掃呢頁CODE去手機

2016年8月18日 星期四

拒洗米華福利 洗米仔:創業唔係 work俾佢睇! [壹週刊 - 1380] __,洗米華,周焯華,M1,

娛樂偵訊拒洗米華福利 洗米仔:創業唔係work俾佢睇!老豆係澳門賭業猛人周焯華,剛滿20歲的「洗米仔」周柏豪,抗父命唔讀大學,更堅拒父蔭,自行創業搞網絡WOW。一意孤行,因為,「相信自己,我創業唔係為work俾佢(洗米華)睇。」周柏豪說。搵食唔靠老豆,咁溝女絕技兩父子可有研究?周柏豪大笑兩聲:使佢教?員工面前認缺點開業半年,公司寫字樓二千呎,幾個九十後員工;十九歲做老闆,冇架子的洗米仔周柏豪與員工 ...


娛樂偵訊

拒洗米華福利 洗米仔:創業唔係 work俾佢睇!

老豆係澳門賭業猛人周焯華,剛滿 20歲的「洗米仔」周柏豪,抗父命唔讀大學,更堅拒父蔭,自行創業搞網絡 WOW。一意孤行,因為,「相信自己,我創業唔係為 work俾佢(洗米華)睇。」周柏豪說。

搵食唔靠老豆,咁溝女絕技兩父子可有研究?周柏豪大笑兩聲:使佢教?

員工面前認缺點

開業半年,公司寫字樓二千呎,幾個九十後員工;十九歲做老闆,冇架子的洗米仔周柏豪與員工齊齊坐在 bar枱,食 lunch吹水。

訪問期間,有員工插嘴窒老細,他亦當住同事面前,承認缺點。「我係心急,不過我嘅優點係經常望住塊鏡同自己講:『你呢個位做得幾差!』」老豆洗米華的大佬氣場濃郁,洗米仔親民得多。

作為周焯華長子,理所當然是太陽城接班人之選,不過思想比較早熟的洗米仔,卻有自己一套,對老豆盤生意,毫不着緊。

「如果佢(洗米華)問我想唔想做?而我係可以好佢一百倍,唔搞冧佢檔嘢,咁我會接受。佢冇問過我,佢唔需要我喺度,我坐喺度做乜鬼!」周柏豪說。

洗米仔公司請的都是跟他肯捱肯搏的年輕人。

同員工關係好,身為老闆的他,平日會跟他們叫外賣,一齊食晏吹水。

員工評價:

老闆有啲急(周:講啲好嘢)佢個人好有 passion!咁講有冇人工加?見工時唔知佢係邊個,但好想笑,因為佢講嘢七情上面,好似拍戲一樣介紹佢嘅產品。

手出汗抖唔到氣

性格急進,急住做老闆的洗米仔說:「佢話細時冇錢冇得讀,依家你(指柏豪)有錢都唔讀。佢唔同意,我好明白,其實我可以一路讀書一路做嘢,好似中學時期咁,但最大問題係兩邊兼顧,搞到做得唔好又讀得唔好。

「當時試過考試同公司嘅嘢撞埋,我因為有壓力情緒出事,對手不停出汗,仲有抖唔到氣要窒息嘅感覺,嗰一刻,我知道雙線進行對我身體唔好,再咁落去,可能三十歲就玩完;我問自己最想做咩,我好清楚自己最想做 startup,想由冇到有,創造一樣嘢。」

唔靠父蔭,連富二代的福利亦不「享用」。

「我個人冇乜慾望,我又冇錶,冇乜嘢想要,又未有車牌,喺香港周圍都塞車,揸乜鬼車。」

同老豆一樣,洗米仔都係食腦之人。

細細妹周善潼出世後,家庭聚會愈來愈多,洗米仔亦十分愛錫 BB女。

洗米仔靠食腦, 18歲創業搞 app,就連英國報章都有報導, Heidi在 fb也有轉載讚叻仔。

拒分擔一半租金

創業冇問過屋企攞一毫子,洗米仔單靠自己在英國讀中學時,與老師創立的學生折扣 app賺來第一桶金(約二百萬港幣)起家。

「一開始我冇問佢攞錢(創業),當時諗住喺英國做起,就 WeChat佢話我想租屋,問佢可唔可以幫我俾一半?佢話唔得,叫我自己搞。 OK!咁我自己搞。因為唔係做佢想嘅嘢,我問佢攞(錢)都唔會有。

「(如果你老豆想投資落你盤生意呢?)老實講,佢唔係最好嘅拍檔夥伴,因為佢對呢個工業唔熟。我創業唔係為 work俾佢睇,我做嘢唔諗佢,做 WOW成個理念係想啲人相信自己,想大家可以發揮自己才能達至夢想。俾家人見到好有熱誠去做一件事,呢個先係最重要;就算屋企人唔支持,亦可以用熱誠,去爭取到底。」無論想法和做法,周柏豪都按此付諸實行。

六月,周柏豪為自己檔生意在會展擺檔,他落手落腳親自 sell客。

去年,有指洗米仔跟從事金融業的 Lina拍拖。

洗米仔跟老豆一樣勁有女人緣,讀書時期,有唔少女仔主動埋身。

跟繼母 Heidi不單感情好,更會相約出海曬太陽玩 wakeboard。

洗米仔與同父異母嘅細妹周梓潼感情好,在英國讀書時放假返澳門,一定會約細妹一齊玩樂。

最怕回應家事

洗米家最令全城關注的,當然係比連續劇更吸引的三角糾纏,睇吓接受訪問預咗要幫老豆頂的周柏豪點答!

壹:老豆影響你最深係咩?

柏:好難答。

壹:佢有冇過啲溝女絕招俾你?

柏:使佢教?佢成日話我肥,係要打擊我,佢覺得我太勁,勁過佢,哈哈哈!

壹:點睇老豆嘅風流賬?

柏:(嘲笑語氣)佢之前影咗張打網球唔著衫都 OK!(問非所答)

壹:聽聞你老豆唔夠你打……網球!

柏:我咁樣講驚佢嬲,費事答!

壹:你覺得繼母 Heidi對家事處理得好唔好?

柏:我一向都好欣賞佢。

壹:有冇接觸過 Mandy?

柏:都係唔答。

學 opera好唱得

與歌手周柏豪同名同姓的洗米仔周柏豪,原來一樣唱得。員工爆老細喺公司好唱口,喺英國求學時學過 opera,踩過台板演出歌劇。今年初,與同月同日出生、太陽娛樂一哥許志安合唱《爛泥》,唱功唔失禮。

撰文、攝影、攝錄:娛樂組


鍾意就快D Share啦!