十優港姐麥明詩噚晚終於卸任，由馮盈盈(Crystal)接棒做新鮮出爐港姐冠軍，Crystal當選後即刻被讀者連環踢爆新歡舊愛情史！噚晚馮媽媽同男友Martin都有喺現場見證Crystal戴上后冠，原來，今屆港姐冠軍同十優狀元都有關係㗎，讀者爆料踢爆Martin姓鍾，讀書好勁，係一名十優狀元。記者翻查資料，發現Martin中學時就讀名校喇沙書院，佢係05年嘅十優狀元，之後成功考入港大醫科，Crystal喺面試港姐時已經公開有位醫生男友，仲話Martin喺瑪麗醫院任職內科駐院醫生，兩人喺社交網貼咀嘴相放閃。至於，Crystal嘅舊愛就姓呂，讀者喺電話表示：「我嘅中學同學係佢前男友，男仔讀觀塘瑪利諾書院，佢哋喺香港大學識，佢前男友姓呂，佢哋之前拍過拖，睇相覺得女仔唔同咗樣，唔知佢有冇整過。」問到佢哋拍拖幾耐？讀者表示：「唔清楚，不過佢刪晒啲相，男仔喺中學時讀書唔係好出位，都好驚訝大學識到ok女仔，佢中學時比較毒，掛住讀書不修邊幅，中學時冇女朋友，入到大學先識。」對於被踢爆舊戀情，馮盈盈今日出活動時，強調係同前男友分手後，先同醫生男友開始。佢話：「兩段感情冇重疊，同之前男友差唔多分手咗成年，先同o依家男友發展！」問佢會唔會低調處理感情，馮盈盈話：「都想人focus落我身上，希望運用我啲知名度同影響力，實踐我嘅抱負！」有指馮盈盈個樣參選前後有分別，佢就笑笑口答：「梗係啦，女大十八變，呢個世上冇醜女人，只有懶女人，我都有向身邊朋友偷師，好努力按摩、敷面，仲有飲食都注意咗，我啲朋友都話容光煥發咗！」
|
鍾意就快D Share啦！
|
|
|
