萬眾齊心為C朗，葡萄牙劣勢贏波奪冠！今晨上演嘅歐國盃決賽，葡萄牙雖然喺開賽25分鐘就有首席球星C朗傷出，但憑住將士用命，保住90分鐘0比0完場，到加時戰更有後備奇兵艾達盧比斯冷箭得手，最後以1比0爆冷贏波，歷史性首度封王！C朗末段療傷後重返後備席，見證住球隊捧盃，完場後再與隊友相擁喪喊，場面感人到爆呀！
今場有比比復出嘅葡萄牙，上半場大部份時間稍處下風。開賽10分鐘，法國嘅基沙文同基奧特先後兩次頭槌攻門，都只係僅僅被葡萄牙門將魯爾柏迪斯奧救出。之後冇耐，葡萄牙首席球星C朗拿度一次爭波慘被皮耶踢傷，呢位皇馬前鋒一度離場治理，然後重返球場捱到25分鐘都係捱唔住，要被抬離場，葡萄牙以哥利斯馬入替佢。法國之後氣勢更盛，中場穆沙施素高一次禁區內轉身勁射幾乎得手，可惜又係畀魯爾柏迪斯奧救出，葡萄牙總算頂住半場唔輸。
換邊後法國依然表現唔錯，先後有基沙文同基奧特製造過入球黃金機會，可惜唔係頂高，就畀葡萄牙門將魯爾柏迪斯奧救出。至於葡軍都有拿尼同哥利斯馬喺禁區內連環施射，又係逃唔過法國門神洛里斯十指關。比賽末段，法國有穆沙施素高30碼遠程炮怒轟死角，無奈又一次畀魯爾柏迪斯奧神救化解，加上基格納補時階段射中柱，雙方90分鐘打和0比0，葡萄牙今屆法定時間未輸過。
加時戰葡萄牙有C朗重返後備席打氣，葡軍當堂踢得更醒神，先係108分鐘有拉菲爾古里路罰球中楣，1分鐘後，艾達盧比斯更喺25碼施冷箭割草式地波入死角，葡萄牙就此以1比0擊敗法國，贏得冠軍。
來源 source: http://hk.on.cc
|
鍾意就快D Share啦！
|
|
|
