探熱針
離開大台返大陸 周子揚北京買 1500萬豪宅
去年約滿無綫走人，周子揚年初更在北京自組工作室，五個月間，已經接了四部電影，仲要套套擔正男一，收入可觀，周子揚決定買樓長駐北京，日前就到了北京朝陽區富豪地段睇 1,500萬豪宅。「而家有好多時間都喺內地工作，都想有個家！以前喺大台限制多，唔係你努力就有機會，可能到 40歲都未必做到男主角！」
收入暴漲
在無綫五年，周子揚一直演閒角，去年決定走人，自由身的他工作不斷，今年初更在內地成立自己工作室，與內地製作人合作，短短五個月，已經接了四部電影，當中兩部已經拍攝完成，其中《我的傳奇命運》將會在十月底於內地院線上映。
機會不斷，周子揚收入暴漲，現在大部分時間留在內地工作的他，日前發現他到北京朝陽區睇豪宅。
上週三下午二時多，周子揚坐車到達朝陽區的霄雲路八號豪宅地段睇樓，甫到達已經有一名女經紀等候，由於當天陽光非常猛烈，女經紀更為周子揚擔遮擋陽光，侍候周到！據知，今次周子揚睇的單位有一千四百多呎，客廳飯廳都非常闊落，除了睡房，更設有衣帽間，單位連傢俬新裝修出售，要千五萬人仔交易。
「其實離開無綫之後， Hinson（周子揚）已經接多好多商演同私人 party演出，收入多以前好多，後來仲認識到唔少內地製作人，於是決定自組工作室，好多製作人睇中佢似韓星李敏鎬，所以好快已經接咗幾部戲！」
「喺大台限制多」
就計劃在內地定居一事，周子揚直認會買樓，「其實自己返內地發展唔夠半年，但真係好多工作，收入多咗好多，而家有好多時間都喺內地，可能有嘢做先返香港，所以都想喺北京有個家。」
提到火速升呢做男一，不用再喺無綫捱騾仔，周子揚承認自己好努力爭取。「就算試戲自己都好認真研究劇本，始終全部要講普通話，更加要好努力，以前喺大台限制好多，唔係你肯努力就有機會，可能四十歲都未必做到男主角！」
北上定居
無綫人工奀福利差，不少花旦小生都紛紛離巢，返內地發展搵人仔，甚至定居內地。
馬賽
港姐出身的馬賽，曾被無綫一度力捧，拍過《名媛望族》、《神探高倫布》等劇，但 14年，爆出與汪子琦的同性戀及艷照風波，即被無綫雪藏。離開大台後，馬賽索性返內地發展，早前更自組「馬賽工作室」，自己接 job。
撰文、攝影、攝錄：娛樂組
|
鍾意就快D Share啦！
|
|
|