超解釋：「高踭鞋下樓梯扶一下吧。」
對於口罩女伴身份終極曝光，被爆係港姐季軍郭嘉文，《蘋果》透過短訊向小小超了解，問到兩人點樣認識？o依家感情進展成點？事隔一晚，小小超才僅回覆：「???」共3個問號，答案模稜兩可！記者表示好難揣摩，經再次追問之下，小小超以短訊表示：「Work has been very busy lately 感情事暫不想提了，謝謝你關心。」雖然佢冇承認同Karmen拍拖，但亦冇否認女伴身份唔係Karmen，從佢今次封嘴嘅態度，似乎想低調保護呢段感情。
| 今年情人節李澤楷同口罩女到日本旅行，今日有指口罩女原來係大台港姐季軍郭嘉文。 |  兩個人喺情人節玩模型車玩得好開心。(資料圖片) |  佢哋當日仲去睇Minions公仔。 |
 |  郭嘉文上年參選港姐，喺勁敵之下當選季軍。 |  |
 李澤楷最初只以「???」回覆，細問之下先話唔想提感情事。(資料圖片) |
|
鍾意就快D Share啦！
|
|
|
