陪樊少皇返港出席首映禮翌日（七月二十三日），兩公婆去銅鑼灣行街，每逢過馬路， JJ都拖實老公。
娛頭
嫁咗先知 樊少皇欠債 200萬 收數佬摷上老婆屋企 JJ慌張回應：佢俾人呃！
13年同年紀相隔十年的賈曉晨（ JJ）拍拖，即被爆前度為樊少皇未婚生了一子一女，成為罪人，幾經風雨，二人今年元旦正式拉埋天窗。
排除萬難榮升「樊太」的 JJ，近幾年已回歸內地，同老公齊齊揾真銀，但最近卻傳出樊少皇於去年向朋友借下 200萬欠款未還，今年初，更有收數公司受託，出手尋人，有指樊少皇一直潛水唔接電話，搞到收數佬直踩 JJ位於將軍澳寓所。
護夫心切， JJ直指老公才是當中的受害者！
簽名打指模
現年四十二歲的樊少皇，雖然未婚育有一子一女，但仍然成功俘虜 33C宅男女神賈曉晨（ JJ），一度被指「拋妻棄子」的他，聲稱過去二十年來，一直堅守每月給子女和他們的母親，提供經濟保障。
主戰內地的樊少皇，多年密密揾，經濟理應不成問題，但最近卻傳出他欠下巨債。有指樊少皇於去年尾曾向朋友借下二百萬應急，有簽文件，並在身份證明文件上打下指模。
今年三月，有收數公司受委託，向樊少皇追回未清欠款，但一直聯絡不上，搞到收數佬四出尋人。
「有樊少皇身邊朋友講過，話曾經收到個不知名男人，用太空咭打過好多次電話俾佢，主要係問樊少皇下落，又話佢欠人錢未還，仲上過 JJ將軍澳屋企拍門，但無人應。
「當時個朋友仲即刻打番俾樊少皇問咩事，點知佢已經改咗電話， WeChat又唔應機，連微博都突然 delete晒以往啲 post！」知情人說。
老婆喊爆
去年十一月，賈曉晨同拍拖三年的樊少皇被爆秘密排期註冊，二人今年元旦日正式結婚，新婚不久， JJ才突然獲悉老公捲入欠債事件。「 JJ曾經同身邊啲親密朋友喊過，話老公發生咗啲事令佢好大壓力，至於點解要同人借錢，樊少皇同 JJ解釋係話幫兄弟，估唔到對方反轉豬肚就係屎，佢話自己根本冇借過任何人錢，咁 JJ當然信到十足識樊少皇嘅人都知佢四肢發達，頭腦簡單，俾人呃，一啲都唔出奇！」知情人士透露。
銅鑼灣迷路
早個禮拜（七月二十二日）， JJ專程返港，現身支持樊少皇有份參演的電影《賞金獵人》首映。第二日，下午三點， JJ揸車到銅鑼灣做 facial，之後再會合老公。
少返香港，又唔熟港島區路，目的地只是一條街外的百樂潮州酒樓，二人對住電話 GPS，兜足大半粒鐘。每過馬路， JJ都會主動拖實老公，可見樊少皇捲入欠債糾紛，並未有影響二人感情。
報警處理
上週四（二十八日）， JJ現身機場，準備啟程飛返北京，本刊記者上前向她求證樊少皇欠債一事。
壹：好少見你返香港，喺北京買咗樓？
賈：都……都算係嘅，哈哈！
壹：你知你老公欠二百萬嘅事？
賈：嘩！梗係唔係點會呀？
壹：我哋收到有人爆料，仲有佢身份證同指模，話佢簽晒欠單。
賈：唔係啩？如果係有咁嘅事，我哋會選擇報警㗎，因為呢個都唔係小數目，都唔係簡單嘅事！
愈講愈亂
壹：知唔知老公有財政困難定係幫朋友？
賈：據我所知……有人呃佢，呃佢……呃咗佢（樊少皇）三百萬係真嘅，但我哋之前一路冇時間處理呢件事，但如果係咁，我哋會選擇報警啦返去（開始亂）。
壹：即係你老公俾人呃？
賈：係喇，但係我哋一路都未有時間處理，竟然有人咁樣講，我哋要抽時間返嚟處理吓！
壹：而家使唔使還錢？
賈：唔得，冇人爭錢，仲要有人呃咗佢錢呀，而家仲係！（激動）
壹：內地發生定香港發生？
賈：……呢個唔講住，我揾咗律師，我處理咗先！係囉…… OK！
壹：即係呢件事你一直知情？
賈：我知道有人呃佢囉，但你講嗰件事我就唔知喇！
壹：咁你話佢俾人呃，會唔會同呢件事有關聯？
賈：唔係唔係！幾年前喇……一路都冇……諗住本來係……（語無倫次）……點樣講呢？因為都係識嘅人呃佢，諗住算喇！咁如果真係有呢啲事都複雜，我諗我都返來要處理吓！
劇接劇好好執
13年，賈曉晨離開 Swazz潮藝娛樂，回復自由身北上搵真銀，一劇接一劇，連同商演活動，一年收入逾千萬。
2015-2016年收入
內地劇：
《閃亮茗天》 $200萬
《蜀山戰紀之劍俠傳奇》 $300萬
《新圓月彎刀》 $200萬
《一劍橫空》 $150萬
廣告代言：《 LA BRISE》醫學美容 $80萬
無綫劇：《末代御醫》 $20萬
電影：《色模》（客串） $5萬
剪綵：商演剪綵活動× 10 $100萬
約共：$1,055萬
周身債
屋企人冇得揀，親人唔生性，同財務公司借錢，無力償還一走了之，結果搞到上晒身，圈中人屢見不鮮。
陳秀雯
前夫林國雄欠下百萬街數，陳秀雯花盡積蓄代夫還債， 08年，財務公司於她位於太子的寓所及亞視門口貼大字報追債，娘家生活受盡滋擾。
撰文、攝影、攝錄：娛樂組
|
鍾意就快D Share啦！
|
|
|
