今年4月，「高登女神」謝安琪（Kay）完成兩場紅館演唱會後，宣佈停工一年，暫別樂壇，專心做張繼聰太太、張瞻媽媽，同準備隨時再「造人」。KayBB休養生息4個月以嚟，不時被發現發福唔少，近日更有雜誌偷影KayBB嘅暫休生活，仲話佢腰圓背厚，好大機會係養肥身體，等住生B。噚日下晝1點鐘左右，《蘋果》成功捕獲KayBB嘅影蹤，張繼聰揸住架Tesla電車載住KayBB由比華利山嘅屋企出去大埔墟，佢哋泊低車 ...
今年4月，「高登女神」謝安琪（Kay）完成兩場紅館演唱會後，宣佈停工一年，暫別樂壇，專心做張繼聰太太、張瞻媽媽，同準備隨時再「造人」。Kay BB休養生息4個月以嚟，不時被發現發福唔少，近日更有雜誌偷影Kay BB嘅暫休生活，仲話佢腰圓背厚，好大機會係養肥身體，等住生B。噚日下晝1點鐘左右，《蘋果》成功捕獲Kay BB嘅影蹤，張繼聰揸住架Tesla電車載住Kay BB由比華利山嘅屋企出去大埔墟，佢哋泊低車後，着住白tee襯紮辮頭嘅張繼聰，兜去司機位另一邊開門畀老婆落車，仲扶住對方，好鬼gentleman！Kay BB噚日着住白色鬆身連身裙加平底鞋，走簡約pure風。張繼聰同老婆全程十指緊扣，沿路有唔少人認出佢哋，嗌得出佢哋個名——係真係嗌謝安琪同張繼聰，而唔係謝安琪個老公！佢哋一路行一路向打招呼嘅人微笑同揮手，十足十王子公主出巡咁嘅款，真心nice！話時話今次人妻Kay呢個look真係孕味極濃！之後張繼聰同Kay BB先去咗嗰區好著名嘅麵檔蔡潤記醫肚，食咗半個鐘到，佢哋走嗰陣再遇集郵人士，滿足完對方之後，佢哋就揸車到大埔超級城某超巿，入去掃貨。同樣地，有唔少人認出佢哋兩個，見佢哋都係友善微笑回應。超巿內全程由Kay BB推住購物車，到埋單嗰陣，張繼聰拎出自備嘅環保袋幫手裝走啲戰利品，眼見都係啲薯片、熊仔餅等零食，足足裝滿兩大袋。有冇咁擦得，冇法Kay BB一個人食兩個人嘅嘢，唔買多啲點得呀！Man爆嘅張繼聰單膊孭起兩袋戰利品，再騰出另一邊手拖實Kay BB離開，十足十受保護動物咁，今次張瞻好有機會做哥哥！張繼聰被問到老婆係咪大肚？幾時公佈喜訊？佢以短訊回覆：「Sorry ah , 冇嘢宣佈。」追問kay唔係大肚？還是未係時候公佈？阿聰：「真係冇咩可以講,多謝關心。」問到Kay最近好嗎？阿聰謂：「She is good , thanks」
